గాజువాక బాలుడి హత్య కేసులో ట్విస్ట్.. ట్రైన్‌లో పరిచయమైన ప్రియుడి కోసం తల్లి ఘాతుకం

విశాఖ గాజువాకలో సంచలనంరేపిన బాలుడి హత్యకేసు మిస్టరీ వీడింది. ప్రియుడి మోజులో ఐదేళ్ల కుమారుడిని అన్యాయంగా చంపేసింది. ప్రియుడి కోసం కన్న కొడుకును నీటి సంపులో పడేసి మూతపెట్టేసింది. అమ్మా అమ్మా అంటూ.. ఆ పసి ప్రాణం విలవిలలాడినా.. ఆమె కన్నపేగు కనికరించలేదు. ఈ కేసులో నిందితులను పోలీసులు అరెస్ట్ చేశారు. విజయనగరం జిల్లాకు చెందిన దూది దొరబాబు భార్య మణితో విశాఖపట్నంలోని గాజువాకలో ఉన్న ఆ అపార్ట్‌మెంట్‌లో వాచ్‌మెన్‌గా ఉంటున్నాడు. వీరికి శంకర్, వేదాంత్ ఇద్దరు కుమారులున్నారు.

ఈ క్రమంలో ఇటీవల దొరబాబు భార్య మణి హైదరాబాద్‌కు ట్రైన్‌లో వెళ్లింది. ఆ ట్రైన్‌ ప్రయాణంలో కాకినాడకు చెందిన పనస కుమార్‌తో పరిచయమైంది. ఈ పరిచయం వివాహేతర సంబంధం వరకు వెళ్లింది. పనస కుమార్ గంజాయి తరలింపు కేసుల్లో విశాఖ కోర్టు చుట్టూ తిరుగుతుండేవాడు. ఈ క్రమంలో మణిని పెళ్లి చేసుకోవాలని కుమార్ భావించాడు. వివాహం చేసుకోవాలంటే పిల్లలు ఉండకూడదని ప్రియుడు షరుతు పెట్టాడు. ఎట్టకేలకు ఇంట్లోంచి వెళ్లాలని నిర్ణయించుకుంది మణి.. ఈనెల 28న ప్రియుడితో వెళ్లిపోయేందుకు సిద్ధమైంది. భర్తతో గొడవకు దిగింది.. ఇంట్లో నుంచి బయటకు వెళ్లేందుకు ప్లాన్ చేసింది.

ఇంట్లోంచి వెళ్తుండగా అడ్డుగా కనిపించిన ఐదేళ్ల చిన్నకుమారుడు వేదాంత్‌ను మట్టుబెట్టాలనుకుంది. అనుకున్నదే తడవుగా ఇంట్లో నిద్రపోతున్న కొడుకును తీసుకెళ్లి అపార్ట్‌మెంట్ గ్రౌండ్‌ఫ్లోర్‌లోని నీటి సంపులో పడేసి మూతపెట్టేసింది. వేదాంత్ అమ్మా.. అమ్మా అంటూ అరుస్తున్నా.. పట్టించుకోకుండా వెనక గేటు నుంచి పరారైంది. మూడు రోజులుగా తండ్రి వేదాంత్ కోసం తిరుగుతూనే ఉన్నాడు. అయితే నీటి సంపు నుంచి దుర్వాసన రావడంతో అనుమానం వచ్చి తెరిచిచూడగా.. నీటిలో వేదాంత్ శవమై తేలాడు. సమాచారం అందుకున్న పోలీసులు.. తండ్రి ఫిర్యాదు మేరకు కేసు దర్యాప్తు చేపట్టారు. వెంటనే విచారణ ప్రారంభించి హైదరాబాద్‌లోని ఉప్పల్‌లో తిరుగుతున్న మణితో పాటూ ఆమె ప్రియుడు పనస కుమార్‌ను అరెస్ట్ చేశారు. అక్కడ నుంచి విశాఖపట్నానికి తీసుకొచ్చి రిమాండ్‌కు తరలించారు.