సచిన్ పైలట్‌ సారా అబ్దుల్లా విడాకులు,,,,ఎన్నికల అఫిడవిట్‌లో సీక్రెట్ రివీల్

రాజస్థాన్‌ అసెంబ్లీ ఎన్నికల షెడ్యూల్ విడుదలైంది. ప్రస్తుతం ఆ రాష్ట్రంలో పోటీ చేసే అభ్యర్థుల నుంచి ఎన్నికల కమిషన్ నామినేషన్ పత్రాలను స్వీకరిస్తోంది. ఈ క్రమంలోనే తాజాగా కాంగ్రెస్ పార్టీ సీనియర్ నేత సచిన్ పైలట్ కూడా నామినేషన్ దాఖలు చేశారు. అయితే సచిన్ పైలట్ అందించిన ఎన్నికల అఫిడవిట్‌లో ఆయనకు చెందిన వ్యక్తిగత విషయం ఒకటి బయటికి వచ్చింది. ఆయన తన భాగస్వామి నుంచి విడాకులు తీసుకున్నట్లు అందులో పేర్కొన్నారు. ఇప్పుడు ఇదే విషయం తీవ్ర చర్చనీయాంశంగా మారింది.

అయితే ఈ ఎన్నికల్లో తాను గతంలో పోటీ చేసిన టోంక్ నియోజకవర్గం నుంచే సచిన్ పైలట్ మరోసారి బరిలో నిలిచారు. ఈ సందర్భంగా అక్టోబర్ 31 వ తేదీన ఎన్నికల నామినేషన్ దాఖలు చేశారు. అయితే ఇందులోనే ఆయన వైవాహిక జీవితం గురించిన ఒక రహస్యం వెల్లడైంది. ఆ ఎన్నికల అఫిడవిట్‌లో లైఫ్ పార్ట్‌నర్ గురించి వివరాలు అడిగిన స్థానంలో డైవర్స్‌డ్ అని పేర్కొన్నారు. ఇప్పుడు ఈ విషయం వెలుగులోకి రావడంతో ఆయన తన భార్యకు విడాకులు ఇచ్చారు అనే విషయం బయటికి వచ్చింది. అయితే సచిన్ పైలట్, సారా అబ్దుల్లా ఎప్పుడు విడిపోయారు అనేది మాత్రం తెలియరాలేదు. అయితే 46 ఏళ్ల సచిన్ పైలట్.. తన భార్య నుంచి విడిపోయిన విషయాన్ని ఇప్పటివరకు బహిరంగంగా వెల్లడించలేదు.

జమ్మూ కాశ్మీర్ మాజీ ముఖ్యమంత్రి, నేషనల్ కాన్ఫరెన్స్ అధినేత ఫరూక్ అబ్దుల్లా కుమార్తెనే సారా అబ్దుల్లా. 2004 లో సచిన్ పైలట్, సారా అబ్దుల్లా పెళ్లి చేసుకున్నారు. వీరిద్దరికీ ఆరన్, వెహాన్ అనే ఇద్దరు కుమారులు ఉన్నారు. అయితే తాజాగా దాఖలు చేసిన ఎన్నికల అఫిడవిట్‌లో తన కుమారులు ఆరన్, వెహాన్ ఇద్దరూ తనపైనే ఆధారపడి ఉన్నారని సచిన్ పైలట్ తెలిపారు. దీంతో సారా అబ్దుల్లా మాత్రమే సచిన్ పైలట్ నుంచి విడిపోయారని.. ఆయన కుమారులు మాత్రం వెంటే ఉన్నారని అర్థం అవుతోంది.

ఇక గడిచిన ఐదేళ్లలో సచిన్‌ పైలట్ ఆస్తులు దాదాపు రెండింతలు పెరిగినట్లు అఫిడవిట్‌లో పేర్కొన్న లెక్కల ప్రకారం తెలుస్తోంది. 2018 లో సచిన్ పైలట్.. మొత్తం ఆస్తుల విలువ సుమారు రూ. 3.8 కోట్లు ఉండగా.. తాజాగా ఎన్నికల సంఘానికి తెలిపిన వివరాల ప్రకారం 2023 నాటికి అది రూ.7.5 కోట్లకు చేరుకుంది. రాజస్థాన్ అసెంబ్లీకి నవంబర్ 25 వ తేదీన ఎన్నికలు జరగనుండగా.. ఐదు రాష్ట్రాల అసెంబ్లీ ఎన్నికల ఫలితాలతోనే డిసెంబర్ 3 వ తేదీన రాజస్థాన్ ఫలితాలు కూడా వెల్లడి కానున్నాయి.

ఉత్తరప్రదేశ్‌లోని సహరన్‌పూర్‌లో జన్మించిన సచిన్ పైలట్.. సెయింట్ స్టీఫెన్స్ కళాశాలలో గ్రాడ్యుయేషన్ వరకు చదివారు. ఆ తర్వాత లండన్‌లోని పెన్సిల్వేనియా యూనివర్సిటీలోని వార్టన్ స్కూల్ ఆఫ్ బిజినెస్ నుంచి ఎంబీఏ పట్టా పొందారు. అయితే 1990 వరకు జమ్మూ కాశ్మీర్‌లోనే నివసించిన సారా అబ్దుల్లా.. ఆ తర్వాత కాశ్మీర్‌లో జరిగిన ఉద్రిక్తతల కారణంగా సారా అబ్దుల్లాను ఆమె తల్లిని ఫరూక్ అబ్దుల్లా లండన్‌కు పంపించారు. అక్కడే సచిన్ పైలట్, సారా అబ్దుల్లా మధ్య ప్రేమ చిగురించింది. ఆ తర్వాత భారత్‌కు వచ్చి పెళ్లి చేసుకుంటామని చెప్పగా.. రెండు కుటుంబాలు అంగీకరించలేదు.

గుజ్జర్‌ల కుటుంబం నుంచి వచ్చిన సచిన్ పైలట్, ముస్లిం కుటుంబం నుంచి వచ్చిన సారా అబ్దుల్లా.. పెళ్లి కోసం కొన్ని నెలల తరబడి వేచి చూశారు. దీంతో ఎలాంటి అంగీకారం లభించకపోవడంతో 2004 జనవరిలో సచిన్ పైలట్, సారా అబ్దుల్లా పెళ్లి చేసుకున్నారు. అతి తక్కువ మంది అతిథుల మధ్య ఈ పెళ్లి నిర్వహించారు. ఈ వివాహాన్ని మొదట బహిష్కరించిన అబ్దుల్లా కుటుంబం.. తర్వాత కుమార్తెకు దగ్గరయ్యారు. ఇక పెళ్లి తర్వాత కొన్ని రోజులకే సచిన్ పైలట్ కూడా రాజకీయాల్లోకి అడుగు పెట్టారు.