రఫా క్రాసింగ్ నుంచి పౌరులకు ఈజిప్టు అనుమతి.. తొలుత విదేశీయులకు ఛాన్స్

గాయపడిన పాలస్తీనియన్ల వైద్య చికిత్స కోసం రఫా సరిహద్దును తెరవనున్నట్టు ఈజిప్టు ప్రకటించింది. హమాస్-ఇజ్రాయేల్ యుద్ధం ప్రారంభమైన తర్వాత ఈ సరిహద్దును పౌరుల కోసం ఈజిప్టు తెరవడం ఇదే మొదటిసారి. దీంతో గాజాలో చిక్కుకున్న విదేశీయులు ఈ సరిహద్దుల నుంచి ఈజిప్టుకు పయనమవుతున్నారు. గాజాకు మానవతాసాయం కోసం రఫా సరిహద్దులను ఈజిప్టు అక్టోబరు 21న తెరిచిన విషయం తెలిసిందే. ఇప్పటి వరకూ వాహనాలను మాత్రమే అనుమతించిన ఈజిప్టు.. పౌరులను కూడా వెళ్లేందుకు అంగీకరించింది.

ఈ నేపథ్యంలో విదేశీయులు, ద్వంద్వ పౌరసత్వం కలిగిన 400 మందితో పాటు తీవ్రంగా గాయపడిన 90 మంది బుధవారం రఫా సరిహద్దుల గుండా గాజా నుంచి బయలుదేరే అవకాశం ఉంది. అక్టోబరు 7 నుంచి గాజాపై ఇజ్రాయేల్ సైన్యం జరుపుతోన్న దాడుల్లో ఇప్పటి వరకూ 8 వేల మంది పాలస్తీనా పౌరులు ప్రాణాలు కోల్పోయారు. ఇజ్రాయేల్ సైనిక దాడిని మరింత విస్తృతం చేసింది. ఇన్నాళ్లూ వైమానిక దాడులకు పరిమితమైన ఇజ్రాయేల్.. గత గురువారం నుంచి భూతల యుద్ధం ప్రారంభించింది. దీంతో గాజాలో పరిస్థితులు మరింత దిగజారాయి. బుధవారం ఓ శరణార్థ శిబిరంపై ఇజ్రాయేల్ భారీ బాంబు దాడికి తెగబడింది. ఈ ఘటనలో డజన్ల మంది చనిపోయారు.

గాజాను చుట్టుముట్టిన ఇజ్రాయేల్.. తొలుత ఉత్తర భాగంలో ఉన్న ప్రజలను దక్షిణ ప్రాంతానికి వెళ్లాలని సూచించింది. దీంతో లక్షల మంది ప్రాణాలను అరచేతుల్లో పెట్టుకుని అక్కడకు తరలిపోయారు. ఆ ప్రాంతాలపై కూడా ఇజ్రాయేల్ దాడులు చేయడంతో గాజా పౌరులు దిక్కుతోచని స్థితిలో ఉన్నారు. మరోవైపు, బందీలను విడిపించడమే లక్ష్యంగా ఇంటి ఇంటికి వెళ్లి సైన్యం తనిఖీ చేస్తోంది. ఓవైపు వైమానిక దాడులు, భూతల దాడులు.. మరోవైపు సైనికుల ముమ్మర తనిఖీలతో హమాస్‌ మిలిటెంట్లు ఉక్కిరిబిక్కిరి అవుతున్నారు

మరోవైపు, గాజాలో వైమానిక దాడులతో ధ్వంసమైన శిథిలాల మధ్య ఇజ్రాయేల్‌ సైన్యం అణువణువు జల్లెడ పడుతోంది. సొరంగాల్లో దాగిన హమాస్‌ మిలిటెంట్లను ఏరిపారేస్తోంది. టన్నెల్స్‌ దాగిన హమాస్‌ మిలిటెంట్లు, తమకు భీకర పోరు జరుగుతోందని ఇజ్రాయేల్‌ ప్రకటించింది. గాజా ఉత్తర దక్షిణ రహదారిని లక్ష్యంగా చేసుకుని రెండువైపుల నుంచి ఇజ్రాయేల్ సైన్యం భీకర దాడులు చేసిందని స్థానికులు తెలిపారు.