గాజాలోని శరణార్థ శిబిరంపై ఇజ్రాయేల్ దాడి.. జర్నలిస్ట్ ఫ్యామిలీలోని 19 మంది మృతి

హమాస్‌ మిలిటెంట్ వ్యవస్థను కూకటివేళ్లతో పెకిలించడమే లక్ష్యంగా గాజా నగరంపై ఇజ్రాయేల్‌ భీకర దాడులను కొనసాగిస్తోంది. ఓవైపు వైమానిక దాడులు, బాంబులతో విరుచుకుపడుతూనే.. భూతల యుద్ధాన్ని ఇజ్రాయేల్ సైన్యం సాగిస్తోంది. ఈ క్రమంలోనే గాజా శివార్లలోని ఓ శరణార్ధి శిబిరంపై బాంబు దాడి జరిగింది. ఈ ఘటనలో ఓ జర్నలిస్ట్ కుటుంబంలోని 19 మంది ప్రాణాలు కోల్పోయారు. జబాలియాలో శరణార్థ శిబిరం ఉన్న అపార్ట్‌మెంటుపై మంగళవారం జరిగిన బాంబు దాడిలో ప్రముఖ మీడియా సంస్థ అల్‌జజీరాకు చెందిన ఓ జర్నలిస్టు 19 మంది కుటుంబసభ్యులను కోల్పోయారు.

ఈ మేరకు ఓ కథనం వెలువరించిన అల్‌జజీరా.. గాజా బ్యూరోలో బ్రాడ్‌కాస్ట్ ఇంజినీర్‌గా పనిచేస్తున్న మహ్మద్‌ అబు అల్‌ ఖుమ్‌సన్‌ తన కుటుంబాన్ని కోల్పోయారని తెలిపింది. ఆయన తండ్రి, సోదరుడు, ఇద్దరు సోదరీమణులు, ఎనిమిది మంది మేనళ్లులు, మేనకోడళ్లు, ఇతర కుటుంబసభ్యులు ఈ దాడిలో చనిపోయినట్లు పేర్కొంది. ఇది ఇజ్రాయేల్‌ దళాల ‘మారణహోమం’ అంటూ అల్‌జజీరా ఈ ఘటనను తీవ్రంగా ఖండించింది. కాగా.. ఇటీవల ఇజ్రాయేల్ వైమానిక దాడుల్లోనూ ఈ మీడియా సంస్థకు చెందిన ఓ జర్నలిస్టు.. తన భార్యాపిల్లలను కోల్పోయిన విషయం తెలిసిందే.

మరోవైపు, గాజా నగరంలో ఇంటర్నెట్, సమాచార సేవలను బుధవారం నిలిపివేస్తున్నట్టు పాలస్తీనా టెలికమ్యూనికేషన్ కంపెనీ (పాల్‌టెల్) ప్రకటించింది. కాగా, ఇజ్రాయేల్ దళాలకు గాజాను స్మశానవాటికగా మారుస్తామని హమాస్ సైనిక విభాగం ఎజెడిన్ అల్-కస్సామ్ బ్రిగేడ్స్ ప్రతిజ్ఞ చేసింది. శరణార్ధ శిబిరంపై ఇజ్రాయేల్ దాడిని ఈజిప్టు తీవ్రంగా ఖండించింది. ఇది అమానవీయ చర్య అని వ్యాఖ్యానించింది. గాయపడిన పాలస్తీనియన్లను వైద్య చికిత్స కోసం రఫా సరిహద్దును తెరవనున్నట్టు తెలిపింది. హమాస్-ఇజ్రాయేల్ పోరు ప్రారంభమైన తర్వాత ఈ సరిహద్దును పౌరుల కోసం తెరవడం ఇదే మొదటిసారి.

శరణార్థ శిబిరంపై జరిగిన దాడిలో 50 మందికి పైగా ప్రాణాలు కోల్పోయినట్లు పాలస్తీనా అధికారులు వెల్లడించారు. ఈ దాడిలో హమాస్‌ కమాండర్‌ ఇబ్రహిమ్‌ బియారీ కూడా మరణించినట్లు ఇజ్రాయేల్ సైనిక అధికార ప్రతినిధి వెల్లడించారు. అక్టోబరు 7 నాటి హమాస్ నరమేధంలో బియారీ కీలక పాత్ర పోషించినట్లు పేర్కొంది. అయితే, ఈ వార్తలను హమాస్‌ తోసిపుచ్చింది. ఆ శిబిరంలో తమ నేతలెవరూ లేరని పేర్కొంది. ఇదిలా ఉండగా, గాజాలో గురువారం మరో 9 మంది సైనికులు చనిపోవడంతో అక్టోబరు 7 నుంచి ఇప్పటి వరకూ మరణించిన సైనికుల సంఖ్య 326కు చేరినట్టు ఇజ్రాయేల్ ప్రకటించింది.