సిఖ్స్ ఫర్ జస్టిస్ పేరుతో ఉగ్రవాద కార్యకలపాలు,,,మరోసారి బెదిరింపులకు దిగిన గురుపత్వంత్ సింగ్

సిక్కులు ఎవరూ నవంబరు 19న ఎయిరిండియా విమానాల్లో ప్రయాణించవద్దని, ఒకవేళ అలా ఎవరైనా ప్రయాణిస్తే ప్రాణాలు ప్రమాదంలో పడతాయని హెచ్చరిస్తూ ఖలీస్థాన్ వేర్పాటువాది గురుపత్వంత్ సింగ్ పన్నూన్ బెదిరింపులకు పాల్పడిన వీడియో సోషల్ మీడియాలో వైరల్ అవుతోంది. అమెరికాకు చెందిన వేర్పాటువాద గ్రూప్ సిఖ్స్ ఫర్ జస్టిస్ వ్యవస్థాపకులలో పన్నూన్ ఒకరు. ఖలీస్థాన్ ఏర్పాటుకోసం అమెరికా, కెనడాలో లాబీయింగ్ చేస్తుంటారు. ‘నవంబర్ 19న ఎయిర్ ఇండియా విమానంలో ప్రయాణించవద్దని సిక్కు ప్రజలను కోరుతున్నాం.. ప్రపంచవ్యాప్త దిగ్బంధనం ఉంటుంది. ఎయిర్ ఇండియాను ఆపరేట్ చేయడానికి అనుమతించరు. నవంబర్ 19న ఎయిర్ ఇండియాలో ప్రయాణించవద్దు లేదంటే మీ ప్రాణాలకు ముప్పు వాటిల్లుతుంది.. అదే రోజు నవంబర్ 19న వరల్డ్ టెర్రర్ కప్ ఫైనల్ మ్యాచ్ జరుగుతుంది’ అని బెదిరించాడు. మొత్తం 37 సెకెన్ల నిడివి ఉన్న ఓ వీడియో సోషల్ మీడియాలో దర్శనమిచ్చింది.

అంతేకాదు, ఢిల్లీలోని ఇందిరా గాంధీ అంతర్జాతీయ విమానాశ్రయం నవంబర్ 19న మూసివేయబడుతుందని చెప్పడం గమనార్హం. విమానాశ్రయం పేరును కూడా మార్చాలని పన్నూన్ ప్రతిపాదించారు. ‘పంజాబ్ విముక్తి పొందినప్పుడు ఈ విమానాశ్రయం పేరును షాహిద్ బియాంత్ సింగ్, షాహిద్ సత్వంత్ సింగ్ ఖలిస్థాన్‌గా మారుస్తాం’ అని అన్నారు. కాగా, గురపత్వంత్ సింగ్ ఇటువంటి బెదిరింపులకు పాల్పడటం ఇదే మొదటిసారి కాదు. గత సెప్టెంబరులో కెనడాలో హిందువులంతా ఆ దేశాన్ని విడిచివెళ్లాలని ప్రకటించాడు. హర్‌దీప్ సింగ్ నిజ్జార్ హత్యపై భారత్, కెనడాల మధ్య దౌత్య యుద్ధం కొనసాగుతున్న వేళ పన్నూన్ ఈ వ్యాఖ్యలు చేశాడు. నిజ్జర్ హత్యలో భారత ఏజెంట్ల పాత్ర ఉందంటూ కెనడా ప్రధాని జస్టిన్ ట్రూడో చేసిన ఆరోపణలను భారత ప్రభుత్వం తోసిపుచ్చింది. ఇవన్నీ తప్పుడు ఆరోపణలని, ఆధారాలు ఏమైనా ఉంటే బయటపెట్టాలని డిమాండ్ చేసింది.

ఇక, గురుపత్వంత్ సింగ్ పన్నూన్‌కు 2020 జులైలో ఉగ్రవాదిగా భారత్ గుర్తించింది. అతడి ఆస్తులను అంతకు ముందే అటాచ్ చేసింది. భారతదేశాన్ని ముక్కలు ముక్కలుగా విభజించి, ఎన్నో దేశాలుగా ఏర్పాటు చేయాలని భారీ కుట్ర పన్నినట్టు నేషనల్ ఇన్వెస్టిగేషన్ ఏజెన్సీ  దర్యాప్తులో వెల్లడయ్యింది. భారతదేశ ఐక్యత, సమగ్రతను అతడు సవాల్ చేసినట్టు.. ఆడియో మెసేజ్‌ల ద్వారా అధికారులు నిర్దారించారు. గురుపత్వంత్ సింగ్‌పై పంజాబ్‌లో మూడు దేశద్రోహం పాటు రెండు డజన్ల ఇతర కేసులను కూడా ఎదుర్కొంటున్నాడు. ఇండియా గేట్ వద్ద ఖలిస్థానీ జెండాను ఎగురవేసేవారికి 2.5 మిలియన్ డాలర్లను అతడు ఆఫర్ చేశాడు. అంతేకాదు.. 2021లో స్వాతంత్య్ర దినోత్సవం రోజున ఎర్రకోటపై భారత జెండాను ఎగురవేయకుండా ఆపిన పోలీసు సిబ్బందికి 1 మిలియన్ డాలర్‌ని కూడా ఆఫర్ చేయడం గమనార్హం.