గాజాపై అణుబాంబు వేస్తామన్న ఇజ్రాయెల్ మంత్రి,,,మంత్రి ప్రకటనపై స్పందించిన ప్రధాని నెతన్యాహు

ఇజ్రాయెల్ హమాస్ మధ్య తీవ్ర యుద్ధం కొనసాగుతోంది. తమపై హమాస్ ఉగ్రవాదులు చేసిన ఆకస్మిక దాడులకు ఇజ్రాయెల్ ధీటుగా బదులు చెబుతోంది. ఈ క్రమంలోనే గాజా స్ట్రిప్‌ను అష్టదిగ్భందనం చేసి భీకర దాడులకు పాల్పడుతోంది. హమాస్‌ మిలిటెంట్ల ఉనికి లేకుండా చేయాలని ప్రతిజ్ఞ చేపట్టి.. ఆ దిశగా తీవ్రమైన దాడులకు దిగుతున్న ఇజ్రాయెల్.. గాజాలోకి ప్రవేశించి మరీ.. హమాస్ ఉగ్రవాదులను ఏరివేస్తోంది. హమాస్ గ్రూపును లేకుండా చేయడమే తమ లక్ష్యమని ఇజ్రాయెల్ ప్రధాని బెంజమిన్ నెతన్యాహు ఇప్పటికే పలుమార్లు తెలిపారు. ఇక గాజాను చుట్టు ముట్టి ఇజ్రాయెల్ డిఫెన్స్ ఫోర్స్ చేసిన దాడుల్లో ఇప్పటివరకు 9 వేల మంది పాలస్తీనియన్లు మరణించారని హమాస్ అధికార వర్గాలు వెల్లడించాయి.

అయితే తాజాగా ఇజ్రాయిల్ హెరిటేజ్ మంత్రి అమిచాయ్ ఎలియాహు చేసిన ప్రకటన తీవ్ర సంచలనం రేపింది. గాజా భూభాగంలోని హమాస్‌ ఉగ్రవాదుల‌తో సాగిస్తున్న యుద్ధంలో అణు బాంబు వేయడం ఒక ఆప్షన్ అని అమిచాయ్ ఎలియాహు చెప్పడం అంతర్జాతీయంగా తీవ్ర భయాందోళనకు కారణమాంది. ఇజ్రాయిల్‌లోని ఓట్జ్మా యెహుదిత్ పార్టీ సభ్యుడు ఎలియాహు ఓ రేడియోకు ఇచ్చిన ఇంటర్వ్యూలో ఈ ప్రకటన చేశారు. దీంతో ఇప్పటికే హమాస్ ఉగ్రవాదులను తీవ్రంగా బెదిరిస్తున్న ఇజ్రాయెల్.. అణు బాంబు హెచ్చరికలు కూడా చేయడంతో అది ఎక్కడికి దారి తీస్తుందోనని ప్రపంచ దేశాలు తీవ్ర ఆందోళన చెందుతున్నాయి.

ఇక ఇజ్రాయెల్ హెరిటేజ్ మంత్రి అమిచాయ్ ఎలియాహు చేసిన ప్రకటనపై ఇజ్రాయిల్ ప్రధాని బెంజమిన్ నెతన్యాహూ తీవ్రంగా స్పందించారు. మంత్రి చేసిన వ్యాఖ్యల్ని ఖండించారు. ఇజ్రాయిల్, ఇజ్రాయిల్ డిఫెన్స్ ఫోర్సెస్.. అంతర్జాతీయ చట్టాలు, అత్యున్నత ప్రమాణాలకు అనుగుణంగా పని చేస్తుందని స్పష్టం చేశారు. అమాయకులకు హాని కలిగించకుండా ఉండటానికి తీసుకోవాల్సిన జాగ్రత్తలు అన్నీ తీసుకుంటూనే ప్రత్యర్థులపై తమ యుద్ధాన్ని కొనసాగిస్తామని పేర్కొన్నారు. ఈ యుద్ధంలో ఇజ్రాయెల్ విజయం సాధించే వరకు కొనసాగిస్తామని ట్విట్టర్‌లో బెంజమిన్ నెతన్యాహు వెల్లడించారు. ఈ క్రమంలోనే అమిచాయ్ ఎలియాహు చేసిన వ్యాఖ్యలను ఇజ్రాయిల్ ప్రతిపక్ష నాయకుడు, మాజీ ప్రధాని యాయిర్ లాపిడ్ కూడా తీవ్రంగా విమర్శించారు. బాధ్యతా రహితంగా మాట్లాడిన మంత్రిని తొలగించాలని ప్రధాని నెతన్యాహును డిమాండ్ చేశారు.

ఇక గాజాలో నివసిస్తున్న ప్రజలను నాజీలుగా పిలుస్తూ ఇజ్రాయెల్ మంత్రి అమిచాయ్ ఎలియాహు నిందించారు. వారికి మానవతా సాయం కూడా అందించడాన్ని ఆయన తీవ్రంగా వ్యతిరేకించారు. గాజా స్ట్రిప్‌ను తిరిగి ఇజ్రాయెల్ స్వాధీనం చేసుకుని అక్కడ నివాసాలను పునర్మించాలని ఎలియాహు తెలిపారు. గాజాను ఇజ్రాయిల్‌ ఆక్రమిస్తే.. గాజాలోని రాక్షసులు పారిపోతారని హమాస్ ఉగ్రవాదులను ఉద్దేశించి వ్యాఖ్యానించారు. అయితే అమిచాయ్ ఎలియాహు చేసిన వ్యాఖ్యలు తీవ్ర దుమారం రేపడంతో ఇజ్రాయెల్ ప్రధాని బెంజమిన్ నెతన్యాహు.. ఆయనను మంత్రి వర్గం నుంచి సస్పెండ్ చేసినట్లు టైమ్స్ ఆఫ్ ఇజ్రాయిల్ పేర్కొంది.