తెలంగాణలో ప్రధాని 3 రోజుల ఎన్నికల ప్రచారం,,,,నవంబరు 26న సాయంత్రం తిరుమలకు మోదీ

కలియుగ ప్రత్యక్ష దైవం తిరుమల శ్రీవేంకటేశ్వరస్వామి దర్శనానికి ప్రధాని నరేంద్ర మోదీ ఈ నెలలో విచ్చేస్తున్నారు. దీనికి సంబంధించిన షెడ్యూల్‌ను ప్రధాన మంత్రి కార్యాలయం బుధవారం అధికారికంగా విడుదల చేసింది. ప్రధాని పర్యటన రెండు రోజుల పాటు కొనసాగనుంది.. నవంబరు 26న సాయంత్రం 6:50 గంటలకు ప్రధాని ప్రత్యేక విమానంలో తిరుపతి విమానాశ్రయానికి చేరుకుంటారు. అక్కడ నుంచి రోడ్డు మార్గం ద్వారా రాత్రి 7:50 గంటలకు తిరుమలకు చేరుకుని.. కొండపై శ్రీరచనా అతిధి గృహంలో బస చేస్తారు.

మర్నాడు అంటే నవంబరు 27న ఉదయం 7:55 గంటలకు శ్రీవారిని దర్శించుకోనున్నారు. ఉదయం 8:45 గంటల వరకు ఆలయంలోనే ప్రధాని గడపనున్నారు. స్వామి దర్శనం అనంతరం.. వేద పండితుల ఆశీర్వాదాలు, ప్రసాదం స్వీకరించి ఉదయం 8:55 గంటలకు బయటకు వస్తారు. దర్శనం ముగించుకుని తిరిగి శ్రీరచనా అతిధి గృహానికి చేరుకుంటారు. కాసేపు విశ్రాంతి తీసుకుని ఉదయం 9:30 గంటలకు తిరుమల నుంచి బయలుదేరి వెళ్తారు. తిరుపతి ఎయిర్‌పోర్ట్‌కు చేరుకుని ప్రత్యేక విమానంలో తిరుగు ప్రయాణం కానున్నారు.

ఐదు రాష్ట్రాల శాసనసభ ఎన్నికల నేపథ్యంలో పలుచోట్ల ప్రచారం నిర్వహిస్తోన్న ప్రధాని.. సుడిగాలి పర్యటనలు చేస్తున్నారు. రాజస్థాన్‌లో నవంబరు 25న పోలింగ్ జరుగుతుండగా.. ప్రచారం రేపటితో (నవంబరు 23న) ముగియనుంది. చివరిగా నవంబరు 30న తెలంగాణలో ఎన్నికలు జరుగుతున్నాయి. దీంతో ఈ నెల 25, 26, 27 తేదీల్లో తెలంగాణలో మోదీ ప్రచారం నిర్వహిస్తారు.. ఈ పర్యటన మధ్యలోనే ఆయన తిరుమలకు వెళ్లిరానున్నారు..

కాగా, ప్రధాని పర్యటనకు సంబంధించిన ఏర్పాట్లపై టీటీడీ అధికారులకు కూడా పీఎంఓ సమాచారం ఇచ్చింది. దీంతో అధికార యంత్రాంగం భద్రతపై దృష్టి సారించింది. తిరుమలలో ప్రధాని వసతికి ఏర్పాట్లు చేస్తున్నారు. అయితే, మోదీకి స్వాగతం పలికేందుకు సీఎం జగన్ 26న తిరుపతికి వస్తారని తెలుస్తోంది. గతంలో ప్రధాని తిరుమలకు వచ్చిన సమయంలో ఏపీ సీఎం ఆయనకు స్వాగతం పలికేందుకు తిరుపతికి వచ్చారు. ఇరువురూ కలిసి తిరుమలకు చేరుకుని.. స్వామిని దర్శించుకున్నారు.