చంద్రబాబుపై అప్పటి వరకు చర్యలొద్దు.. సీఐడీకి ఏపీ హైకోర్టు కీలక ఆదేశాలు
Andhra Pradesh Telugu | Suryaa Desk | Published : Tue, Nov 28, 2023, 09:11 PM
గత ప్రభుత్వ హయాంలో మద్యం కంపెనీలకు సంబంధించి అనుచిత లబ్ధి చేకూర్చేలా నిర్ణయాలు తీసుకున్నారంటూ చంద్రబాబుపై సీఐడీ కేసు నమోదు చేసిన సంగతి తెలిసిందే. ఈ కేసులో టీడీపీ అధినేత చంద్రబాబు, అప్పటి ఎక్సైజ్‌శాఖ మంత్రి కొల్లు రవీంద్రలు ఏపీ హైకోర్టులో బెయిల్ పిటిషన్ దాఖలు చేసిన సంగతి తెలిసిందే. అయితే తాము తదుపరి ఉత్తర్వులిచ్చేంత వరకు కఠిన చర్యలు తీసుకోవద్దని సీఐడీని హైకోర్టు ఆదేశించింది. ముందస్తు బెయిలు పిటిషన్లపై తీర్పును రిజర్వ్ వేసింది. ఈ మేరకుహైకోర్టు న్యాయమూర్తి జస్టిస్‌ టి మల్లికార్జునరావు ఉత్తర్వులు జారీచేశారు.
మద్యం కంపెనీలకు అనుచిత లబ్ధి చేకూర్చేలా గత ప్రభుత్వ హయాంలో నిర్ణయాలు తీసుకున్నారన్న ఆరోపణలతో బెవరేజెస్‌ కార్పొరేషన్‌ ఎండీ వాసుదేవరెడ్డి ఇచ్చిన ఫిర్యాదు ఆధారంగా చంద్రబాబు, కొల్లు రవీంద్ర, ఎక్సైజ్‌శాఖ కమిషనర్‌పై సీఐడీ కేసు నమోదు చేసింది. ఈ కేసులో ముందస్తు బెయిలు మంజూరు చేయాలని కోరుతూ చంద్రబాబు, రవీంద్ర దాఖలు చేసిన పిటిషన్లపై గత గురువారం ఇరువైపు న్యాయవాదుల వాదనలు ముగిశాయి.
రాతపూర్వక వాదనలు కోర్టుకు సమర్పించడం కోసం విచారణ సోమవారానికి వాయిదా వేయగా.. మరోసారి సీఐడీ తరఫున ఏజీ శ్రీరామ్‌ కొన్ని అంశాలపై స్పష్టత ఇచ్చారు. రాతపూర్వక వాదనలు కోర్టులో దాఖలు చేశామన్నారు. పిటిషనర్ల తరఫు న్యాయవాదులు సైతం రాతపూర్వక వాదనలు సమర్పించినట్లు తెలిపారు. దీంతో తీర్పును రిజర్వు చేస్తున్నట్లు న్యాయమూర్తి ప్రకటించారు. తదుపరి ఉత్తర్వులిచ్చేంత వరకు పిటిషనర్లపై తొందరపాటు చర్యలు తీసుకోవద్దని సీఐడీని ఆదేశించారు.
|
|