అధ్యక్ష ఎన్నికల్లో రిపబ్లికన్ అభ్యర్థిత్వం.. వివేక్ రామస్వామికి వరుస షాక్‌లు

అమెరికా అధ్యక్ష ఎన్నికల్లో రిపబ్లికన్ పార్టీ అభ్యర్థిత్వానికి పోటీపడుతున్న భారత సంతతికి చెందిన వివేక్ రామస్వామికి (38) వరుస షాక్‌లు తగులుతున్నాయి. రామస్వామి బృందంలోని సీనియర్ రాజకీయ సలహదారు, జాతీయ ఎన్నికల ప్రచార కమిటీ డైరెక్టర్ బ్రాయన్‌ స్వెన్సన్‌ గత వారాంతంలో రాజీనామా చేసి.. ప్రత్యర్థి డొనాల్డ్‌ ట్రంప్‌ శిబిరంలో చేరిపోయారు. ముందస్తు ఓటింగ్ రాష్ట్రాలు ప్రత్యేకంగా నెవాడాలో రాజకీయ కార్యాచరణపై స్వెన్సన్ కీలకంగా వ్యవహరిస్తారని భావించారు. కానీ, అంతలో ఆయన రాజీనామా చేయడం గమనార్హం.

రామస్వామి ప్రచార బృందంలో వీడియోగ్రాఫర్‌ బ్రాండన్‌ గుడ్‌ ఇయర్‌ కూడా ఇప్పటికే తప్పుకున్నారు. 21వ శతాబ్దిలో అత్యుత్తమ అధ్యక్షుడిగా ట్రంప్‌పై ప్రశంసలు కురిపిస్తూనే.. ఎన్నికల ప్రచారంలో తొలినాళ్లలో వివేక రామస్వామి కాస్త ఆధిపత్యం ప్రదర్శించినట్టు కనిపించారు. కానీ, ప్రచారం ఇప్పుడు వెనుకబడిందనే చెప్పాలి. రిపబ్లికన్‌ పార్టీ నామినేషన్ కోసం పోటీపడే అభ్యర్థుల మధ్య చర్చల్లోనూ ప్రత్యర్థులను రామస్వామిని లక్ష్యంగా చేసుకొంటున్నారు. ఆయనకు రాజకీయ అనుభవం లేదనీ.. ఇజ్రాయేల్‌, తైవాన్‌ సమస్యలపై వివాదాస్పద వైఖరి తీసుకున్నారనీ విమర్శలు వస్తున్నాయి.

రామస్వామి ప్రచార కమిటీ ప్రతినిధి ట్రిసియా మెక్‌లాఫ్లిన్ మాట్లాడుతూ.. తమతో కలిసి పనిచేసినందుకు స్వెన్‌సెన్‌కు ధన్యవాదాలు.. భవిష్యత్తులో ఆయన మరింత ఉన్నత స్థితికి వెళ్లాలని కోరుకుంటున్నామని తెలిపారు. ‘మేము బ్రియాన్‌ను ఇప్పటికీ ఇష్టపడుతున్నాం.. శుభాకాంక్షలు తెలియజేస్తున్నాం... రెండు ప్రచారాలకు ఇది ఉత్తమమని నేను భావిస్తున్నాను’ అని అన్నారు. స్వెన్సెన్ స్థానంలో ఆ బాధ్యతలను ఇప్పుడు సీనియర్ సలహాదారు మైక్ బియుండో పర్యవేక్షిస్తారని పేర్కొన్నారు. కాగా, వచ్చే వారం అలాబామాలో జరిగే నాలుగో రిపబ్లికన్ డిబేట్ కోసం అర్హత సాధించాడు. సింగిల్ డిజిట్ నంబర్‌లతో జాతీయ ఎన్నికలలో రాణించలేకపోయి ఆయన తోటి భారతీయ అమెరికన్ నిక్కీ హేలీ, ఫ్లోరిడా గవర్నర్ రాన్ డిసాంటిస్‌ల కంటే వెనుకబడి ఉన్నాడు. మూడో డిబెట్‌లో రిపబ్లికన్ ప్రైమరీ ఓటర్ల 538/వాషింగ్టన్ పోస్ట్/ఇప్సోస్ పోల్‌లో ఆయన ప్రతికూల రేటింగ్ 12 పాయింట్లు పెరిగి 47 శాతానికి చేరింది.