నెల్లూరు, మచిలీపట్నం మధ్య తీరం దాటనున్న తుఫాన్.. ఈ జిల్లాల్లో అత్యంత భారీ వర్షాలు

ఏపీ వైపుగా తుఫాన్ ముప్పు దూసుకొస్తోంది. ఆగ్నేయ బంగాళాఖాతంలో ఏర్పడిన తీవ్ర అల్పపీడనం వాయుగుండంగా బలపడింది. ఇది పుదుచ్చేరికి 730 కి.మీ., చెన్నైకి 740 కి.మీ, నెల్లూరుకు 860 కి.మీ, బాపట్లకు 930 కి.మీ, మచిలీపట్నానికి 910 కి.మీ. దూరంలో కేంద్రీకృతమై ఉందన్నారు. ఇది పశ్చిమ-వాయవ్య దిశగా పయనించి శనివారానికి నైరుతి బంగాళాఖాతంలో తీవ్ర వాయుగుండంగా.. ఆదివారానికి తుఫాన్‌గా బలపడుతుందని అంచనా వేస్తున్నారు. అనంతరం వాయవ్య దిశగా పయనించి సోమవారం నాటికి నెల్లూరు-మచిలీపట్నం మధ్యలో తీరం దాటేందుకు అవకాశం ఉందన్నారు. ఈ తుఫాన్‌కు మయన్మార్‌ సూచించిన ‘మిచౌంగ్‌’గా నామకరణం చేయనున్నారు.

ఈ తుఫాన్ ప్రభావంతో ఆది, సోమవారాల్లో రాష్ట్రంలోని కొన్ని ప్రాంతాల్లో భారీ నుంచి అతిభారీ వర్షాలు, అనేక ప్రాంతాల్లో తేలికపాటి నుంచి ఓ మోస్తరు వర్షాలు కురవొచ్చని భావిస్తున్నారు. సోమవారం పశ్చిమగోదావరి, డా.బీఆర్‌ అంబేద్కర్ కోనసీమ, తూర్పుగోదావరి, కాకినాడ, అల్లూరి సీతారామరాజు, అనకాపల్లి, శ్రీపొట్టిశ్రీరాములు నెల్లూరు, ప్రకాశం, బాపట్ల, కృష్ణా, తిరుపతి జిల్లాల్లో భారీ నుంచి అత్యంత భారీ వర్షాలకు ఛాన్స్ ఉంది. మంగళవారం దక్షిణ కోస్తా, ఉత్తరకోస్తాలో అత్యంత భారీ వర్షాలు పడతాయంటున్నారు. ఆదివారం-మంగళవారం వరకు భారీవర్షాల సూచనతో విపత్తుల నిర్వహణ సంస్థలో స్టేట్ కంట్రోల్ రూమ్ ఏర్పాటు చేసింది. అత్యవసర సహయం,సమాచారం కోసం 24గంటలు కంట్రోల్ రూమ్ నెంబర్లు 1070, 112, 18004250101 అందుబాటులో ఉంటాయంటున్నారు. ఎప్పటికప్పుడు వాతావరణ పరిస్థితులు పర్యవేక్షణ ఉంటుందని.. రైతులు తగిన జాగ్రత్తలు తీసుకోవాలని సూచించారు.

వాయుగుండం ప్రభావంతో శనివారం కోస్తా, రాయలసీమల్లో పలుచోట్ల వర్షాలు, తిరుపతి, నెల్లూరు, ప్రకాశం జిల్లాల్లో అక్కడక్కడా భారీవర్షాలు కురుస్తాయని అంచనా వేస్తున్నారు. ఈ నెల 3న దక్షిణ కోస్తా, రాయలసీమల్లో అనేకచోట్ల.. ఉత్తరకోస్తాలో పలుచోట్ల వర్షాలు.. తిరుపతి, నెల్లూరు, ప్రకాశం, బాపట్ల, కృష్ణా, పశ్చిమ, తూర్పు గోదావరి జిల్లాలు, కాకినాడ, కోనసీమ, అనకాపల్లి, విశాఖపట్నం జిల్లాల్లో అక్కడక్కడా భారీ నుంచి అతిభారీ వానలు పడతాయంటున్నారు. శ్రీకాకుళం, పార్వతీపురం మన్యం, విజయనగరం, అల్లూరి సీతారామరాజు, ఏలూరు, ఎన్టీఆర్‌, గుంటూరు, పల్నాడు, చిత్తూరు, అన్నమయ్య, కడప జిల్లాల్లో అక్కడక్కడా భారీవర్షాలు కురుస్తాయంటున్నారు.

ఈ నెల 4న కోస్తా, రాయలసీమల్లో విస్తారంగా, అక్కడక్కడా భారీ నుంచి అతిభారీ వర్షాలు కురుస్తాయి. తిరుపతి, నెల్లూరు, ప్రకాశం, బాపట్ల, కృష్ణా, తూర్పు, పశ్చిమ గోదావరి, కోనసీమ, కాకినాడ, అనకాపల్లి, అల్లూరి సీతారామరాజు జిల్లాల్లో అక్కడక్కడా కుంభవృష్టిగా వానలు పడతాయంటున్నారు. ఈనెల 5న కోస్తా, రాయలసీమల్లో అనేకచోట్ల వర్షాలు.. కోస్తాలో అక్కడక్కడా భారీ నుంచి అతిభారీగా.. ఉత్తర కోస్తాలో పలుచోట్ల కుంభవృష్టిగా వర్షాలు కురుస్తాయంటున్నారు. కోస్తాలో శనివారం నుంచి గాలుల ఉధృతి పెరగనుంది.. వాయుగుండం ప్రభావంతో సముద్రం అల్లకల్లోలంగా ఉందంటున్నారు అధికారులు. మత్స్యకారులు శనివారంనుంచి ఈనెల ఆరో తేదీ వరకు చేపల వేటకు వెళ్లరాదని వాతావరణ శాఖ హెచ్చరించింది. కోస్తాలో అన్ని ఓడరేవుల్లో ఒకటో నంబరు భద్రతా సూచిక ఎగురవేయనున్నారు.

తుఫాన్‌ హెచ్చరికలతో వరి రైతుల్లో ఆందోళన మొదలైంది. వరి కోతలు, కుప్పల దశల్లో ఉంది. దీంతో వారు ఏం చేయాలో తెలియని పరిస్థితుల్లో ఉన్నారు. ఇప్పటికే కొన్నిచోట్ల కోసిన వరిపంటను కుప్పలుగా వేసి భద్రపరిచే పనిలో నిమగ్నమయ్యారు. రైతులు పొలాల్లో పంటను కుప్పలుగా వేశారు. మరికొందరు కోత కోసిన పంటను ఆరబెట్టారు. రైతులు వరికుప్పలపై టార్పాన్లు కప్పారు. కొన్నిచోట్ల నూర్పిడి చేసిన ధాన్యాన్ని బస్తాల్లో భద్రపరిచారు. ఈ సమయంలో వర్షం కురిస్తే.. పంటపై పూర్తిగా ఆశలు వదులుకోవాల్సిందేనని రైతులు ఆవేదన వ్యక్తం చేస్తున్నారు.