ముగ్గురు దర్జాగా పెళ్లికి వచ్చారు.. కొద్దిసేపటికే పెళ్లి వేడుకలో చోరీ
Andhra Pradesh Telugu | Suryaa Desk | Published : Sun, Dec 03, 2023, 06:21 PM
తిరుపతి జిల్లా తిరుచానూరులోని ప్రైవేటు కల్యాణ మండపంలో సినీఫక్కీలో చోరీ జరిగింది. ఓయువకుడు, ఇద్దరు మహిళలు పెళ్లికి హాజరయ్యారు. వేదిక వద్ద బెంగళూరుకు చెందిన విద్య అనే మహిళ తన పర్సును ఉంచగానే అదను చూసుకుని ఓమహిళ దాని తీసుకుని అక్కడి నుంచి జారుకుంది. ఇందుకు సంబంధించిన దృశ్యాలు సీసీ కెమెరాల్లో నమోదయ్యాయి. 70 గ్రాముల బంగారు, రూ.40 వేల నగదు, మొబైల్‌ఫోన్‌ చోరీకి గురైనట్లు బాధితురాలు తిరుచానూరు పోలీసులకు ఫిర్యాదు చేశారు. సీసీ కెమెరాల్లో నమోదైన ముగ్గురు దొంగల కోసం పోలీసులు గాలిస్తున్నారు. ఇద్దరు గుర్తు తెలియని మహిళలు ఓ కుర్రాడితో పెళ్ళికి అతిథలుగా వచ్చినట్లు సీసీ కెమెరాలో గుర్తించారు.
పుత్తూరు మండలం పరమేశ్వరమంగళంలో మహిళపై దాడి ఘటన కలకలంరేపింది. స్థానికులైన దాసరి మునస్వామి నాయుడు భార్య నాగరత్నమ్మ శనివారం సాయంత్రం ఇంట్లోని వంట గదిలో టీ పెడుతుండగా ఇద్దరు గుర్తుతెలియని వ్యక్తులు బైక్‌పై వచ్చారు. లోపలకు వచ్చి ఆమె ముఖం, మెడపై గాయపరిచి డైనింగ్‌ టేబుల్‌కు కట్టేశారు. ఆపై ఆమె మెడలో ఉన్న ఆరు సవర్ల బంగారం గొలుసు ఎత్తుకెళ్లారు. అప్పుడే స్థానికులతో మాట్లాడి ఇంటికి వచ్చిన భర్త.. భార్య అపస్మారక స్థితిలో ఉండటాన్ని చూసి కేకలు వేయడంతో గ్రామస్థులు పోలీసులకు సమాచారమిచ్చారు. అనంతరం ఆమెకు ప్రభుత్వాస్పత్రిలో ప్రథమ చికిత్స చేసి చెన్నైకు తరలించారు. పోలీసులు కేసు నమోదు చేశారు.
|
|