లోకేష్ పాదయాత్రకు ఈ నెలలోనే ముగింపు.. ఆ రెండు జిల్లాల్లో యువగళం లేనట్లేనా
Andhra Pradesh Telugu | Suryaa Desk | Published : Sun, Dec 03, 2023, 06:33 PM
టీడీపీ జాతీయ ప్రధాన కార్యదర్శి నారా లోకేష్ యువగళం పాదయాత్ర ఉమ్మడి విశాఖ జిల్లాలో ఈ నెల 7న ప్రారంభం కానుంది. పాదయాత్ర నిర్వహణకు సంబంధించిన అంశాలపై చర్చించేందుకు టీడీపీ నేతలు విశాఖ పార్టీ కార్యాలయంలో సమావేశమయ్యారు. లోకేష్ పాదయాత్ర ఉమ్మడి విశాఖ జిల్లాలోకి ఈ నెల 6న రాత్రి ప్రవేశిస్తుందని.. ఆ రాత్రి పాయకరావుపేటలో బస చేస్తారని పల్లా శ్రీనివాసరావు తెలిపారు. ఈ నెల 7వ తేదీ పాయకరావుపేట నుంచి మొదలై పలు నియోజకవర్గాల మీదుగా కొనసాగుతుందన్నారు. ఈ నెల 17న భీమిలి నియోజకవర్గ పరిధి రాజాపులోవ వద్ద యువగళం ముగుస్తుందన్నారు. ఈ సందర్భంగా భారీ బహిరంగ సభ నిర్వహిస్తామని చెప్పారు. ఈ సభకు టీడీపీ అధినేత చంద్రబాబు, జనసేన అధినేత పవన్ కల్యాణ్‌లతోపాటు ఇరు పార్టీల ముఖ్య నేతలు హాజరవుతారని తెలిపారు.
ఆరో తేదీ సాయంత్రం పాదయాత్ర అనకాపల్లి జిల్లా పాయకరావుపేటలో ప్రవేశిస్తుంది. ఆ జిల్లాలో పాదయాత్ర ముగించుకుని ఈనెల 12వ తేదీన లోకేష్ పెందుర్తి నియోజకవర్గంలోని భరణికాన వద్ద విశాఖ జిల్లాలో ప్రవేశిస్తారు. అక్కడ నుంచి గాజువాక, విశాఖ పశ్చిమ, దక్షిణ, ఉత్తరం, తూర్పు నియోజకవర్గాల మీదుగా 17న భీమిలి నియోజకవర్గంలోకి అడుగుపెడతారని అంటున్నారు. ముగింపు సభకు భారీగా జనం హాజరయ్యే అవకాశం ఉండడంతో టీడీపీ నేతలు తగిన స్థలం చూస్తున్నారు. రుషికొండ ఐటీ సెజ్‌కు ఆనుకుని ఎస్‌సీసీకి ఇచ్చిన భూములు, కొమ్మాదిలోని ఓజోన్‌ వ్యాలీ, జిల్లా శివారు రాజాపులోవతోపాటు ఆనందపురం ప్రాంతంలో మరో రెండు ప్రాంతాలను పరిశీలిస్తున్నారు.
|
|