ఇప్పటివరకు రూ.351 కోట్లు.. తాజాగా బంగారం, వజ్రాలు, కీలక పత్రాలు.. కాంగ్రెస్ ఎంపీకి బిగ్ షాక్

కాంగ్రెస్ రాజ్యసభ సభ్యుడు ధీరజ్ ప్రసాద్ సాహు. ఇప్పుడు ఈ పేరు గత కొన్ని రోజులుగా దేశవ్యాప్తంగా మారుమోగిపోతోంది. ఐటీ శాఖ సోదాల్లో వందల కోట్ల డబ్బు కట్టలు బయటపడటంతో ఈ కేసు బాగా వైరల్ అయింది. ఈ క్రమంలోనే దాదాపు వారం రోజులుగా ధీరజ్ ప్రసాద్ సాహు.. ఇళ్లు, కార్యాలయాలు.. ఆయన అనుచరుల ఇళ్లపైనా, ఆయన పార్ట్‌నర్‌గా ఉన్న బౌధ్ డిస్టిలరీ ప్రైవేట్ లిమిటెడ్‌కు చెందిన వివిధ ప్రాంతాల్లో ఐటీ అధికారులు తనిఖీలు జరుపుతున్నారు. ఇక ఈ ఐటీ సోదాలు బీజేపీ, కాంగ్రెస్ మధ్య తీవ్ర మాటల యుద్ధానికి కారణం అయ్యాయి.

కాంగ్రెస్ ఎంపీ ధీరజ్ ప్రసాద్ సాహూ ఆస్తులు ఎంత లెక్కపెట్టినా ఇంకా పెరుగుతూనే ఉన్నాయి. ఆయన వ్యాపార భాగస్వాములకు సంబంధించిన ఆస్తులపై ఆదాయపు పన్ను శాఖ అధికారులు దాడులు చేస్తూనే ఉన్నారు. ఈ క్రమంలోనే ఒకవైపు జార్ఖండ్‌ రాజధాని రాంచీలోని సుశీలా నికేతన్ నివాసంలో తనిఖీలు కొనసాగుతుండగానే.. మరోవైపు.. ఒడిశాలో వారికి సంబంధించిన డిస్టిలరీ కంపెనీ ఆస్తులపై కూడా దాడులు చేస్తూనే ఉన్నారు. బోలంగీర్‌లోని టిట్లాగఢ్ పట్టణంలోని ఓ ప్రైవేట్ బ్యాంకుకు చెందిన 3 లాకర్ల నుంచి భారీగా ఆభరణాలు స్వాధీనం చేసుకున్నారు. ఈ తనిఖీల్లో 40 బంగారు బిస్కెట్లు, వజ్రాలు పొదిగిన బంగారు ఆభరణాలు, పలు కీలక పత్రాలను ఐటీ అధికారులు స్వాధీనం చేసుకున్నారు.

ఒడిశాలోని వివిధ ప్రాంతాల్లోని బ్యాంక్ అధికారులు ఆదివారం రాత్రి బౌద్ డిస్టిలరీ ప్రైవేట్ లిమిటెడ్‌కు చెందిన నిషేధిత కంట్రీ లిక్కర్ షాపులో స్వాధీనం చేసుకున్న రూ.351 కోట్ల నగదు లెక్కింపును ఆరు రోజులకు పూర్తి చేశారు. ఈ డబ్బుకు కాంగ్రెస్ ఎంపీ ధీరజ్ ప్రసాద్ సాహుకు సంబంధాలు ఉన్నాయని ఐటీ శాఖ అధికారులు చెబుతున్నారు. దేశంలో ఏ దర్యాప్తు సంస్థ చేసిన తనిఖీల్లో ఇంత భారీగా నగదు స్వాధీనం కాలేదని పేర్కొన్నారు. బోలంగీర్‌లోని టిట్లాగఢ్ పట్టణంలోని బ్యాంకు లాకర్‌ తనిఖీ చేసిన 3 రోజుల తర్వాత అతని ఇంట్లో రూ. 8 కోట్లను ఐటీ అధికారులు స్వాధీనం చేసుకున్నారు. బౌద్ డిస్టిలరీస్ ప్రైవేట్ లిమిటెడ్ గ్రూప్ కంపెనీ అయిన బల్దేవ్ సాహు & గ్రూప్ ఆఫ్ కంపెనీస్‌తో కాంగ్రెస్ ఎంపీ ధీరజ్ ప్రసాద్ సాహుకు సన్నిహిత వ్యాపార సంబంధాలు ఉన్నాయని పేర్కొన్నారు. ఒక లాకర్‌లో ముఖ్యమైన డాక్యుమెంట్‌లతో కూడిన 2 సూట్‌కేసులను స్వాధీనం చేసుకున్న ఐటీ అధికారులు వాటిని పరిశీలిస్తున్నారు. అక్కడే ఉన్న మరో 2 లాకర్ల నుంచి 40 బంగారు బిస్కెట్లు, వజ్రాలు పొదిగిన బంగారు ఆభరణాలు కూడా స్వాధీనం చేసుకున్నారు.