సోషల్ మీడియాలో పరిచయం.. పక్కా ప్రణాళికతోనే పార్లమెంట్‌పై దాడి, అసలు ఎందుకిలా చేశారు

దేశంలోని ప్రజాస్వామ్య దేవాలయంగా భావించే పార్లమెంటులోకి మరీ ముఖ్యంగా దేశవ్యాప్తంగా ప్రాతినిథ్యం వహించే ఎంపీలు ఉన్న లోక్‌సభలోకి ఆగంతకులు చొరబడటం తీవ్ర చర్చనీయాంశంగా మారింది. కలర్ పొగ వచ్చే గ్యాస్‌ గొట్టాలతో లోపలికి ప్రవేశించిన ఇద్దరు దుండగులు లోక్‌సభలోకి వెళ్లడం తీవ్ర కలకలం రేపింది. మరో ఇద్దరు దుండగులు పార్లమెంటు ఆవరణలో నినాదాలు చేస్తూ నానా హంగామా సృష్టించారు. సభా కార్యకలాపాలు కొనసాగుతుండగానే ఒక దుండగుడు లోపలికి వెళ్లి గ్యాలరీల నుంచి కిందికి దూకుతూ నినాదాలు చేశాడు. మరో వ్యక్తి రంగు రంగుల పొగను వదలడంతో అక్కడ ఉన్న ఎంపీలు అంతా ఒక్కసారిగా షాక్ అయ్యారు. లోపలికి వెళ్లిన వారిని ఎంపీలు పట్టుకోగా.. బయట ఉన్న వారిని భద్రతా బలగాలు అదుపులోకి తీసుకున్నాయి.

లోక్‌సభ లోపల పట్టుబడిన వారు కర్ణాటకకు చెందిన సాగర్‌ శర్మ, దేవ్‌రాజ్‌లుగా భద్రతా బలగాలు గుర్తించారు. వీరి వయసు 20 నుంచి 25 ఏళ్ల లోపు మాత్రమే ఉంటుందని పేర్కొన్నారు. వీరిద్దరూ కర్ణాటకలోని మైసూర్‌కు చెందిన వారని ప్రాథమిక దర్యాప్తులో తేలింది. పార్లమెంటు బయట నిరసన చేసిన ఇద్దరు వ్యక్తుల్లో ఒక మహిళ కూడా ఉండడం గమనార్హం. కలర్ పొగను వెదజల్లుతూ ఆందోళనకు దిగిన వారిద్దరినీ ట్రాన్స్‌పోర్టు భవనం ముందు పోలీసులు అదుపులోకి తీసుకున్నారు. ఈ ఘటనలో పాల్గొన్న మహిళ హర్యానాలోని హిసార్‌కు చెందిన 42 ఏళ్ల నీలమ్ కౌర్ కాగా, మరో వ్యక్తి మహారాష్ట్ర లాతూర్‌కు చెందిన 25 ఏళ్ల అమోల్‌ శిండేగా పోలీసులు గుర్తించారు. పార్లమెంటు లోపల, బయట జరిగిన ఈ ఘటనలకు సంబంధించి ఢిల్లీ పోలీసుల ప్రత్యేక విభాగం దర్యాప్తు చేస్తుందని అధికారులు వెల్లడించారు.

అయితే ఈ నలుగురు దుండగులకు సోషల్ మీడియా ద్వారా పరిచయం ఉన్నట్లు పోలీసులు అనుమానిస్తున్నారు. పార్లమెంటులో హల్‌చల్ చేయాలనే ఉద్దేశంతోనే ఈ ఘటనలకు పాల్పడినట్లు అభిప్రాయం వ్యక్తం చేస్తున్నారు. ప్రభుత్వానికి, ప్రభుత్వ విధానాలకు వ్యతిరేకంగా పలు అంశాలపై దుండగులు నినాదాలు చేసినట్లు ప్రత్యక్ష సాక్ష్యులు చెప్పారు. అయితే లోపలికి చొరబడిన ఇద్దరు వ్యక్తులు మైసూర్ బీజేపీ ఎంపీ ప్రతాప్ సిఫార్సు చేసిన పాస్‌తోనే పార్లమెంటు లోపలికి చేరినట్లు తెలుస్తోంది. అయితే కట్టుదిట్టమైన భద్రతా వ్యవస్థ, నిఘా వ్యవస్థ ఉన్నప్పటికీ పొగను వెదజల్లే గొట్టాలను లోనికి ఎలా తీసుకెళ్లారనే విషయం మిస్టరీగా మారింది. ఇది కచ్చితంగా భద్రతా వైఫల్యమేనని పలువురు ఎంపీలు అభిప్రాయపడుతున్నారు. ఇక పార్లమెంటు ఆవరణలో, లోక్‌సభలో జరిగిన భద్రతా వైఫల్యంపై చర్చించేందుకు లోక్‌సభ స్పీకర్ ఓం బిర్లా అఖిల పక్ష సమావేశం నిర్వహించనున్నట్లు తెలిపారు. జరిగిన ఘటనపై సమగ్ర దర్యాప్తు జరుగుతోందని.. దర్యాప్తు బాధ్యత తనదేనని ఎంపీలకు హామీ ఇచ్చారు.