మోడ్రన్ హరిదాసు 2.0.. వీళ్లూ అప్డేట్ అయ్యారుగా
Andhra Pradesh Telugu | Suryaa Desk | Published : Sat, Dec 23, 2023, 09:13 PM
ఆంధ్రప్రదేశ్‌లో సంక్రాంతి సందడి మొదలైంది. గ్రామాల్లో ముందే హరిదాసులు ఇంటింటికీ తిరుగుతూ కీర్తనలు పాడుతూ.. పల్లెల్లో పండుగ వాతావరణం తెస్తున్నారు. తలపై అక్షయ పాత్ర, ఒక చేతిలో భజన చిడతలు, మరో చేత్తో తంబూర మీటుతూ గోవింద నామస్మరణతో ప్రతి ఇంటికి వెళ్లి గేయాలు, కీర్తనలు పాడుతుంటారు. అప్పటి వరకూ లేని పండుగ వాతావరణం, ఆధ్యాత్మికత హరిదాసులు, గంగిరెద్దుల రాకతో వచ్చేస్తుందంటే అతిశయోక్తి కాదమో. అయితే ఒకప్పుడు హరిదాసులు ఇలాగే ఉండేవారు. కానీ కాలం మారిపోయింది కదా.. హరిదాసులు కూడా అప్డేట్ అయ్యారు. ఫీచర్‌ ఫోన్ల నుంచి జనం స్మార్ట్‌ఫోన్లకు మారినట్లు.. స్మార్ట్‌ ఫోన్లలో ఆండ్రాయిడ్ వెర్షన్ అప్డేట్ అయినట్లు హరిదాసులు కూడా కాలానుగుణంగా తమ వెర్షన్ మార్చేశారు. ఒకప్పట్లా ఇంటింటికీ తిరుగుతూ కీర్తనలు పాడుతూ భిక్ష స్వీకరించడం మానేస్తున్నారు. ట్రెండ్‌కు తగినట్లు బైక్‌ల మీద వెళ్తూ భిక్ష స్వీకరించడం మొదలెట్టారు. అప్పట్లో వారి నోటి నుంచి గోవింద నామస్మరణ జాలువారితే.. ఇప్పుడు వారి బండికి కట్టిన స్పీకర్ నుంచి అదే గోవింద నామస్మరణ మోగుతోంది. ఇలాంటి అప్‌డేటెడ్ హరిదాసు వీడియో ఒకటి ఇప్పుడు సోషల్ మీడియాలో వైరల్ అవుతోంది. ఏదేమైనా మారుతున్న సాంకేతికత, కాలం తెస్తున్న మార్పు జీవనశైలిని సులభతరం చేయడమే కాదు.. సంప్రదాయాలను సైతం ఇలా మార్చేస్తోంది అని అంటున్నారు ఈ వీడియో చూసిన జనాలు. అయితే అన్నిచోట్లా ఇలాగే ఉందని చెప్పలేం కానీ.. నెమ్మదిగా ఈ రకంగా ట్రెండ్ మారితే భవిష్యత్తులో హరిదాసులంతా ఇలాగే కనిపిస్తారేమో చూడాలి.
|
|