దేశంలో కొవిడ్ పంజా.. 4100 దాటిన యాక్టివ్ కేసులు.. ముగ్గురు మృతి

దేశంలో కరోనా వైరస్‌ వ్యాప్తి కొనసాగుతోంది. కొన్ని రోజుల క్రితం వందలోపు నమోదైన రోజు వారీ కేసుల సంఖ్యలో భారీగా పెరుగుదల కనిపిస్తోంది. నిత్యం వందల సంఖ్యలో కొత్త కొవిడ్ కేసులు బయటపడుతున్నాయి. దీంతో దేశంలో యాక్టివ్ కేసుల సంఖ్య అమాంతం పెరిగిపోతోంది. గడిచిన 24 గంటల్లో దేశ వ్యాప్తంగా 412 కరోనా కేసులు వెలుగు చూశాయి. ఇక ప్రస్తుతం తెలంగాణలో 55, ఆంధ్రప్రదేశ్‌లో 29 యాక్టివ్ కేసులు ఉన్నాయి. ఇక దేశంలో జేఎన్ 1 వేరియంట్ కేసులు భారీగా పెరుగుతుండటం తీవ్ర ఆందోళన కలిగిస్తోంది.

సోమవారం ఉదయం 8 గంటల నుంచి మంగళవారం ఉదయం 8 గంటల వరకూ 24 గంటల వ్యవధిలో దేశంలో కొత్తగా 116 కరోనా కేసులు బయట పడినట్లు కేంద్ర వైద్య ఆరోగ్య శాఖ గణాంకాలు వెలువరించింది. మరో ముగ్గురు వైరస్ ధాటికి బలయ్యారని పేర్కొంది. ఈ కొత్త కేసులతో కలిపి దేశంలో యాక్టివ్‌ కేసుల సంఖ్య 4170 కి చేరినట్లు కేంద్రం తెలిపింది. అయితే చనిపోయిన ముగ్గురు కర్ణాటక రాష్ట్రానికి చెందిన వారే కావడం ఆ రాష్ట్రంలో కరోనా టెర్రర్ నెలకొంది. ఈ 3 మరణాలతో కలిపి దేశవ్యాప్తంగా కొవిడ్ మృతుల సంఖ్య 5,33,337కి ఎగబాకింది. ఇక దేశవ్యాప్తంగా 220.67 కోట్ల కరోనా వ్యాక్సిన్‌ డోసులు పంపిణీ చేసినట్లు కేంద్ర వైద్య ఆరోగ్య శాఖ వెల్లడించింది.

మరోవైపు ప్రస్తుతం దేశంలో కరోనా కేసులు పెరుగుదలకు కొవిడ్‌ సబ్‌ వేరియంట్‌ జేఎన్‌ 1 కారణమని తెలుస్తోంది. దేశవ్యాప్తంగా జేఎన్‌ 1 కేసులు పెరుగుతున్నాయి. ఆదివారం వరకు దేశంలో 64 జేఎన్ 1 వేరియంట్ కేసులు నమోదైనట్లు అధికార వర్గాలు తెలిపాయి. దేశంలో కొత్త వేరియంట్, కరోనా కేసులు పెరుగుతున్న దృష్ట్యా ప్రజలు అప్రమత్తంగా ఉండాలని కేంద్ర, రాష్ట్ర ప్రభుత్వాలు సూచిస్తున్నాయి. వీటిలో అత్యధికంగా గోవాలో 34 కేసులు వెలుగుచూశాయి. మహారాష్ట్రలో 9, కర్ణాటక 8, కేరళ 6, తమిళనాడు 4, తెలంగాణలో 2 కేసులు నమోదయ్యాయి.

ముఖ్యంగా ఉత్తరప్రదేశ్, కేరళలో ఈ జేఎన్‌ 1 వేరియంట్ కేసులు వేగంగా వ్యాప్తి చెందుతున్నట్లు అధికారులు తెలిపారు. ఈ క్రమంలోనే ఆర్టీపీసీఆర్ పరీక్షలను పెంచాలని రాష్ట్రాలను కేంద్రం ఆదేశించింది. ఈ క్రమంలోనే కేంద్ర ఆరోగ్యశాఖ మంత్రి మన్‌సుఖ్ మాండవీయ అధ్యక్షతన మంగళవారం జరగనున్న ఉన్నతస్థాయి సమీక్షా సమావేశం నిర్వహించనున్నారు. ఈ సమావేశంలో కరోనా మహమ్మారి కట్టడికి తీసుకోవాల్సిన జాగ్రత్తలపై దిశ నిర్దేశం చేయనున్నారు.