4 ఏళ్లుగా తాళం వేసి ఉన్న ఇంట్లో 5 అస్థిపంజరాలు లభ్యం.. అంతా ఒకే కుటుంబం

ఓ హత్య కేసులో యావజ్జీవిత ఖైదుపడి జైల్లో ఉన్న తన భర్త ద్వారా బిడ్డలను కనే అవకాశం కల్పించాలన్న ఓ మహిళ అభ్యర్థనపై న్యాయస్థానం సానుకూలంగా స్పందించింది. తమ వంశాన్ని నిలబెట్టుకోవడం ప్రతి ఒక్కరి హక్కని, ఇది ఖైదీలకూ ఉంటుందని స్పష్టం చేసింది. ఈ మేరకు జీవిత ఖైదు అనుభవిస్తున్న వ్యక్తికి.. పిల్లలను కనేందుకు ఢిల్లీ హైకోర్టు నాలుగు వారాల పాటు పెరోల్‌ మంజూరు చేసింది. శిక్షపడి జైల్లో ఉన్నంత మాత్రాన దోషి తక్కువ పౌరుడిగా మారడని వ్యాఖ్యానించారు. తమ జీవితాలకు అర్థాన్ని ఇచ్చేలా సంతానం ఉండాలనేది ఓ వ్యక్తికి సహజమైన కోరిక అని పేర్కొంది.

కేసు వివరాల్లోకి వెళ్తే.. కుందన్ సింగ్ (41) తన స్నేహితుడి హత్య కేసులో దోషిగా నిర్దారణ అయి.. ప్రస్తుతం తిహార్‌ జైల్లో యావజ్జీవిత ఖైదు అనుభవిస్తున్నాడు. అయితే, తమ వంశాన్ని నిలబెట్టుకోడానికి భార్యతో పిల్లలను కనాలని ఉందని, అందుకు తనకు నాలుగు వారాల పెరోల్ మంజూరు చేయాలని కోరుతూ హోం శాఖకు సింగ్ అభ్యర్థన పెట్టుకున్నారు. అయితే, ఆయన అభ్యర్థనను హోంశాఖ డిప్యూటీ సెక్రెటరీ తోసిపుచ్చారు. దీంతో సింగ్ భార్య ఢిల్లీ హైకోర్టును ఆశ్రయించింది. ఈ పిటిషన్ విచారణ సందర్భంగా బిడ్డను కనాలోని కోరుకుంటున్నామని వాదించారు.

దీనిపై విచారణ చేపట్టిన జస్టిస్ స్వర్ణకాంత శర్మ.. భార్యాభర్తల వయసును పరిగణనలోకి తీసుకుని పెరోల్ మంజూరు చేయాలని నిర్ణయించారు. భార్య వయసు 38 ఏళ్లు, భర్త వయసు 41 ఏళ్లని...శిక్షా కాలం పూర్తయ్యాక ఆ దంపతులకు సంతానాన్ని పొందే వయసు మీరిపోతుందని అన్నారు. వయోభారం వారి ఉమ్మడి ఆకాంక్షకు అవరోధంగా మారుతుందని జస్టిస్‌ శర్మ అభిప్రాయపడ్డారు. భర్త ద్వారా సంతానాన్ని పొందాలన్న ఆ మహిళ హక్కును ప్రభుత్వం అడ్డుకోలేదని న్యాయమూర్తి స్పష్టం చేశారు.

కేసులోని పూర్వాపరాలను పరిశీలించిన తర్వాత ఖైదీకి తన వంశాన్ని నిలుపుకొనే అవకాశాన్ని కల్పిస్తున్నట్లు స్పష్టం చేశారు. దాంపత్య జీవనం కోసం అనుమతివ్వడం లేదని, వంశాన్ని నిలబెట్టుకోవాలన్న భార్య ఆకాంక్ష, హక్కును గౌరవిస్తున్నట్లు పేర్కొన్నారు. ఖైదీ ఇప్పటికే 14 ఏళ్లుగా జైలులో ఉన్న విషయాన్నీ ప్రస్తావించిన న్యాయమూర్తి... పెరోల్‌ కోసం రూ.20 వేల వ్యక్తిగత బాండును సమర్పించి, ఒకరి పూచీకత్తు ఇవ్వాలని షరతు విధించారు. ఈ మేరకు డిసెంబరు 22న తీర్పు వెలువరించారు.

‘ఖైదీలకు ప్రాథమిక హక్కులు లేవని భారత్‌లోని న్యాయవ్యవస్థ ఎప్పుడూ మొండిగా నిరాకరించదు.. ఈ కోర్టు సర్వోన్నత న్యాయస్థానం న్యాయమూర్తులు అప్పగించిన అదే సంప్రదాయాన్ని అనుసరిస్తూ... రాజ్యాంగ హక్కులను సమర్థించడం.. కొత్త పరిస్థితులు, సవాళ్లతో సహా (మరియు) తల్లిదండ్రుల హక్కును కలిగి ఉండటానికి అనుకూలంగా ఉన్న వ్యాఖ్యల ఉద్దేశాన్ని గౌరవప్రదంగా తీసుకుంటుంది. సంతానోత్పత్తి అనేది ఓ కేసు విచిత్రమైన పరిస్థితులలో దోషికి ఉన్న ప్రాథమిక హక్కు’ అని వ్యాఖ్యానించింది.

తన స్నేహితుడ్ని 2007లో దారుణంగా హత్య చేసిన కుందన్ సింగ్.. శవాన్ని ముక్కలుగా నరికి వాటి ఓ బ్యాగులో పెట్టి ఢిల్లీలోని లడో సరాయ్ బస్ స్టాండ్ సమీపంలోని అడవుల్లో పడేశాడు. ఈ ఘటనపై కేసు నమోదుచేసి దర్యాప్తు చేపట్టిన పోలీసులు.. హత్యకు పాల్పడింది కుందన్‌గా గుర్తించారు. విచారణలో అతడే హత్య చేసినట్టు నిర్దారణ అయ్యింది. దీంతో న్యాయస్థానం 2014లో అతడ్ని దోషిగా నిర్దారించింది. దీనిపై డివిజన్ బెంచ్‌కు వెళ్లగా.. ఆ తీర్పును 2015లో సమర్దించింది.