ఏపీలో రైలు ప్రయాణికులకు అలర్ట్.. ఆలస్యంగా నడుస్తున్న రైళ్లు, కారణం ఇదే!

పొగమంచు ప్రభావంతో పలు రైళ్లు ఆలస్యంగా నడుస్తున్నాయి. ముఖ్యంగా ఉత్తర భారతదేశంలోని ఢిల్లీ పరిసర ప్రాంతాల నుంచి వచ్చే న్యూఢిల్లీ-విశాఖ ఏపీ ఎక్స్‌ప్రెస్‌ (20806), నిజాముద్దీన్‌-విశాఖ సమతా ఎక్స్‌ప్రెస్‌ (12808), నిజాముద్దీన్‌-విశాఖ స్వర్ణ జయంతి ఎక్స్‌ప్రెస్‌ (1204) రైళ్లు పది గంటలకుపైగా ఆలస్యంగా నడుస్తున్నాయి. పొగ మంచు ప్రభావం ఏపీ ఎక్స్‌ప్రెస్‌పై ఎక్కువగా కనిపిస్తోంది. విశాఖ నుంచి బయలుదేరే రైలును రీ షెడ్యూల్‌ చేసి నడిపించాల్సి వస్తోంది. న్యూఢిల్లీ నుంచి విశాఖ వచ్చే ఏపీ ఎక్స్‌ప్రెస్‌ (20806) శుక్రవారం దాదాపు 16 గంటలు ఆలస్యంగా నడిచింది. నిర్ణీత సమయం ప్రకారం ఈ రైలు ఉదయం 4.10 గంటలకు విశాఖ చేరాల్సి ఉండగా.. రాత్రి 10.00 గంటల ప్రాంతంలో విశాఖ స్టేషన్‌కు చేరింది. దీంతో శుక్రవారం రాత్రి 11.00 గంటలకు విశాఖ నుంచి న్యూఢిల్లీ బయలుదేరాల్సిన 20805 నంబరు గల రైలును శనివారం ఉదయం 9.00 గంటలకు బయలుదేరే విధంగా రీ షెడ్యూల్‌ చేశారు.

నిజాముద్దీన్‌ నుంచి విశాఖ వచ్చే సమతా ఎక్స్‌ప్రెస్‌ (12808) శుక్రవారం దాదాపు ఆరు గంటలు ఆలస్యంగా నడిచింది. నిర్ణీత సమయం ప్రకారం...ఈ రైలు సాయంత్రం 4.30 గంటలకు రావాల్సి ఉండగా.. రాత్రి 10.30 గంటల ప్రాంతంలో విశాఖపట్నం చేరుకుంది. నిజాముద్దీన్‌ నుంచి స్వర్ణ జయంతి ఎక్స్‌ప్రెస్‌ (12804) నిర్ణీత సమయం ప్రకారం మధ్యాహ్నం 2.15 గంటలకు చేరాల్సి ఉండగా.. రాత్రి 9.30 గంటలకు విశాఖకు వచ్చింది. సికింద్రాబాద్‌ నుంచి విశాఖ వచ్చే రైళ్లపై కూడా పొగ మంచు ప్రభావం కనిపిస్తోంది. దీంతో గరీబ్‌రధ్‌ ఎక్స్‌ప్రెస్‌ (12739), విశాఖ ఎక్స్‌ప్రెస్‌ (17016) తదితర రైళ్లు రెండు రోజులుగా సుమారు గంటకుపైగా ఆలస్యంగా చేరుతున్నాయి. పొగ మంచు కారణంగా విశాఖ-న్యూఢిల్లీ చుటుపక్కల ప్రాంతాల మధ్య రాకపోకలు సాగించే ఏపీ ఎక్స్‌ప్రెస్‌ (20805/20806), సమతా (12807/ 12808), స్వర్ణ జయంతి (12803/12804), విశాఖ-అమృతసర్‌-విశాఖ హిరాకుడ్‌ ఎక్స్‌ప్రెస్‌ (20807/20808) రైళ్లు మరికొద్ది రోజులు ఆలస్యంగా నడిచే అవకాశం ఉందంటున్నారు.

మరోవైపు విజయవాడ రైల్వే డివిజన్‌ పరిధిలో ఏకంగా 20 రైల్వేస్టేషన్లు ఐఎస్వో 14001-2015 సర్టిఫికెట్లను సాధించాయి. ప్రయాణికులకు అత్యున్నత నాణ్యతా ప్రమాణాలను అందిస్తున్నందుకు, సౌకర్యాలు, సదుపాయాలు ఇతర అనేక విభాగాలలో ప్రపంచస్థాయి ప్రమాణాలను పాటిస్తున్నందుకు 20 రైల్వే స్టేషన్లకు ఐఎస్వో సర్టిఫికెట్‌ లభించింది. మొదటి వరుసలో విజయవాడ ఏ 1 రైల్వేస్టేషన్‌ నిలిచింది. గూడూరు, నెల్లూరు, ఒంగోలు, చీరాల, తెనాలి, ఏలూరు, తాడేపల్లిగూడెం, నిడదవోలు, రాజమండ్రి, సామర్లకోట, అన్నవరం, తుని, అనకాపల్లి, గుడివాడ, భీమవరం టౌన్‌, భీమవరం జంక్షన్‌, నరసాపూర్‌, కాకినాడ పోర్ట్‌టౌన్‌ రైల్వేస్టేషన్లు ఐఎస్వో 14001ను సాధించాయి. మూడేళ్ల పాటు 20 రైల్వేస్టేషన్లు సర్టిఫికేషన్‌ను కలిగి ఉంటాయి. ఆ తర్వాత సర్టిఫి కేషన్‌ రెన్యువల్‌ చేయాలంటే మళ్లీ ప్రమాణాలను పరిశీలిస్తారు. ప్రణాళికలు, అంతర్గత ఆడిట్‌, హౌస్ ‌కీపింగ్‌, ప్రయాణికులకు సౌక ర్యాలు, రైల్వేస్టేషన్లలో పరిశుభ్రత, కాలుష్య నియంత్రణ చర్యలు, ప్యాసింజర్స్‌ ఎమినిటీస్‌ వంటివి ప్రపంచ ప్రమాణాలకు అనుగుణంగా కల్పించటం వల్ల వీటికి ఐఎస్వో హోదా లభించింది.