నా హత్యకు కుట్ర జరుగుతోంది.. ఏదైనా జరిగితే ఆ ముగ్గురిదే బాధ్యత: టీడీపీ నేత బీటెక్ రవి

టీడీపీ మాజీ ఎమ్మెల్సీ బీటెక్ రవి సంచలన వ్యాఖ్యలు చేశారు. తనను అంతమొందించే కుట్ర జరుగుతోందని.. ముందుగా ప్రభుత్వం తనకు గన్‌మెన్‌ను తొలగించిందన్నారు. తన ప్రాణాలకు హాని జరిగితే సీఎం జగన్‌, ఆయన భార్య భారతి, కడప ఎంపీ అవినాష్‌రెడ్డిలదే బాధ్యతని హెచ్చరించారు. ఉమ్మడి రాష్ట్రంలో వైఎస్సార్‌, కిరణ్‌కుమార్‌రెడ్డి సీఎంలుగా ఉన్నప్పుడు కూడా తనకు గన్‌మెన్‌ రక్షణ ఉందని.. 15 ఏళ్లుగా ఉన్న సౌకర్యాన్ని ఉన్నట్టుండి ఎందుకు తొలగించారని ప్రశ్నించారు. ముఖ్యమంత్రి వైఎస్ జగన్‌ ఇటీవల పులివెందుల నియోజకవర్గం సింహాద్రిపురానికి రాగా 3 వేల మంది పోలీసులతో రక్షణ కల్పించారన్నారు. వచ్చే ఎన్నికల్లో తాను సీఎంపై పోటీ పడుతున్నానని.. పైగా మాజీ ఎమ్మెల్సీని అన్నారు. ప్రత్యర్థులతో ముప్పు ఉందని.. తనకు కేవలం 1+1 రక్షణ మాత్రమే ఉండగా ఇప్పుడు దాన్నీ తొలగించారన్నారు. తనకు శత్రుత్వం కేవలం రాజకీయంగానే ఉందని.. ఎన్నికల్లో ప్రచారం చేయకుండా అడ్డుకునేందుకే భద్రత తొలగించారని రవి ఆరోపించారు. తనపై పెట్టిన కేసుల్లో విచారణ నిమిత్తం వారానికోసారి వల్లూరు పోలీస్‌స్టేషన్‌కు వెళ్లాల్సి ఉంటుందన్నారు. అక్కడికి కాన్వాయ్‌ అనుమతి లేదని.. ఒకే వాహనంలో వెళ్లాలంటే భద్రతాపరంగా ఇబ్బందులున్నాయన్నారు.

రవి ప్రాణానికి నేను హామీ అంటూ సీఎం జగన్‌ హామీ ఇస్తే నిర్భయంగా తిరుగుతాను అన్నారు. గన్‌మెన్‌ తొలగింపుపై న్యాయపోరాటం చేస్తానన్నారు బీటెక్ రవి. ఎమ్మెల్యేల స్థానాల మార్పు వైఎస్సార్‌సీపీ అంతర్గత వ్యవహారమే అయినప్పటికీ.. జగన్‌ మాత్రం పులివెందులలోనే పోటీ చేయాలన్నారు. ఆయనపై తాను పోటీ చేస్తానని.. ఒకవేళ జగన్‌ వేరే చోటుకు మారినా.. అక్కడ తనకు అవకాశం ఇవ్వాలని చంద్రబాబును కోరతానన్నారు. చారాణా కోడికి బారాణా మసాల అన్నట్లు.. సీఎం ప్రారంభించిన వాటికన్నా ఆయన పర్యటనకే ఎక్కువ ఖర్చు అయ్యిందన్నారు. గండికోట, పైడిపాలెంలో నీరున్నా పంటకాల్వలు నీరు లేక రైతులు కన్నీరు పెట్టుకుంటున్నారని.. ఇంత వరకు ఒక్క ఎకరాకు కూడా నీరు ఇవ్వలేని దుస్థితి జగన్‌ ప్రభుత్వానిది అంటూ ధ్వజమెత్తారు.