హైదరాబాద్ దమ్ బిర్యాని తిన్నాడు.. లక్షల ఖరీదైన కారు గెలిచాడు!

కస్టమర్లను ఆకర్షించి, వ్యాపారాన్ని పెంచుకోడానికి బట్టలు, నగలు దుకాణాలు, హోటళ్లు, రెస్టారెంట్లు రకరకాల స్కీమ్‌లు, లక్కీ డ్రాలు నిర్వహిస్తుంటారు. ఇలాంటి సందర్భాల్లో కొందర్ని అదృష్ట దేవత వరించి.. కార్లు, ఖరీదైన వస్తువులను గెలుచుకుంటారు. ఓ హోటల్‌లో బిర్యానీ తిన్న ఓ అదృష్టవంతుడు.. లక్షల ఖరీదైన కారును గెలుచుకున్నాడు. తిరుపతి నగరంలోని రోబో హోటల్లో నిర్వహించిన బిర్యాని లక్కీ డ్రా లో రాహుల్ అనే వ్యక్తి నిస్సాన్ మాగ్నట్ కారును సొంతం చేసుకున్నాడు. గత సెప్టెంబరులో రోబో హోటల్ వినూత్న స్కీం ప్రవేశపెట్టింది.

తమ హోటల్‌లో బిర్యాని తింటే.. కారు గెలుచుకోవచ్చని ప్రకటించింది. దీంతో ఆ హోటల్‌కు జనం క్యూకట్టారు. బిర్యానీ తిన్న ప్రతి ఒక్కరికి కూపన్ అందజేసింది. దాదాపు 23 వేలకుపైగా కూపన్లు చేరగా.. నూతన ఏడాదిని పురస్కరించుకొని ఆదివారం రాత్రి డ్రా తీశారు. హోటల్ అధినేత భరత్ కుమార్ రెడ్డి, నీలిమ దంపతులు హోటల్ ఆవరణలో ఏర్పాటుచేసిన లక్కీ డిప్‌లో తిరుపతికి చెందిన రాహుల్ అనే యువకుడు విజేతగా నిలిచాడు. దీంతో బహుమతిగా నిస్సాన్ మ్యాగ్నెట్ కారు‌ను ఆయన గెలుచుకున్నాడు.

హోటల్ అధినేత భరత్ కుమార్ రెడ్డి స్వయంగా విజేత రాహుల్‌కు ఫోన్ చేసి శుభాకాంక్షలు తెలిపారు. ఈ సందర్భంగా భరత్ కుమార్ రెడ్డి మీడియాతో మాట్లాడుతూ.. నగర వాసులకు మరింత చేరువ కావాలన్న ఉద్దేశంతో ఈ వినూత్న స్కీం ప్రవేశపెట్టామని చెప్పారు. తక్కువ ధరకు నాణ్యమైన వంటకాలు రోబో హోటల్లో అందిస్తున్నామని, ఇకపై ఇలాంటి వినూత్న స్కీములు మరిన్ని కొనసాగిస్తామని భరత్ కుమార్ రెడ్డి చెప్పారు. హోటల్ ప్రారంభించి రెండేళ్లు పూర్తయిన సందర్భంగా ఈ కంటెస్ట్ పెట్టినట్టు ఆయన పేర్కొన్నారు. హైదరాబాద్ దమ్ బిర్యానీ కంటెస్ట్‌ నిర్వహించామని, ఒక్కో బిర్యానీ రూ.275కు అమ్మినట్టు తెలిపారు.