రామమందిరానికి వ్యతిరేకంగా సుప్రీంలో పిటిషన్ వేసిన ముస్లింకు అయోధ్య ప్రారంభోత్సవానికి ఆహ్వానం

ఉత్తర్‌ప్రదేశ్ అయోధ్యలో ఈ నెల 22 వ తేదీన దివ్య రామ మందిర ప్రారంభోత్సవ కార్యక్రమం జరగనుంది. ఈ మహా వేడుక కోసం అయోధ్య నగరం సర్వాంగ సుందరంగా ముస్తాబు అవుతోంది. ఈ నెల 22 వ తేదీన అయోధ్యలో కొత్తగా నిర్మిస్తున్న రామ మందిర గర్భగుడిలో 51 అంగుళాల ఎత్తు ఉన్న బాల రాముడి విగ్రహాన్ని ప్రతిష్ఠించి ప్రాణ ప్రతిష్ఠ కార్యక్రమం చేపట్టనున్నారు. ఈ ఉత్సవం కోసం శ్రీరామ జన్మభూమి తీర్థ క్షేత్ర ట్రస్ట్ ఇప్పటికే అన్ని రకాల ఏర్పాట్లు చేస్తోంది. ఈ ప్రాణ ప్రతిష్ఠ కార్యక్రమానికి ప్రధాని నరేంద్ర మోదీ ముఖ్య అతిథిగా హాజరు కానున్నారు. ఈ క్రమంలోనే ఈ అఫూర్వ ఘట్టానికి పలువురు రాజకీయ, సినీ, క్రీడా, వ్యాపార రంగాలకు చెందిన ప్రముఖులు రానున్నారు.

అయోధ్యలో రామాలయం ప్రారంభోత్సవానికి దాదాపు 7 వేల మందికి ఆహ్వానాలు పంపించినట్లు శ్రీరామ జన్మభూమి తీర్థ క్షేత్ర ట్రస్ట్ వెల్లడించింది. అయితే తాజాగా ఇక్బాల్ అన్సారీ అనే ముస్లిం వ్యక్తికి కూడా అయోధ్య రాముడి ప్రాణ ప్రతిష్ఠ కార్యక్రమానికి హాజరు కావాలని ఆహ్వానం అందింది. దశాబ్దాలుగా వివాదంలో ఉన్న అయోధ్య రామ జన్మభూమి - బాబ్రీ మసీద్ స్థలం విషయంలో సుప్రీం కోర్టులో పిటిషన్ దాఖలు చేసిన వారిలో ఇక్బాల్ అన్సారీ కూడా ఒకరు కావడం గమనార్హం.

అయితే అయోధ్యలో రామ మందిర నిర్మాణానికి వ్యతిరేకంగా.. ఆ స్థలంలో బాబ్రీ మసీద్ నిర్మించాలని.. అందుకు అనుమతి ఇవ్వాలని బాబ్రీ మసీదు ఏర్పాటుకు మద్దతుగా సుప్రీంకోర్టులో ఈ ఇక్బాల్ అన్సారీ పిటిషన్ వేశారు. అయితే తాజాగా ఈ కేసులో సుప్రీం కోర్టు తీర్పుతో త్వరలో ప్రారంభం కానున్న అయోధ్య రామాలయ ప్రారంభోత్సవ కార్యక్రమానికి రావాల్సిందిగా శ్రీరామ జన్మభూమి తీర్థ క్షేత్ర ట్రస్ట్ కోరింది. అయితే గతంలో కూడా ఇక్బాల్‌ అన్సారీకి 2020 ఆగస్టు 5 వ తేదీన రామ మందిర భూమి పూజ కార్యక్రమానికి హాజరు కావాలని ఆలయ ట్రస్ట్ ఆహ్వానం పంపించింది.

ఇక్బాల్‌ అన్సారీ తండ్రి కూడా రామ జన్మభూమి - బాబ్రీ మసీదు వివాదంలో చాలా పోరాటం చేశారు. దీనిపై సుప్రీం కోర్టులో పిటిషన్‌ కూడా వేశారు. ఇక్బాల్ అన్సారీ తండ్రి 2016 లో 95 ఏళ్ల వయసులో మృతి చెందారు. ఆ తర్వాత అయోధ్య రామ జన్మభూమి - బాబ్రీ మసీదు వివాదం కేసులో ఇక్బాల్‌ అన్సారీ కూడా సుప్రీం కోర్టులో పిటిషన్‌ దాఖలు చేసి కీలకంగా వ్యవహరించారు. అయితే దశాబ్దాలుగా వివాదంలో ఉన్న అయోధ్య రామ జన్మభూమి వివాదంలో 2019 నవంబర్‌ 9 వ తేదీన సుప్రీం కోర్టు కీలక తీర్పును వెలువరించింది. వివాదంలో ఉన్న స్థలాన్ని రామ మందిర నిర్మాణానికి కేటాయిస్తూ.. దానికి దగ్గరలో మరో ప్రాంతంలో ముస్లింలకు 5 ఎకరాలకు స్థలాన్ని కేటాయించింది. కాగా.. ప్రస్తుతం అయోధ్య రామ మందిరం నిర్మాణం దాదాపుగా పూర్తి చేసుకుని ప్రారంభోత్సవానికి సిద్ధం కాగా.. బాబ్రీ మసీదు మాత్రం ఇంకా అనుకున్న స్థాయిలో నిర్మాణం జరగలేదు.

మరోవైపు.. ఇటీవల అయోధ్యలో ఎయిర్‌పోర్ట్, రైల్వే జంక్షన్ ప్రారంభోత్సవాల సందర్భంగా ప్రధానమంత్రి నరేంద్ర మోదీ పర్యటించారు. ఆ సమయంలో మోదీ రోడ్ షో నిర్వహించారు. ఆ రోడ్ షోలో పాల్గొన్న ప్రధానమంత్రికి ఇక్బాల్‌ అన్సారి పూలతో స్వాగతం పలకడం తీవ్ర చర్చకు దారి తీసింది. ఈ ఘటనపై స్పందించిన ఇక్బాల్‌ అన్సారీ.. ప్రధాని నరేంద్ర మోదీ తమ ప్రాంతానికి వచ్చారని.. ఈ సందర్బంగా ఆయన తమకు అతిథి.. తమ ప్రధానమంత్రి అని అందుకే స్వాగతం పలికానని వివరణ ఇచ్చారు.