హైజాక్‌కు గురైన నౌకను రక్షించిన నేవీ.. 15 మంది భారతీయులు సహా 21 మంది సేఫ్
national | Suryaa Desk | Published : Sat, Jan 06, 2024, 10:14 PM
సోమాలియా తీరానికి సమీపంలో భారతీయులు సహా 21 మంది ఉన్న హైజాక్‌కు గురైన కార్గో షిప్ ఎంవీ లీలా నార్ఫోక్ను భారత నావికాదళం విజయవంతంగా రక్షించింది. గురువారం రాత్రి ఎంవీ లీలా నార్ఫోక్ నౌక హైజాక్‌కు గురైన విషయం తెలిసిందే. నౌక హైజాక్‌కు గురైనట్టు సమాచారం అందుకున్న నేవీ రంగంలోకి దిగింది. యుద్ధనౌక, మారీటైమ్ పెట్రోల్ ఐఎన్ఎస్ చెన్నై యుద్ధ విమానం, హెలికాప్టర్లు, పీ-81 గస్తీ విమానం, దీర్ఘశ్రేణి ప్రిడేటర్ ఎంక్యూ9బీ డ్రోన్లతో ఆ నౌకను వెంబడించింది. నేవీకి చెందిన ఎలైట్ మెరైన్ కమాండోలు హైజాక్‌కు గురైన లైబీరియన్ జెండాతో కూడిన ఓడలోకి ప్రవేశించారు.
15 మంది భారతీయులతో సహా మొత్తం 21 మంది సిబ్బందిని రక్షించి, నౌకలోని ఇతర భాగాలలో సెర్చ్ ఆపరేషన్ నిర్వహించారు. ఈ ఆపరేషన్‌లో సముద్రపు దొంగల ఆచూకీ లభ్యం కాలేదని నేవీ ఓ ప్రకటన వెల్లడించింది. నౌకలోని 21 మంది క్షేమంగా బయటపడినట్టు నేవీ అధికార ప్రతినిధి కమాండర్ వివేక్ మధ్వాల్ తెలిపారు. ‘మార్కోల శానిటైజేషన్ ఆపరేషన్‌లో హైజాకర్లు లేరని నిర్ధారించారు.. భారత నౌకాదళం హెచ్చరికతో పైరట్స్ హైజాకింగ్ ప్రయత్నం బహుశా విరమించి ఉండొచ్చు. ఐఎన్ఎస్ చెన్నై ప్రస్తుతం ఎంవీ లీలా నార్ఫోక్ నౌక సమీపంలో ఉంది. లైబీరియా జెండాతో ఉన్న నౌక తదుపరి ప్రయాణానికి విద్యుత్ సరఫరా, ప్రొపల్షన్‌ పునరుద్ధరణకు మద్దతునిస్తోంది’ అని నేవీ ఒక ప్రకటనలో తెలిపింది. అయితే, హైజాకర్లు నౌకను నియంత్రణలోకి తీసుకున్నారా? లేదా? అనే దానిపై మాత్రం స్పష్టత నివ్వలేదు.
నౌకను హైజాకర్ల నుంచి రక్షించిన భారత నౌకాదళానికి దుబాయ్‌కు చెందిన లీలా నార్ఫోక్ యజమాన్యం కృత‌జ్ఞ‌త‌లు తెలిపింది. ‘రెస్యూ చేపట్టిన భారత నౌకదళానికి ధన్యవాదాలు.. అలాగే, క్లిష్ట పరిస్థితులలో సురక్షితంగా, యు బాధ్యతాయుతంగా ప్రతిస్పందించిన మా సిబ్బంది వృత్తి నైపుణ్యానికి కూడా మేము ధన్యవాదాలు చెప్పాలనుకుంటున్నాం’ అని ఆ సంస్థ సీఈఓ స్టీవ్ కుంజర్ అన్నారు. బ్రెజిల్‌లోని పోర్ట్ డు అకో నుంచి బహ్రెయిన్‌లోని ఖలీఫా బిన్ సల్మాన్‌కు వెళుతుండగా వాణిజ్య నౌక ఎంవీ లీలా నార్ఫోక్ను సముద్రపు దొంగలు హైజాక్ చేశారు. సోమాలియాకు తూర్పున 300 నాటికల్ మైళ్ల దూరంలో ఈ ఘటన చోటుచేసుకుంది. ఈ నౌక యునైటెడ్ కింగ్‌డమ్ మారిటైమ్ ట్రేడ్ ఆపరేషన్స్ (యూకేఎంటీవో) పోర్టల్‌లో ఒక సందేశాన్ని పంపింది. జనవరి 4 సాయంత్రం 5 గంటల సమయంలో ఆరుగురు తెలియని సాయుధ వ్యక్తులు లోపలికి ప్రవేశించినట్టు తెలిపింది.
|
|