ఒకే ఫేజ్, ఒకే రోజున పోలింగ్: ఎన్నికల సంఘానికి వైసీపీ రిక్వెస్ట్

ఆంధ్రప్రదేశ్, తెలంగాణలో ఒకే ఫేజ్‌లో.. ఒకే డేట్‌లో సార్వత్రిక ఎన్నికలు నిర్వహించాలని వైఎస్సార్‌సీపీ సీఈసీని కోరింది. ఆ పార్టీ ఎంపీ విజయసాయిరెడ్డి విజయవాడలో కేంద్ర ఎన్నికల కమిషన్‌‌ అధికారుల్ని కలిసి కోరారు. మరో ఎంపీ మార్గాని భ‌ర‌త్ కేంద్ర ఎన్నికల సంఘాన్ని క‌లిసి ఆరు అంశాల‌పై ఫిర్యాదు చేశారు. రెండు రాష్ట్రాలకు ఒకే తేదీన‌ ఎన్నికలు పెడితే డూప్లికెట్‌ ఓటర్లు ఓటు వేయానికి అవకాశం ఉండదని వివరించారు విజయసాయిరెడ్డి. గుర్తింపులేని పార్టీ జనసేనను ఎలా అనుమతించాలరని ఈసీ దృష్టికి తీసుకెళ్లామని.. జనసేనకు ఉన్న గ్లాస్‌ గుర్తు జనరల్‌గా సింబల్‌గా గుర్తించడం చట్టవిరుద్ధమని సీఈసీకి ఫిర్యాదు చేశామన్నారు. సీఈసీ అధికారులకు ఆరు అంశాలపై నివేదిక ఇచ్చామన్నారు. ఆంధ్ర‌ప్ర‌దేశ్ ఎన్నిక‌ల‌ సీఈవో బల్క్‌ కంప్లెట్స్‌ను యాక్సెప్ట్‌ చేయడం సరికాదని తప్పుపట్టారు. ఎన్ని ఓట్లు నిజమైనవని జిల్లా కలెక్టర్లు విచారణ చేయించి నివేదిక ఇచ్చారన్నారు.

తెలంగాణలో పార్లమెంట్‌ ఎన్నికలు, ఏపీలో ఎన్నికలు ఒకే దశలో పెట్టాలని ఎన్నికల కమిషన్‌ను కోరామన్నారు. ఒకే రోజు ఎన్నికలు నిర్వహించాలని కోరినట్లు తెలిపారు.చంద్రబాబు, లోకేష్‌తో పాటూ‌ మిగతా టీడీపీ నేతలు వైఎస్సార్‌సీపీ, సీఎం జగన్‌పై అసభ్యపదజాలం వాడుతున్న విషయాన్ని ఎన్నికల కమిషన్‌ దృష్టికి తీసుకెళ్లామన్నారు.. వీరిపై చర్యలు తీసుకోవాలని కోరామన్నారు. నారా లోకేష్‌ ప్రతి చోట ఎర్ర బుక్ చూపిస్తూ బెదిరిస్తున్నారని.. అధికారులు రాజకీయ పార్టీకి పని చేయరన్నారు. ఇలాంటి ఆరోపణలు చేస్తూ ఎర్రబుక్‌లో పేర్లు రాసుకుంటున్నానని హెచ్చరిస్తున్నారని.. అధికారులపై చర్యలు తీసుకుంటామని భయబ్రాంతులకు గురి చేస్తున్నారన్నారు. ఈ ఎర్ర బుక్ విషయంలో లోకేష్, చంద్రబాబుపై తగిన చర్యలు తీసుకోవాలని ఎన్నికల కమిషన్‌ దృష్టికి తీసుకెళ్లామన్నారు.

ఎన్నికల కమిషన్‌ సీఈవోకు బోగస్‌ ఫిర్యాదులు స్వీకరించకుండా ఆదేశాలు ఇవ్వాలని కోరామన్నారు. గతంలో 14, డిసెంబర్‌ 2023న ఎన్నికల కమిషన్‌ను కలిసి ఒక నివేదిక ఇచ్చామన్నారు. టీడీపీ చట్టువిరుద్దమైన చర్యలకు పాల్పడుతుందని.. టీడీపీ గ్రామీణ ప్రాంతాల్లో కులం ఏంటి, మతం ఏంటని వివరాలు సేకరిస్తోందని.. మై పార్టీ వెబ్‌ సైట్‌ను విదేశాల నుంచి ఆపరేట్‌ చేస్తున్న విషయంపైనా ఫిర్యాదు చేశామన్నారు. ఓటరును టీడీపీ ఆకట్టుకునేందుకు అబద్ధాలు ప్రచారం చేస్తోందని.. 2024లో అధికారంలోకి వస్తున్నామని.. ఐదేళ్లలో ఇన్ని లక్షలు లబ్ధి ఉంటుందని ఆన్‌లైన్‌లో బాండ్‌ ఇస్తున్నారన్నారు. ఇది చట్ట విరుద్ధమని ఫిర్యాదు చేశామన్నారు.

ఒక వ్యక్తి ఒక చోట మాత్రమే ఓటు హక్కు కలిగి ఉండాలని.. డూప్లికెట్‌ ఓట్లు ఉన్నాయని, తెలంగాణలో ఓటర్లు ఇక్కడ మళ్లీ నమోదు చేసుకున్నారని.. అలాంటి ఓట్లు తొలగించాలని కోరామన్నారు. తెలంగాణలో ఎన్‌రోల్‌మెంట్‌ డ్రైవ్‌ చేపట్టారని.. ఏపీలో ఓటర్లుగా ఎన్‌రోల్‌చేసుకోవాలని కేంద్రాలు ఏర్పాటు చేశారన్నారు. ఇది చట్ట విరుద్ధమని.. తెలంగాణలో ఓట్లు తొలగించిన తరువాతే ఏపీలో నమోదు చేసుకోవాలని కోరామన్నారు. కర్నూలు జిల్లాలో టీడీపీ ఇచ్చిన ఫిర్యాదు ప్రకారం 67,370 బోగస్‌ ఓట్లు ఉన్నాయని చెప్పారని.. ఇందులో వీఆర్‌వోలు విచారణ చేపట్టిన తరువాత 87 శాతం ఓట్లు నిజమైనవని గుర్తించారన్నారు. మిగతా ఓట్లు కూడా ఒక నియోజకవర్గం నుంచి మరో నియోజకవర్గానికి మారినట్లుగా ఉన్నాయన్నారు. కొందరు చనిపోయిన వారి ఓట్లు జాబితాలో ఉన్నాయని తేల్చారని.. ఎక్కడా కూడా బోగస్‌ ఓట్లు లేవని వీఆర్‌వోల విచారణలో క్లారిటీ వచ్చిందన్నారు. టీడీపీ ఉద్దేశపూర్వకంగా వైఎస్సార్‌సీపీ ఓటర్లను టార్గెట్‌ చేస్తుందని.. ఇలాంటి ఫిర్యాదుదారులపై చర్యలు తీసుకోవాలని ఎన్నికల కమిషన్‌కు విజ్ఞప్తి చేశామన్నారు.