సంక్రాంతికి వెళ్లేవారి కోసం ఈ నగరాల మధ్య మరో ఆరు ప్రత్యేక రైళ్లు

సంక్రాంతి పండుగ కోసం సొంతూళ్లకు వెళ్లే ప్రయాణికుల రద్దీని దృష్టిలో ఉంచుకొని ఇప్పటికే రైల్వే శాఖ పలు ప్రత్యేక రైళ్లను నడుపుతోంది. తాజాగా, తెలుగు రాష్ట్రాల మధ్య మరో ఆరు రైళ్లను సౌత్ సెంట్రల్ రైల్వే ప్రకటించింది. ఈ ప్రత్యేక రైళ్లను సికింద్రాబాద్‌, తిరుపతి, కాకినాడ నగరాల మధ్య జనవరి 10 నుంచి 15 తేదీల్లో నడపనున్నట్టు అధికారులు వెల్లడించారు. జనవరి 10న తిరుపతి - సికింద్రాబాద్‌ ప్రత్యేక రైలు (07055) రాత్రి 8.25గంటలకు తిరుపతిలో బయల్దేరి మరుసటి రోజు ఉదయం 9.10 గంటలకు సికింద్రాబాద్‌కు చేరుకోనుంది. సికింద్రాబాద్‌ -కాకినాడ టౌన్‌ రైలు (07056) జనవరి 11 న రాత్రి 7 గంటలకు సికింద్రాబాద్ రైల్వే స్టేషన్ నుంచి బయలుదేరి.. మర్నాడు ఉదయం 6.45 గంటలకు కాకినాడ పోర్టుకు చేరుకుంటుంది. అలాగే, తిరుగు ప్రయాణంలో కాకినాడ టౌన్‌ -సికింద్రాబాద్‌ ప్రత్యేక రైలు (07057) 12న రాత్రి 9 గంటలకు కాకినాడలో బయల్దేరి మరుసటి రోజు ఉదయం 8.30 గంటలకు సికింద్రాబాద్‌‌కు వస్తుంది.

అలాగే, సికింద్రాబాద్‌- కాకినాడ టౌన్‌ ప్రత్యేక రైలు (07071) జనవరి 13న రాత్రి 9 గంటలకు బయల్దేరి మర్నాడు ఉదయం 8.30 గంటలకు కాకినాడ టౌన్‌కు చేరుకుంటుంది. కాకినాడ టౌన్‌ - తిరుపతి ప్రత్యేక రైలు (07072) జవనరి 14న ఉదయం 10గంటలకు బయల్దేరి అదేరోజు రాత్రి 8.20గంటలకు తిరుపతి చేరుకుంటుంది. తిరుపతి -కాచిగూడ ప్రత్యేక రైలు (02707) జనవరి 15న తెల్లవారుజామున 5.30 గంటలకు బయల్దేరి అదేరోజు సాయంత్రం 5 గంటలకు కాచిగూడకు చేరుకోనుందని రైల్వే శాఖ తెలిపింది. ఈ ప్రత్యేక రైళ్లకు ప్రయాణికులు ఆన్‌లైన్‌లో ఐఆర్సీటీసీ పోర్టల్‌లో టిక్కెట్లను బుక్ చేసుకోవచ్చని సూచించింది.