మేము చిన్న దేశమే కావచ్చు, కానీ..: భారత్‌తో వివాదం వేళ మాల్దీవుల అధ్యక్షుడు సంచలన వ్యాఖ్యలు

ప్రధాని నరేంద్ర మోదీ లక్షద్వీప్ పర్యటనపై మాల్దీవుల మంత్రులు చేసిన అనుచిత వ్యాఖ్యలతో ఇరు దేశాల మధ్య వివాదం కొనసాగుతోంది. ఈ నేపథ్యంలో ఆ దేశ అధ్యక్షుడు చేసిన సంచలన వ్యాఖ్యలు చేశారు. మాల్దీవులు చిన్నదే కావచ్చు కానీ.. మమ్మల్ని బెదిరించే లైసెన్స్ మాత్రం ఏ దేశాలకు మేము ఇవ్వలేదని అధ్యక్షుడు మొహమ్మద్ ముయిజ్జు అన్నారు. ఐదు రోజుల చైనా పర్యటన ముగించుకుని శనివారం మాల్దీవులకు చేరుకున్న అనంతరం ఆయన మీడియాకు ఓ ప్రకటన విడుదల చేసిన ఆయన.. ఈ వ్యాఖ్యలు చేయడం గమనార్హం.

హిందూ మహాసముద్రం ఒక నిర్దిష్ట దేశానికి చెందినది కాదని ముయిజ్జూ నొక్కిచెప్పారు. ‘ఈ మహాసముద్రంలో మనకు చిన్న ద్వీపాలు ఉన్నప్పటికీ 9,00,000 చదరపు కిలోమీటర్ల విస్తారమైన ప్రత్యేక ఆర్థిక మండలి ఉంది.. ఈ మహాసముద్రంలో అత్యధిక వాటా కలిగిన దేశాల్లో మాల్దీవులు ఒకటి.. ఈ సముద్రం ఒక నిర్దిష్ట దేశానికి చెందింది కాదు. ఈ సముద్రం కూడా దానిలో ఉన్న అన్ని దేశాలకు చెందింది’ అని వ్యాఖ్యానించారు.

మాల్దీవులు భారతదేశపు పెరట్లో ఉందన్న వ్యాఖ్యలపై కూడా ముయిజు స్పందించారు. ‘మేము ఎవరి పెరట్లో లేం... మనది స్వతంత్ర, సార్వభౌమ రాజ్యం’ అని ఆయన అన్నారు. చైనాతో సంబంధాలపై స్పందిస్తూ.. ‘అంతర్గత వ్యవహారాల్లో జోక్యం చేసుకోకపోవడం మాల్దీవులు-చైనా సంబంధాలకు ఆధారం’ అని ముయిజు చెప్పారు. మాల్దీవుల దేశీయ వ్యవహారాలలో చైనా ప్రభావాన్ని చూపదని అన్నారు.

కాగా, భారత అనుకూల విధానాలు అవలంబించిన మాజీ అధ్యక్షుడిపై పరోక్షంగా విమర్శలు గుప్పించారు. మాజీ పాలకులు ఒక కుర్చీ నుంచి లేచి మరొక కుర్చీపై కూర్చోవడానికి ఒక పరాయి దేశం నుంచి అనుమతి కోరేదని ధ్వజమెత్తారు. ‘మేము చిన్నవారమే కావచ్చు, కానీ అది మమ్మల్ని బెదిరించే లైసెన్స్ మీకు ఇవ్వదు’ అని తన ప్రకటనను ముగించే ముందు పునరుద్ఘాటించారు.

తన చైనా పర్యటనలో తమ దేశానికి ఎక్కువ మంది పర్యాటకులను పంపేందుకు ప్రయత్నించాలని మాల్దీవుల అధ్యక్షుడు విజ్ఞప్తి చేశారు. ‘చైనా మా (మాల్దీవుల) మార్కెట్ కోవిడ్-19 తర్వాత నంబర్ వన్.. చైనా ఈ స్థానాన్ని తిరిగి పొందేందుకు మేము ప్రయత్నాలను తీవ్రతరం చేయాలని నా అభ్యర్థన’ అని అధికారిక వెబ్‌సైట్‌లో పేర్కొన్నారు. గత ఏడాది అక్టోబర్‌లో జరిగిన ఎన్నికల్లో భారత వ్యతిరేక నినాదంతో విజయం సాధించారు. తమ ద్వీపసమూహం నుంచి భారత దళాలను తొలగిస్తామని హామీ ఇచ్చారు. చెప్పినట్టుగానే అధికారంలోకి వచ్చిన వెంటనే భారత దళాలను మాల్దీవుల నుంచి వెనక్కి పంపారు.