ఆ దున్నపోతు కనిపిస్తే జనాలకు వణుకే.. గుర్తు పెట్టుకుని మరీ, ఇప్పటి వరకు 60మంది

పాములు పగబడతాయని మనం వింటుంటా.. మరి దున్నపోతు కూడా పగబడుతుందా.. అవును నిజమే అంటున్నారు అనంతపురం జిల్లాలోని ఓ గ్రామానికి చెందిన జనాలు. ఆ దున్నపోతు తనను కొట్టిన వారిని గుర్తుపెట్టుకుని మరీ వచ్చి కుమ్మేస్తుంది. ఆ గ్రామస్తులు దాన్ని చూస్తేనే బెంబేలెత్తిపోతున్నారు. ఈ దున్నపోతుకు ఇప్పటివరకు 60మంది బాధితులు ఉన్నారని తెలిసి అందరూ అవాక్కవుతున్నారు.

కనేకల్ మండలం సొల్లాపురంలో ఆరు నెలల క్రితం దున్నపోతు వచ్చింది. స్థానికులు ఆ దున్నపోతును అమ్మవారి పోతుగా భావించారు. అందుకే ఎవరూ ఏమి అనకుండా అలా వదిలేశారు.. ఇంకేముంది ఆ దున్నపోతు ఊరిలో దర్జాగా తిరుగుతోంది. అప్పటి నుంచి రెచ్చిపోతోంది.. ఇళ్లవైపు వచ్చి ఎండబెట్టిన గింజలను తినడం మొదలు పెట్టింది. దీనిని గమనించిన స్థానికులు దున్నపోతును అదలించేవారు. అయినా దున్నపోతు మొత్తం గింజలను తినేంత వరకూ అక్కడి నుంచి కదలకుండా ఉండడంతో కర్రతో కొట్టి తరిమేసేవారు.

ఇలా ఇళ్ల దగ్గర గింజలు, ఇతర వస్తువుల్ని నాశనం చేస్తోంది.. ఎవరైనా కర్రతో కొడితే గుర్తుపెట్టుకుని మరి ఆ దున్నపోతు కుమ్మేస్తోంది. తనపై దాడి చేసిన వారు వీధుల్లో కనిపిస్తే దున్నపోతు రెచ్చిపోయి కుమ్మేస్తూ వచ్చింది. అప్పటి నుంచి దున్నపోతు వీధుల్లో కనిపిస్తే ప్రజలు భయపడి ఇళ్లలోకి పరుగులు పెడుతున్నారు. ఇటీవల ఓ మహిళపై దున్నపోతు దాడి చేయడంతో స్థానికులు వణికిపోతున్నారు.

అల్లీపీరా స్వామి భజన మందిరం దగ్గర ఉంటున్న రసూలమ్మ ఉదయం ఇంటి బయట అరుగుపై కూర్చొని ఉండగా దున్నపోతు దాడి చేసింది. కొమ్ములతో ఎత్తి పారేసింది. ఈ ఘటనలో ఆమె కుడి కాలు పాదం నుంచి మోకాలి వరకూ చీరుకుపోయింది. దాడిని గమనించిన స్థానికులు వెంటనే అప్రమత్తమై దున్నపోతును తరిమికొట్టారు. తీవ్రంగా గాయపడిన రసూలమ్మను అనంతపురంలోని ప్రభుత్వాస్పత్రికి తీసుకెళ్లారు. మూడు నెలల్లో దాదాపు 60 మంది దున్నపోతు దాడిలో గాయపడ్డారని స్థానికులు చెబుతున్నారు. అధికారులు స్పందించి దున్నపోతును బంధించి, అటవీ ప్రాంతానికి తరలించాలని కోరుతున్నారు.