పుట్టగానే విడిపోయి.. తిరిగి 19 ఏళ్ల తర్వాత తొలిసారి కలుసుకున్న కవలలు!

70ల్లో తెలుగులో ఘన విజయం సాధించిన ‘గంగ-మంగ’ సినిమాను తలపించే ఘటన రియల్ లైఫ్‌లోనూ జరిగింది. పుట్టగానే విడిపోయిన కవల సోదరిలు 19 ఏళ్ల తర్వాత కలుసుకున్నారు. ఒకే నగరంలో కొద్ది కిలోమీటర్ల దూరంలో ఉన్నా ఈ అక్కాచెల్లెళ్లు ఇన్నేళ్లలో ఒక్కసారి కూడా కలవలేదు. అత్యంత అరుదైన ఈ ఘటన తూర్పు ఐరోపా దేశం జార్జియాలో చోటుచేసుకుంది. జార్జియాకు చెందిన సమరూప కవలలు అమీ ఖ్విటియా, అనో సార్టానియాలు పుట్టిన వెంటనే విడిపోయారు. అయితే, ఇటీవల వైరల్ అయిన టిక్‌టాక్ వీడియోతో పాటు టాలెంట్ షో వీరిని కలిపింది.

ఈ కథ జార్జియాను పట్టిపీడిస్తున్న అతి భయంకరమైన సమస్యను తెలియజేస్తుంది. పుట్టిన శిశువులను అసుపత్రుల నుంచి దొంగిలించి, విక్రయించే ముఠాలు దశాబ్దాలుగా అక్కడ దందాలు సాగిస్తున్నాయి. ఈ కవలలను కూడా ఇలాగే అమ్మేశారు. అయితే, వీరిని అమ్మేసింది మాత్రం తండ్రే. అమీ, అనోల నృత్య ప్రయాణం 12 ఏళ్ల వయస్సులోనే ప్రారంభమైంది. తనకు ఇష్టమైన టీవీ షో 'జార్జియాస్ గాట్ టాలెంట్'లో అచ్చం తన పోలికలతో డ్యాన్స్ చేస్తున్న అమ్మాయిని చూసి అమీ షాకయ్యింది. అయితే, డ్యాన్స్ చేస్తున్న ఆ అమ్మాయి తాను కోల్పోయిన సోదరేనని ఆమెకు తెలియకపోవడం గమనార్హం.

ఇదే సమయంలో తనలాగే నీలిరంగు జుట్టుతో అసాధారణంగా కనిపించే యువతి టిక్‌టాక్ వీడియో ఇటీవల అనో చూసింది. దీనిపై ఆరా తీయగా వీడియోలో ఉన్న ఆమె తన సోదరి అమీ అని, ఇద్దరం కవలలమని తేలింది. వీరికి జన్మనిచ్చిన అజా షోనీ 2002లో ప్రసవ సమయంలో అనారోగ్యం కారణంగా కోమాలోకి వెళ్లిపోయారు. ఆమె భర్త గోచా గఖారియా అనో, అమీలను వేరు కుటుంబాలకు విక్రయించాలని నిర్ణయించుకున్నారు.

అనో టిబిలిసిలో.. అమీ జుగ్దిడిలో పెరిగారు. ఇద్దరికీ ఒకరి ఉనికి గురించి మరొకరికి పూర్తిగా తెలియదు. పదకొండేళ్ల వయస్సులో యాదృశ్చికంగా కవలలు నృత్య పోటీల్లో పాల్గొన్నారు. ఇరువురూ ఒకే పోలికలతో ఉండటంతో ప్రేక్షకులు ఆశ్చర్యపోయారు. కానీ, అప్పటికి నిజం అస్పష్టంగానే ఉంది. చివరకు టిక్‌టాక్ వీడియో వైరల్ అయ్యే వరకూ తాము ఒకే తల్లి బిడ్డలమని తెలుసుకోలేకపోయారు. వీరి గురించి ఆరా తీయగా దిగ్భ్రాంతికరమైన వాస్తవం బయటపడింది. జార్జియా ఆసుపత్రుల నుంచి దొంగిలించి, విక్రయించిన వేలాది మంది శిశువులలో వీరు కూడా ఒకరు. జార్జియా రాజధాని టిబిలిసీలోని రుస్తావేలీ వంతెనపై అమీ, అనో 19 సంవత్సరాల తర్వాత మొదటిసారి కలుసుకున్నారు.