నన్ను చంపేస్తామని బెదిరిస్తున్నారు.. గన్ కోసం దరఖాస్తు చేశా: అయ్యన్నపాత్రుడు

టీడీపీ పొలిట్‌బ్యూరో సభ్యులు, మాజీ మంత్రి చింతకాయల అయ్యన్నపాత్రుడు సంచలన వ్యాఖ్యలు చేశారు. తనను చంపేస్తామని బెదిరింపులు వస్తున్నాయన్నారు. తనకు ప్రాణహాని ఉందని భావించి.. రివాల్వర్ లైసెన్స్ రెన్యువల్ కోసం దరఖాస్తు చేసుకున్నట్లు తెలిపారు. ఎస్పీ గన్‌మెన్‌ను ఇస్తామని చెప్పారని.. కానీ వద్దని తానే చెప్పానన్నారు. ఎందుకంటే తాను ఎక్కడ ఉన్నానో వారే ఉప్పందిస్తారనే భయం తనకు ఉందన్నారు. తల్లి ,చెల్లి, బాబాయ్ అనే తేడా లేదు.. అయ్యన్నపాత్రుడు ఒక లెక్కా అంటూ ఘాటు వ్యాఖ్యలు చేశారు.

షర్మిలకు సెక్యూరిటీని పెంచాలన్నారు అయ్యన్నపాత్రుడు. షర్మిలకు వైఎస్ రాజశేఖర్ రెడ్డి ఆస్తిలో వాటా రాశారని..ఈడీ అటాచ్‌మెంట్‌లో ఉన్న ఆస్తులు చేజారిపోతాయనే భయం జగన్‌కి ఉందన్నారు. అవి చేజారిపోతే షర్మిలకు రాజశేఖర్‌రెడ్డి ఇచ్చిన వాటాను పంచకుండా ఆపుతున్నారని చెప్పుకొచ్చారు. ల్యాండ్ టైట్లింగ్ చట్టాన్ని తీసుకు వచ్చి కోర్టులతో పనిలేదనే రీతిలో జగన్ వ్యవరిస్తున్నారన్నారు. అనకాపల్లి ఎంపీ అభ్యర్థిగా తన కుమారుడు విజయ్ దరఖాస్తు చేసుకున్నారని.. అధిష్టానం పరిశీలన చేస్తోందన్నారు. విజయ్ మాజీ ఎన్నికల కమిషనర్ టీఎన్ శేషన్ దగ్గర రెండేళ్లు శిక్షణ పొందారని.. అన్ని విధాలుగా చూస్తే విజయ్ సమర్ధుడు అన్నారు. తన కుమారుడిని ఆదరించాలని కోరారు.

సీఎం జగన్ సిద్దం సభలో క్యాట్ వాక్ చేయడానికి శిలువ ను ఉపయోగించుకుంటారా.. జగన్ ముఖ్యమంత్రా పగటి వేషగాడా అంటూ మండిపడ్డారు. ఉత్తరాంధ్రలో ఏమి పొడిచావో చెప్పగలవా.‌. రాష్ట్రానికి భస్మాసుర హస్తం జగన్.. విశాఖ నుంచి భీమిలి బీచ్ వరకూ ఏస్ధలాన్నైనా వదిలిపెట్టావా అంటూ ఆరోపించారు. సీఎం జగన్ ఓ ఇంటర్వ్యూ లో సంతోషంగా వెళ్లిపోతానన్న కామెంట్స్‌ను గుర్తు చేశారు. ఎక్కడికి వెళ్లిపోతావు.. ఎక్కడ దాక్కున్నా లాక్కొని వస్తామన్నారు. ఎస్సీ యువకుడ్ని పొట్టన పెట్టుకున్న వ్యక్తిని పక్కన పెట్టుకుని అంబేద్కర్ విగ్రహం ఆవిష్కరించడం దారుణమన్నారు. తాండవ రిజర్వాయర్ కు నీరురాకుండా చేయాలని చూస్తున్నరని..

99% హామీలు నెరవేర్చానన్నావు ఎలా నమ్మాలని ప్రశ్నించారు అయ్యన్నపాత్రుడు. రైల్వే జోన్ తెస్తానని.. అమరావతే రాజధాని న్నారని.. ప్రత్యేక హోదా సాధిస్తాన్నారు , సీపీఎస్ రద్దు చేస్తానన్నారు. జాబ్ కేలండర్ అన్నారు.. 2లక్షల 30 వేల ఉద్యోగాలన్నారు.. అసలు ఏదీ జరగలేదన్నారు. పోలీసులతో తప్పుడు పనులు చేయించారని.. పోలీసులను కూడామోసం చేశారన్నారు. సంక్షేమ పింఛన్‌పై ఇచ్చిన మాట నెరవేర్చుకోలేదన్నారు. ఐదేళ్లలో ఒక్కో పెన్షన్ దారుడికి రూ.25,600 నష్టం కలిగించేలా చేశారని.. ఏపీలో 8,600 కోట్లు బ్రాందీ షాపుల నుంచి అప్పులు తెచ్చారన్నారు.

30 లక్షల మందికి ఇళ్లు కట్టానని చెప్పారని.. ఒక్కో ఇంటికి నిర్మాణానికి కేంద్రం నుంచి రూ.లక్షా 50 వేలు ఇచ్చారని.. ఇవన్నీ జగన్ ఇచ్చినట్లు ఎలా చెప్పుకుంటారన్నారు. విశాఖలో 125 చోట్ల స్ధలాలు అమ్మేసి 25 వేల కోట్లు తెచ్చుకున్నారని.. గాదిరాజు ప్యాలెస్‌ను స్వాధీనం చేసుకోవాలని చూశారని.. పైకి మాత్రం ఏదీ జరగలేదనే రీతిలో వైఎస్సార్‌సీపీ నేత కేకే రాజు ప్రెస్ మీట్ పెట్టించారన్నారు. ఏది నచ్చితే అది లాగేసుకుంటారన్నారు. రైతుల పాస్ పుస్తకాలపై జగన్ ఫోటోలు ఎందుకని.. పొలాల్లో ఉన్న సర్వేరాళ్లపై జగన్ ఫోటో ఎందుకని ప్రశ్నించాు. స్ధలాల రిజిస్ట్రేషన్ పత్రాలు ఇవ్వకపోవడం ఎక్కడైనా చూశామా.. ఒరిజినల్ పత్రాలు లేకుండా బ్యాంకులు అప్పులిస్తాయా అంటూ ప్రశ్నించారు.