శ్రీశైలం మల్లన్న, భ్రమరాంబదేవికి హైదరాబాద్ భక్తుల ఖరీదైన కానుకలు
Andhra Pradesh Telugu | Suryaa Desk | Published : Tue, Jan 30, 2024, 08:54 PM
శ్రీశైలం భ్రమరాంబదేవికి ఓ భక్తుడు బంగారు, వెండి పుష్పాలు కానుకగా సమర్పించారు. హైదరాబాద్‌కు చెందిన మురళి.. కుటుంబసభ్యులతో కలిసి సోమవారం పుష్పాలను బహూకరించారు. వీటి విలువ సుమారు రూ.5.45 లక్షలు ఉంటుందని ఆలయ అధికారులు తెలిపారు. మరోవైపు సికింద్రాబాద్‌కు చెందిన చెందిన రాణి కన్‌స్ట్రక్షన్స్‌ సంస్థ యజమాని గుల్ల గుండయ్య శ్రీశైల దేవస్థానికి భారీ విరాళం అందజేశారు.
దేవస్థానం నిర్వహించే ఉచిత వైద్యశాలకు బయో కెమిస్ట్రీ అనలైజర్‌ యంత్రాన్ని అందజేశారు. వీటి విలువ సుమారు రూ.1,63,412 ఉంటుందని దాత తెలిపారు. దాత ఈ విరాళాన్ని దేవస్థానం వసతి విభాగం సహాయ కార్యనిర్వహణాధికారి ఐఎన్‌వీ మోహన్‌కు అందజేశారు. అలాగే గుండయ్య గో సంరక్షణకు రూ. 5 లక్షలు, నిత్యాన్నదాన పథకానికి రూ.25 లక్షలు విరాళంగా ఇచ్చారు. ఈ చెక్కులను ఆలయ అధికారులకు అందించారు. దాతలకు ఆలయ అర్చకులు, అధికారులు.. స్వామి, అమ్మవార్ల శేషవస్త్రాలు, ప్రసాదాలు అందజేశారు.
శ్రీశైల దేవస్థానం భక్తుల సౌకర్యార్థం నిర్వహిస్తున్న నిత్యాన్నదాన పథకానికి పశ్చిమగోదావరి, భీమవరానికి చెందిన ఎ.రామకృష్ణ రూ.లక్ష విరాళాన్ని, ఖమ్మం జిల్లాకు చెందిన వీవీఎస్‌ఎస్‌ శివరామకృష్ణ రూ.లక్ష విరాళాన్ని, రంగారెడ్డి జిల్లాకు చెందిన మారేడుపల్లి నందీశ్వరరెడ్డి రూ.1,11,116 విరాళాన్ని అధికారులకు అందజేశారు. చెన్నైకి చెందిన ఎల్‌. రమేష్‌రెడ్డి రూ.లక్ష విరాళాన్ని అందజేశారు.
|
|