అంగన్‌వాడీ కేంద్రంలో కుమార్తెను చేర్చిన ఐఏఎస్‌ అధికారి.. ప్రశంసలు
Andhra Pradesh Telugu | Suryaa Desk | Published : Tue, Jan 30, 2024, 08:56 PM
అంగన్‌వాడీ కేంద్రాల్లో పేద, మధ్యతరగతి వర్గాలవారు తమ పిల్లలను చేరుస్తారు. అయితే అల్లూరి సీతారామరాజు జిల్లా రంపచోడవరం ఐటీడీఏ ప్రాజెక్ట్‌ అధికారి సూరజ్ గనోరే మూడేళ్ల వయసున్న తన కుమార్తె సృష్టి గనోరేను స్థానిక ఎర్రంరెడ్డినగరంలో ఉన్న అంగన్‌వాడీ కేంద్రంలో చేర్చారు. అంగన్‌వాడీ కేంద్రాలపై ప్రజలకు నమ్మకం పెరిగేలా.. పదుగురికి ఆదర్శంగా నిలిచేలా పీవో తనకుమార్తెను అంగన్‌వాడీ కేంద్రంలో చేర్పించారని కార్యకర్తలు ప్రశంసించారు. సూరజ్ గనోరే నిర్ణయంపై అందరూ హర్షం వ్యక్తం చేస్తున్నారు.
మరోవైపు ఏజెన్సీలో బాగా చదువుతున్న విద్యార్థులను గుర్తించి ఢిల్లీలో రిపబ్లిక్‌, స్వాతంత్య్ర దినోత్సవాలకు పంపిస్తామని ఐటీడీఏ పీవో సూరజ్ గనోరే పేర్కొన్నారు. ఈ ఐటీడీఏకు చెందిన నలుగురు విద్యార్థులు ఈ నెల 26న ఢిల్లీలో జరిగిన రిపబ్లిక్‌ వేడుకల్లో పాల్గొని ప్రధానిని కలిసి వచ్చారు. సోమవారం స్థానిక ఐటీడీఏ కార్యాలయంలో వారిని సత్కరించారు. రాష్ట్రంలో 30 మందిని దిల్లీ పంపించగా వీరిలో నలుగురు రంపచోడవరం ప్రాంతానికి చెందిన వారు కావడం అభినందనీయమన్నారు సూరజ్. డీడీ అబ్సులోము, పీఈటీలు కె.తిరుపతిరావు, కె.రామాయమ్మ, మల్లేశ్వరి, వార్డెన్‌ ఆదినారాయణరెడ్డి పాల్గొన్నారు.
|
|