పవన్ కళ్యాణ్ స్థాయి అది.. ఆయన్ని అపేదెవడు.. జానీ మాస్టర్

ప్రముఖ కొరియోగ్రాఫర్, జనసేన నేత జానీ మాస్టర్ సీఎం జగన్ మీద, వైసీపీ ప్రభుత్వం మీద తీవ్ర వ్యాఖ్యలు చేశారు. ఇటీవలే జానీ మాస్టర్ జనసేనలోకి చేరారు. ఈ నేపథ్యంలో ఆదివారం జానీ మాస్టర్ పరిచయ కార్యక్రమం నిర్వహించారు. ఈ కార్యక్రమంలో ప్రసంగించిన జానీ మాస్టర్.. జగన్ వైఖరిని తప్పుబట్టారు. అలాగే పవన్ కళ్యాణ్ గురించి వైసీపీ నేతలు చేస్తున్న ఆరోపణలను తీవ్రంగా ఖండించారు. పవన్ కళ్యాణ్‌ను ప్యాకేజీ స్టార్ అంటూ వైసీపీ నేతలు విమర్శలు గుప్పిస్తూ ఉంటారు. చంద్రబాబు వద్ద నుంచి ప్యాకేజీ తీసుకుని రాజకీయాలు చేస్తున్నారని అంబటి రాంబాబు, మంత్రి రోజా, పేర్నినాని, కొడాలి నాని వంటి నేతలు పదేపదే ఆరోపిస్తూ ఉంటారు.

ఈ నేపథ్యంలో వైసీపీ నేతల మాటలను జానీ మాస్టర్ తప్పుబట్టారు. వైసీపీ నేతల మాటలు చూస్తే దయ్యాలు వేదాలు వల్లించినట్లుగా ఉందని సెటైర్లు పేల్చారు. పవన్ కళ్యాణ్‌కు డబ్బూ, ఆస్తులకు కొరతలేదన్న జానీ మాస్టర్.. అత్తారింటికి దారేదీలో సిద్ధూ క్యారెక్టర్‌ లెక్కన పవన్ కళ్యాణ్ రియల్ లైఫ్ ఉందని అన్నారు. పదే పదే వైసీపీ నేతలు ప్యాకేజీ స్టార్ అంటారని.. కానీ నిరుపేద, బడుగు, బలహీన వర్గాలను పైకి తీసుకురావటమే పవన్‌కు నిజమైన ప్యాకేజీ అని జానీ మాస్టర్ చెప్పారు. ఎవరూ కలవలేనంత స్థాయిలో ఉన్న పవన్ కళ్యాణ్ అందరిలోకి వస్తున్నారన్న జానీ మాస్టర్.. అందరినీ కలవాల్సిన సీఎం జగన్ మాత్రం ఐదేళ్లుగా ఎవరినీ కలవడం లేదన్నారు. అలాగే పవన్ కళ్యాణ్ అసెంబ్లీకి వెళ్లకుండా ఆపుతామని వైసీపీ నేతలు అంటున్నారని, ఈ సారి పవన్ అసెంబ్లీకి వెళ్లడం పక్కా, ఎవరాపుతారో చూద్దామంటూ ఆవేశంగా ప్రసంగించారు.

ఇక జానీ మాస్టర్ విషయానికి వస్తే.. నెల్లూరుకు చెందిన జానీమాస్టర్ ఈటీవీలో ప్రసారమయ్యే ఢీ షో ద్వారా పాపులర్ అయ్యారు. ఆ తర్వాత ప్రముఖ హీరోల సినిమాలకు కొరియోగ్రాఫర్‌గా మంచి పేరు సంపాదించుకున్నారు. ఇటీవలి కాలంలో జనసేన నేతలతో టచ్‌లో ఉంటూ వచ్చిన జానీ మాస్టర్.. ఈ మధ్యనే పవన్ కళ్యాణ్ సమక్షంలో జనసేన కండువా కప్పుకున్నారు. మరోవైపు జానీ మాస్టర్ జనసేన నుంచి నెల్లూరు జిల్లాలో ఏదో ఒకస్థానం నుంచి బరిలో దిగే అవకాశం ఉందనే వార్తలు వస్తున్నాయి.