టైల్స్ క్లీన్ చేస్తామని ఇంట్లోకి వచ్చి.. మహిళకు మత్తుమందు ఇచ్చి.. ఇలాంటోళ్లతో బీ కేర్ ఫుల్

వైజాగ్‌లో కేబుల్ టీవీ ఆపరేటర్‌ ఇంట్లోని ఒంటరి వృద్ధురాలిపై దాడి చేసిన ఘటన మరువకముందే అలాంటి ఘటనే కర్నూలు జిల్లాలో చోటు చేసుకుంది. ఎమ్మిగనూరులోని లక్ష్మీపేటలో ఉన్న ఉమాదేవి అనే మహిళ ఇంట్లో దొంగలు పడ్డారు. ఇంట్లోని టైల్స్ క్లీన్ చేస్తామంటూ ఇద్దరు వ్యక్తులు ఉమాదేవి ఇంటి వద్దకు వచ్చారు. ఆమెతో మాటలు కలిపారు. ఇంట్లోని టైల్స్ లిక్విడ్‌తో శుభ్రం చేస్తామని, ఆ తర్వాత అవి మెరిసిపోతాయంటూ నమ్మబలికారు. పాపం అమాయకంగా నమ్మిన ఆ ఇల్లాలు.. వారి మనసులో ఏముందో గ్రహించకుండా లోనికి రానిచ్చింది. ఇక అప్పుడే తమ కన్నింగ్ ప్లాన్ స్టార్ చేశారు ఇద్దరు దుండగులు.

ఇంట్లోకి ప్రవేశించిన దుండగులు ముందుగా ప్లాన్ చేసుకున్న ప్రకారం ఆమెతో మాటలు కలిపారు. టైల్స్ శుభ్రం చేస్తున్నట్లు నటిస్తూ తమపై నమ్మకం కుదుర్చుకున్నారు. అయితే టైల్స్‌ను మెరిపించినట్లుగానే ఇంట్లో ఉన్న బంగారాన్ని కూడా శుభ్రం చేస్తామనీ, ఆ తర్వాత నగలు ధగధగలాడిపోతాయని ఉమాదేవిని నమ్మించారు. అప్పటికీ వారి మోసాన్ని గ్రహించని ఉమాదేవి.. వారి బుట్టలో పడిపోయింది. మాయగాళ్లు ఇచ్చిన ఓ పౌడర్‌ను చేతిలోకి తీసుకుంది. ఇక అంతే.. నెమ్మదిగా స్పృహ కోల్పోయింది.

చేతిలో పౌడర్ పెట్టి.. ఒంటిపై ఉన్నదంతా స్వాహా

బాధితురాలు స్పృహ కోల్పోవటంతో తమ ప్లాన్ వర్క్ అవుట్ అయ్యిందని ఇద్దరు దొంగలు సంబరపడిపోయారు. వెంటనే ఉమాదేవి మెడలోని నాలుగు తులాల మంగళసూత్రంతో పాటు మరో గొలుసును లాక్కొని అక్కడి నుంచి ఉడాయించారు. మత్తు నుంచి తేరుకున్న వెంటనే విషయం గ్రహించిన ఉమాదేవి.. లబోదిబోమని వాపోయింది. వెంటనే భర్తతో కలిసి స్థానిక పోలీస్ స్టేషన్‌లో ఫిర్యాదు చేసింది. టైల్స్ క్లీన్ చేస్తామని ఇంట్లోకి వచ్చి బంగారు గొలుసు దోచుకెళ్లారంటూ కంప్లైంట్ చేసింది. ఉమాదేవి ఫిర్యాదు మేరకు కేసు నమోదు చేసిన పోలీసులు దర్యాప్తు ప్రారంభించారు.

అలాంటి వారితో బీ అలెర్ట్..

ఉమాదేవి ఉదంతంతో పోలీసులు అలెర్ట్ అయ్యారు. ఆ ఇద్దరు దొంగలముఠాను వెతికే పనిలో పడ్డారు. మరోవైపు ఆగంతకులను ఇంట్లోకి రానివ్వొద్దని ప్రజలకు సూచించారు. ముఖ్యంగా మహిళలు ఒంటరిగా ఉన్న సమయంలో గుర్తు తెలియని వ్యక్తులను ఇంట్లో వరకూ తీసుకెళ్లవద్దంటూ సూచిస్తున్నారు. అలాగే వీలైతే సీసీటీవీ కెమెరాలు ఏర్పాటు చేసుకోవాలని కోరుతున్నారు. విలువైన వస్తువులను బయట ఉంచవద్దని విజ్ఞప్తి చేస్తున్నారు.