ఢిల్లీలోకి రైతులను అడ్డుకుంటున్న పోలీసులు.. కేంద్రానికి రాకేష్ టికాయత్ హెచ్చరికలు

పంజాబ్, హర్యానా, ఉత్తర్‌ప్రదేశ్‌ రాష్ట్రాల నుంచి వేలాదిగా అన్నదాతలు దేశ రాజధాని ఢిల్లీ బాట పట్టారు. ఈ క్రమంలోనే అన్నదాతలు చేపట్టిన ఢిల్లీ ఛలో యాత్రతో ఢిల్లీ నగర సరిహద్దుల్లో తీవ్ర యుద్ధ వాతావరణం నెలకొంది. అయితే ఢిల్లీని ముట్టడించేందుకు బయల్దేరిన రైతు సంఘాలను, రైతులను అడ్డుకునేందుకు పోలీసులు తీవ్ర ప్రయత్నాలు చేస్తున్నారు. సింఘూ సరిహద్దుల్లోకి భారీగా రైతులు చేరుకున్నారు. ఈ క్రమంలోనే అక్కడ ఉద్రిక్తతలు చోటు చేసుకోవటంతో రైతులపై పోలీసులు టియర్‌ గ్యాస్‌, వాటర్ క్యానన్లు ప్రయోగించారు. దీంతో పంజాబ్, హర్యానా సరిహద్దుల్లోని శంభు వద్ద వద్ద తీవ్ర ఉద్రిక్త పరిస్థితులు నెలకొన్నాయి. ఈ క్రమంలోనే అన్నదాతలు పోలీసులపైకి రాళ్లు రువ్వారు.

ఈ క్రమంలోనే భారత్‌ కిసాన్‌ యూనియన్‌ - బీకేయూ నేత రాకేశ్ టికాయత్ స్పందించారు. ఈ సందర్భంగా ఆందోళన చేస్తున్న రైతులను అడ్డుకుంటున్న కేంద్రంలోని బీజేపీ ప్రభుత్వానికి తీవ్ర హెచ్చరికలు చేశారు. మరికొన్ని రోజుల్లో జరగనున్న సార్వత్రిక ఎన్నికల వేళ రైతులు చేస్తున్న డిమాండ్‌ను కేంద్ర ప్రభుత్వం సమస్యగా సృష్టిస్తే ఊరుకునేది లేదని స్పష్టం చేశారు. ఈ క్రమంలోనే పలు రైతు సంఘాలు భిన్నమైన సమస్యలపై పోరాటం చేస్తాయని పేర్కొన్నారు. కానీ తాజాగా చేపట్టిన రైతుల ఢిల్లీ ఛలో మెగా మార్చ్‌ను సమస్యగా చిత్రీకరిస్తే ఊరుకోమని మండిపడ్డారు. తాము రైతులకు దూరంగా లేమని.. నిరసన తెలిపే రైతులకు తమ మద్దతు ఎప్పుడూ ఉంటుందని గుర్తు చేశారు.

ఈ క్రమంలోనే రాకేశ్ టికాయత్ సోదరుడు నరేష్‌ టికాయత్ కూడా మీడియాతో మాట్లాడారు. రైతుల డిమాండ్లపై కేంద్ర ప్రభుత్వం చర్చలు జరపాలని సూచించారు. దేశవ్యాప్తంగా అన్నదాతల ఆందోళనలు వెల్లువెత్తుతున్నాయని.. దీంతో ప్రభుత్వం రైతులతో చర్చలు జరపి అంతేవిధంగా రైతులకు గౌరవం ఇవ్వాలని డిమాండ్‌ చేశారు. కేంద్రం ఆలోచించి రైతుల డిమాండ్లను పరిష్కరించేందుకు ప్రయత్నించాలని నరేష్ టికాయత్ కోరారు.

మరోవైపు.. రైతుల డిమాండ్ల సాధన కోసం ఈ నెల 16 వ తేదీన దేశవ్యాప్తంగా భారత్‌ బంద్‌ నిర్వహించాలని రాకేష్‌ టికాయత్‌ ఇప్పటికే పిలుపునిచ్చారు. దేశంలోని అతి పెద్ద రైతు సంఘాలలో భారత్‌ కిసాన్‌ యూనియన్‌ ఒకటి. తాజాగా పలు రాష్ట్రాల రైతులు చేస్తున్న నిరసనలు, ఆందోళనలకు మిగితా రైతు సంఘాలు కూడా మద్దతు తెలపడంతో ఎన్నికల ముందు కేంద్రంలోని నరేంద్ర మోదీ ప్రభుత్వంపై మరింత ఒత్తిడి పెరిగే అవకాశం ఉందని రాజకీయ వర్గాల్లో చర్చ జరుగుతోంది. మరోవైపు.. రైతు సంఘాలతో కేంద్రం చర్చలు జరిపినా అవి సఫలం కాలేదు.