ఢిల్లీకి కదం తొక్కిన అన్నదాతలు.. ఎర్రకోటను మూసివేసిన అధికారులు

డిమాండ్ల సాధనే లక్ష్యంగా వివిధ రాష్ట్రాల అన్నదాతలు దేశ రాజధాని ఢిల్లీకి పయనమయ్యారు. ఈ క్రమంలోనే రైతులను ఢిల్లీలోకి రానీయకుండా కేంద్ర ప్రభుత్వం అనేక చర్యలు చేపట్టింది. ఇప్పటికే ఢిల్లీ సరిహద్దుల్లో బారికేడ్లు, ముళ్ల కంచెలు, కాంక్రీట్ దిమ్మెలతోపాటు భారీగా భద్రతా బలగాలను మోహరించింది. మరోవైపు.. ర్యాలీలుగా, పాదయాత్రలుగా, ట్రాక్టర్‌లపై ఢిల్లీకి కదిలిన రైతులు.. ఎట్టి పరిస్థితుల్లోనైనా సరిహద్దులను చేధించుకుని దేశ రాజధానిలోకి ప్రవేశిస్తామని తెగేసి చెబుతున్నారు. ఈ క్రమంలోనే తీవ్ర ఉద్రిక్త పరిస్థితులు నెలకొన్నాయి. ఇక దేశ రాజధానిలో ఎలాంటి హింసాత్మక ఘటనలు చోటు చేసుకోకుండా అధికారులు చర్యలు చేపట్టారు. ఈ క్రమంలోనే ఢిల్లీ, ఢిల్లీ సరిహద్దుల్లో ఉద్రిక్త పరిస్థితులు నెలకొన్నాయి.

హర్యానా, ఉత్తర్‌ప్రదేశ్, పంజాబ్ రాష్ట్రాలతో పాటు దేశంలోని వివిధ రాష్ట్రాల రైతులు ఢిల్లీ ఛలోకు పిలుపునిచ్చిన నేపథ్యంలో.. ఢిల్లీలోని ఐకానిక్ ఎర్రకోటను అధికారులు మూసివేశారు. ఎర్రకోటలోకి ప్రవేశించకుండా పూర్తిగా బారికేడ్లు, కంటైనర్లు అడ్డుగా ఉంచారు. అయితే గతంలో రైతులు ఆందోళనలు చేసిన సమయంలో దేశ రాజధాని ఢిల్లీలో నెలకొన్న హింసాత్మక పరిస్థితులు మరోసారి తలెత్తకుండా ముందు జాగ్రత్తగా అధికారులు ఈ నిర్ణయం తీసుకున్నారు.

2020 ఏడాదిలో ఢిల్లీ సరిహద్దుల్లో ఆందోళనలు ప్రారంభించిన అన్నదాతలు.. 2021 జనవరి 26 వ తేదీ గణతంత్ర్య దినోత్సవం సందర్భంగా ఢిల్లీకి ర్యాలీ నిర్వహించారు. ఇందులో భాగంగా ప్రముఖ చారిత్రక కట్టడం అయిన ఎర్రకోటకు చేరుకున్నారు. బారికేడ్లను దాటుకుని.. ఎర్రకోటలోకి ప్రవేశించిన ఆందోళనకారులు.. తీవ్ర కలకలం సృష్టించారు. ఒకానొక సమయంలో ఎర్రకోటపై భారత జాతీయ జెండాను తొలగించడం అప్పట్లో పెను సంచలనంగా మారింది. ఈ క్రమంలోనే పోలీసులు, భద్రతా బలగాలతో రైతులు ఘర్షణకు దిగడంతో దేశ రాజధానిలో తీవ్ర అల్లర్లు చెలరేగాయి. పోలీసులు, పారామిలిటరీ సిబ్బంది లాఠీఛార్జ్‌లు, టియర్ గ్యాస్ ప్రయోగాలు చేశారు. దీంతో ఎర్రకోట కాంప్లెక్స్ వద్ద 15 అడుగుల గోడపై నుంచి ఆందోళనకారులు దూకారు.

ఈ క్రమంలోనే తాజాగా మరోసారి అన్నదాతలు ఢిల్లీకి మెగా మార్చ్ నిర్వహించడంతో అధికారులు పటిష్ఠ చర్యలు చేపట్టారు. తాజాగా ఢిల్లీ సరిహద్దుల్లో మరోసారి తీవ్ర ఉద్రిక్త పరిస్థితులు చోటు చేసుకుంటున్నాయి. భారీగా తరలివస్తున్న రైతులను అడ్డుకునేందుకు పోలీసులు టియర్ గ్యాస్ ప్రయోగిస్తున్నారు. దీంతో రైతులు, మీడియా సిబ్బంది పారిపోతున్న దృశ్యాలు ప్రస్తుతం సోషల్ మీడియాలో తెగ వైరల్ అవుతున్నాయి. కనీస మద్దతు ధర -ఎంఎస్‌పీకి భరోసా కల్పించేందుకు చట్టం చేయాలని ప్రధానంగా రైతులు డిమాండ్ చేస్తున్నారు. దీంతోపాటు విద్యుత్ చట్టం 2020 రద్దు, లఖింపూర్ ఖేరీలో మృతి చెందిన రైతులకు పరిహారం, రైతుల ఉద్యమంలో పాల్గొన్న వారిపై కేసుల ఉపసంహరణ వంటి ఇతర డిమాండ్లు కూడా ఉన్నాయి.