పట్టపగలే వరుస చోరీలు.. అవే టార్గెట్.. సీసీటీవీ కెమెరాల్లో చూసి బిత్తరపోయిన యజమానులు

కుక్కపిల్ల, సబ్బుపిల్ల కాదేదీ కవితకు అనర్హం అన్నాడు మహాకవి శ్రీశ్రీ. కానీ పల్నాడు జిల్లాలో ఓ దొంగ తీరు గురించి తెలుసుకుంటే మాత్రం కాదేదీ చోరీకి అనర్హం అని మార్చుకోక తప్పదు. ఎందుకంటే సాధారణంగా చోరీలు విలువైన నగలు, నగదు, వస్తువులున్న దుకాణాల్లో జరుగుతూ ఉంటాయి. అందుకే బ్యాంకులు, నగల షాపులు, ఏటీఎం కేంద్రాలలో దొంగతనం జరిగిందంటూ వార్తలు చూస్తుంటాం. వింటూ ఉంటాం. ఇక దొంగల బారి నుంచి రక్షించుకునేందుకు వాళ్లు కూడా భద్రతా చర్యలు తీసుకుంటూ ఉంటారు. సెక్యూరిటీలను పెట్టుకుంటారు. కానీ మనోడి దొంగతనం గురించి తెలిస్తే మాత్రం పురుగుల మందు షాపుల వాళ్లు కూడా సెక్యూరిటీ పెట్టుకోవాల్సిందే.

అదేంటి ఫెర్టిలైజర్ షాపులేంటీ.. సెక్యూరిటీ ఏంటని డౌటనుమానం మీకు అక్కర్లేదు. మనోడి టార్గెట్ పురుగుల మందు షాపులే. వాటిలోనే వరుసగా చోరీలు చేస్తూ ఎట్టకేలకు దొరికిపోయాడు. ఇక అసలు వివరాల్లోకి వెళ్తే.. పల్నాడు జిల్లా పెదకూరపాడు మండలం అచ్చంపేటలో వరుస దొంగతనాలు కలకలం రేపాయి. పట్టపగలు వరుసగా చోరీలు జరగటంతో వ్యాపారులు బిత్తరపోయారు. అది కూడా పురుగులమందు షాపులే టార్గెట్‌గా చోరీలు జరగడం అక్కడి వారిని ఆశ్చర్యపరిచింది. రెండు షాపుల్లో సుమారు లక్ష రూపాయలు చోరీ జరగ్గా.. సీసీటీవీ కెమెరాలను పరిశీలించిన యజమానులు విస్తుపోయారు. ఆ రెండు ఫెర్టిలైజర్ షాపుల్లో దొంగతనం చేసిన ఓ మైనర్ బాలుడిగా గుర్తించారు.

ఆ తర్వాత ఆ బాలుడి కోసం గాలించిన షాపు యజమానులు.. ఎట్టకేలకు అదుపులోకి తీసుకున్నారు. అయితే ఫెర్టిలైజర్ షాపులనే అతను ఎందుకు టార్గెట్ చేశాడనేది తెలియడం లేదు. చోరీ చేసిన మైనర్ బాలుణ్ని అదుపులోకి తీసుకున్న షాపు యజమానులు.. పోలీసులకు అప్పగించారు. ఇక బాలుడి వెనుక ఎవరైనా ఉన్నారా లేదా అతనే ఈ చోరీలకు పాల్పడ్డాడా అనేది విచారణలో తెలియాల్సి ఉంది. మొత్తంగా పట్టపగలే ఫెర్టిలైజర్ షాపుల్లో వరుస చోరీలు జరగడంతో షాక్ తిన్న యజమానులు.. చివరకు సీసీటీవీ కెమెరాల ఆధారంగా అసలు దొంగను గుర్తించారు.