14 రోజులు బ్యాంకులు బంద్.. తెలుగు రాష్ట్రాల్లో ఎప్పుడెప్పుడు? పనులుంటే ముందే చూస్కొండి

మనకు బ్యాంకుల్లో ఎప్పుడూ ఏదో పని ఉంటూనే ఉంటుంది. సేవింగ్స్ అకౌంట్, శాలరీ అకౌంట్‌కు సంబంధించి డిపాజిట్లు, విత్‌డ్రా సహా బ్యాంక్ ఫిక్స్‌డ్ డిపాజిట్లు చేసేందుకు, ఇంకా ఏదైనా పొదుపు పథకంలో పెట్టుబడి పెట్టేందుకు, చెక్ బుక్స్, పాస్ బుక్ వంటి సేవలు పొందేందుకు.. లోన్లు తీసుకోవాలన్నా బ్యాంకులకు వెళ్లాల్సి ఉంటుంది. దీంట్లో ఎవరి పనికి వారే వెళ్లాల్సిన పరిస్థితులు ఉంటాయి. మరొకర్ని పంపిస్తే బ్యాంకులు అంగీకరించవన్న సంగతి తెలిసిందే. అందుకే బ్యాంకుల్లో ఏదైనా పని కోసం వెళ్లాలంటే.. ముందుగా బ్యాంక్ సెలవులపై అవగాహన ఉండాలి. బ్యాంక్ ఏరోజు పనిచేస్తుందో.. ఏరోజు సెలవు ఉందో తెలుసుకోవాలి. ఇప్పుడు ఫిబ్రవరి నెలలో ఇంకొన్ని రోజులే ఉన్నాయి. అందుకే ఇప్పుడు మార్చి నెలలో బ్యాంకులకు ఎన్ని రోజులు సెలవులు ఉన్నాయో చూద్దాం.

బ్యాంక్ సెలవుల్ని రిజర్వ్ బ్యాంక్ ఆఫ్ ఇండియా (RBI) నిర్ణయిస్తుంటుంది. ఇది అన్ని చోట్లా ఒకేలా ఉండవు. కొన్ని జాతీయ సెలవుల రోజు అన్ని బ్యాంకులకు సెలవు ఉండగా.. స్థానిక పండగల్ని బట్టి కొన్ని రాష్ట్రాల్లో బ్యాంకులకు సెలవులు ఉంటాయి. ఇప్పుడు ఇలా మార్చిలో 14 రోజులు బ్యాంకులకు సెలవులు ఉన్నాయి. వీటిల్లో ప్రాంతీయ సెలవులు సహా రెండో, నాలుగో శనివారాలు, ఆదివారాలు కూడా ఉన్నాయి. ఈ నెలలో ఛాప్‌ఛర్ కుట్ సహా మహాశివరాత్రి, హోలీ, గుడ్‌ఫ్రైడే వంటి పండగలు ఉన్నాయి.

తెలుగు రాష్ట్రాల విషయానికి వస్తే మహాశివరాత్రి నేపథ్యంలో మార్చి 8న సెలవు ఉంది. మార్చి 25న హోలీ సందర్భంగా సెలవు, మార్చి 29న గుడ్ ఫ్రైడే సందర్భంగా సెలవులు ఉన్నాయి. వీటికి అదనంగా రెండవ, నాల్గవ శనివారాలు సహా ఆదివారాలు ఉన్నాయి.

>> మార్చి 1న మిజోరంలో బ్యాంకులకు సెలవు ఉంది. ఇక్కడ ఛాప్‌ఛర్ కుట్ నేపథ్యంలో సెలవు ఉంది.

>> మార్చి 3న ఆదివారం కావడంతో బ్యాంకులకు హాలిడే ఉంది.

>> మార్చి 8న మహాశివరాత్రి సందర్భంగా చాలా చోట్ల బ్యాంకులకు సెలవు ఉంది.

>> మార్చి 9న రెండో శనివారం సందర్భంగా సెలవు ఉంది.

>> మార్చి 10న ఆదివారం కావడంతో సెలవు.

 >> మార్చి 12న రంజాన్ ప్రారంభం నేపథ్యంలో పలు చోట్ల సెలవు ఉంది.

>> మార్చి 17 ఆదివారం కావడంతో బ్యాంకులకు సెలవు ఉంది.

>> బిహార్ దివస్ నేపథ్యంలో మార్చి 22న బ్యాంకులకు పట్నాలో హాలిడే ఉంది.

>> భగత్‌సింగ్ మార్టిర్‌డమ్ డే నేపథ్యంలో పలు రాష్ట్రాల్లో మార్చి 23న బ్యాంకులకు సెలవు ఉంది. ఇదే రోజు నాలుగో శనివారం కూడా.

>> మార్చి 24న ఆదివారం సందర్భంగా సెలవు

>> హోలీ నేపథ్యంలో మార్చి 25న చాలా చోట్ల బ్యాంకులకు సెలవు ఉంది.

>> హోలీ సందర్భంగా మార్చి 26న ఒడిశా, మణిపుర్, బిహార్‌లో సెలవు ఉంది.

>> మార్చి 27న బిహార్‌లో హోలీ సందర్భంగా అక్కడ సెలవు ఉంది.

>> గుడ్‌ ఫ్రైడే నేపథ్యంలో మార్చి 29న చాలా చోట్ల బ్యాంకులకు సెలవు ఉంది.

>> మార్చి 31 ఆదివారం కావడంతో దేశవ్యాప్తంగా ఈ రోజు బ్యాంకులకు సెలవు ఉంది.

బ్యాంకులకు సెలవులు ఉన్నా కూడా ఆన్‌లైన్‌ బ్యాంకింగ్, నెట్ బ్యాంకింగ్, మొబైల్ బ్యాంకింగ్ వంటి వాటి ద్వారా బ్యాంకు పనులు చాలా వరకు చేసుకునే వెసులుబాటు ఉంటుంది. ఇంకా ఏటీఎంలు, డిపాజిట్ మెషీన్లు అందుబాటులో ఉన్నాయి. ఇవి యథావిధిగా పనిచేస్తాయి.