వేరే గ్రహానికి వెళ్లి రిపోర్టు తేవాలా..? హైకోర్టు అసహనం

ఆంధ్రప్రదేశ్‌లో అక్రమ మైనింగ్ మీద హైకోర్టు సీరియస్ అయ్యింది. అధికారులు తప్పు చేసినట్లు తేలితే వారే బాధ్యత వహించాల్సి ఉంటుందని హెచ్చరించింది. ఇదే సమయంలో నివేదిక సమర్పించేందుకు రెండు వారాల సమయం సరిపోదన్న ప్రభుత్వ న్యాయవాదిపై అసహనం వ్యక్తం చేసింది. రిపోర్టు తేవడానికి వేరే ఏదైనా ఉపగ్రహానికి వెళ్లాలా అంటూ వ్యాఖ్యానించింది. రెండు వారాల్లోపు నివేదిక సమర్పించాలని స్పష్టం చేసింది.

ఈ కేసుకు సంబంధించిన పూర్తి వివరాల్లోకి వెళ్లే.. గుంటూరు జిల్లా చేబ్రోలు మండలం వీరంకినాయుడుపాలెంలో అక్రమ మైనింగ్‌ జరుగుతోందని ప్రభుదాస్ అనే వ్యక్తి హైకోర్టులో ప్రజా ప్రయోజన వ్యాజ్యం దాఖలు చేశారు. రెండు ఎకరాలకు అనుమతి తీసుకుని, 60 ఎకరాలకు ఫెన్సింగ్ వేసి అక్రమంగా మైనింగ్ చేస్తున్నారని పిటిషన్‌లో పేర్కొన్నారు. ఈ పిల్ మీద ఏపీ హైకోర్టు బుధవారం విచారణ జరిపింది. ఈ సందర్భంగా అక్రమ మైనింగ్‌కు సంబంధించిన ఫోటోలను పిటిషనర్ తరుఫు న్యాయవాది కోర్టుకు సమర్పించారు. వీటిని పరిశీలించిన ఉన్నత న్యాయస్థానం.. డీకే పట్టా భూముల్లో మైనింగ్‌ ఎలా చేస్తారని ప్రశ్నించింది. ఫిర్యాదులు వస్తున్నా ఎందుకు పట్టించుకోవట్లేదని అధికారులను ప్రశ్నించింది.

అనంతరం రెండు వారాల్లోగా దీనికి సంబంధించిన స్టేటస్ రిపోర్టు ఇవ్వాలంటూ గనులశాఖ అధికారులను ఆదేశించంది. అయితే రెండు వారాల సమయం సరిపోదంటూ ప్రభుత్వ న్యాయవాది సమాధానం ఇవ్వటంతో కోర్టు ఆగ్రహం వ్యక్తంచేసింది. ఏదైనా ఉపగ్రహానికి వెళ్లి రిపోర్టు తీసుకురావాలా అంటూ ప్రశ్నించింది. నివేదికలో తేడాలు ఉంటే స్థానిక న్యాయాధికారితో విచారణ జరిపిస్తామని స్పష్టం చేసింది. అవసరమయ్యే పరిస్థితుల్లో గనులశాఖ ముఖ్య కార్యదర్శి సహా అధికారులను కోర్టుకు పిలిపిస్తామంటూ హెచ్చరించింది. తప్పులుంటే అధికారులదే బాధ్యతని హైకోర్టు స్పష్టం చేసింది.