నెల్లూరులో వైసీపీకి మరో షాక్.. మాజీ మంత్రి అనిల్ కుమార్ బాబాయి రూప్‌కుమార్, 4 కార్పొరేటర్లు రాజీనామా

నెల్లూరులో వైఎస్సార్‌సీపీకి షాక్‌ తగిలింది. నెల్లూరు నగరపాలక సంస్థ డిప్యూటీ మేయర్‌, మాజీ మంత్రి అనిల్ కుమార్ యాదవ్ బాబాయి రూప్‌కుమార్‌తో పాటు నలుగురు కార్పొరేటర్లు, మైనార్టీ నేతలు పార్టీకి రాజీనామా చేశారు. వైఎస్సార్‌సీపీ ప్రభుత్వంపై ప్రజల్లో వ్యతిరేకత, పార్టీలో నెలకొన్న పరిస్థితుల కారణంగానే గుడ్ బై చెప్పాల్సి వస్తోందన్నారు. ఇటీవల జరిగిన పరిణామాలు బాధించాయని చెప్పారు. వైఎస్సార్‌సీపీ ఆవిర్భావం నుంచి సేవ చేశానని.. పార్టీ కోసం కష్టపడ్డాం.. పోరాడాం.. సొంతదిగా అనుకున్నామన్నారు. తప్పనిసరి పరిస్థితుల్లో రాజీనామా చేస్తున్నామని.. తనను ఆదరించిన నెల్లూరు నగర ప్రజలు, నాయకులకు కృతజ్ఞతలు తెలిపారు భవిష్యత్‌ కార్యాచరణపై అనుచరులతో చర్చించి నిర్ణయం తీసుకుంటానని తెలిపారు.

నెల్లూరు జిల్లా వైఎస్సార్‌సీపీ కోసం ఎంతో కష్టపడ్డామన్నారు. ఓదార్పు యాత్ర, ప్రజాసంకల్ప యాత్ర కోసం పని చేశామని గుర్తు చేసుకున్నారు. పార్టీ ఆశీస్సులతో ఈ స్థాయికి వచ్చామంటే జగన్ కారణం అన్నారు. పార్టీలో సముచితమైన స్థానం ఇచ్చారని.. కానీ ఏడాదిన్నరగా జరుగుతున్న పరిణామాలు మాత్రం తమను బాధించాయన్నారు. అందుకే పార్టీని వీడాల్సి వస్తుందన్నారు రూప్‌కుమార్. బాబాయి రూప్‌కుమార్‌కు కొంతకాలంగా అబ్బాయి మాజీ మంత్రి అనిల్ కుమార్ యాదవ్ మధ్య విభేదాలు నడిచాయి. తన అనుచరులపైనా దాడులు జరిగాయని రూప్‌కుమార్ ఆరోపించారు.. ఆ తర్వాత పార్టీలో ఎవరి పని వారు చేసుకుంటున్నారు. ఇంతలో మాజీ మంత్రి అనిల్ కుమార్ యాదవ్‌ను నెల్లూరు నుంచి నరసరావుపేట ఎంపీ అభ్యర్థిగా ప్రకటించారు. అలాగే నెల్లూరు సిటీ అభ్యర్థిగా డిప్యూటీ మేయర్ మహ్మద్ ఖలీల్ అహ్మద్‌ నియమించారు. ఇలా పరిణామాలు మారిపోయాయి.

ఇంతలో వైఎస్సార్‌సీపీ రాజ్యసభ సభ్యుడు వేమిరెడ్డి ప్రభాకర్ రెడ్డి వైఎస్సార్‌సీపీకి రాజీనామా చేశారు. ఆయనకు రూప్‌కుమార్ కూడా మద్దతు తెలిపారు. ఆయనతో కలిసి టీడీపీ నాయకుల్ని కూడా కలిశారు. ఈ క్రమంలో రూప్‌కుమార్ కూడా వేమిరెడ్డితో కలిసి ఈ నెల 2న టీడీపీలో చేరతానే ప్రచారం జరుగుతోంది. ఆయన మాత్రం త్వరలోనే భవిష్యత్ కార్యాచరణను ప్రకటిస్తానంటున్నారు.మొత్తం మీద నెల్లూరు రాజకీయాలు ఇప్పుడు హాట్ టాపిక్‌గా మారాయి.