సీఎం జగన్ సభకు వెళ్లిన ఆర్టీసీ బస్ మిస్సింగ్.. తీరా ఆరా తీస్తే, ఇదేందయ్యా డ్రైవర్
Andhra Pradesh Telugu | Suryaa Desk | Published : Wed, Feb 28, 2024, 07:51 PM
చిత్తూరు జిల్లా కుప్పంలో ఈ నెల 26న జరిగిన సీఎం జగన్‌మోహన్‌రెడ్డి సభకు జన సమీకరణకు వెళ్లిన ఓ ఆర్టీసీ బస్సు మాయమైంది. దీంతో అధికారులు ఉరుకులు, పరుగులు పెట్టారు. 24 గంటల తర్వాత బస్సు ఆచూకీ లభ్యం కావడంతో అధికారులు ఊపిరి పీల్చుకున్నారు. ఈ నెల 26 కుప్పం నియోజకవర్గంలోని శాంతిపురం మండలంలో సీఎం పాల్గొనే బహిరంగ సభకు జనసమీకరణ కోసం తిరుపతిలోని అలిపిరి డిపోకు చెందిన ఏపీ03జడ్‌ 0255 నంబర్‌ గల సప్తగిరి ఎక్స్‌ప్రెస్‌ బస్సు ఈ నెల 25న ఆదివారం సాయంత్రం కుప్పం వెళ్లింది.
సోమవారం సభ ముగిసిన తర్వాత తిరిగి రాలేదు. దీంతో డ్రైవర్‌ను సంప్రదించేందుకు యత్నించినా ఫలితం కనిపించలేదు. దీంతో అధికారులు బస్సు ఆచూకీ కోసం జీపీఎస్‌తో వెతికించారు. కుప్పం, అలిపిరి డిపోల నుంచి పలువురు సిబ్బంది సోమవారం సాయంత్రం నుంచి ఆ పని మీద పరుగులు తీశారు. ఆ బస్సు వి.కోట మండలం చింతలగుంటలోని ఓ ఇంటి ఎదుట నిలిపి ఉన్నట్లు గుర్తించి ఉన్నతాధికారులకు సమాచారం అందించారు. అదే ఊరికి చెందిన ఆర్టీసీ డ్రైవరు డీఆర్‌ఎస్‌ రెడ్డి తన ఇంటి దగ్గరే బస్సు నిలిపి ఉంచినట్లు అధికారులు గుర్తించారు. ఆయన మద్యం తాగి బస్సును తెచ్చి ఇంటి దగ్గర ఉంచినట్లు ప్రాథమికంగా గుర్తించినట్లు తెలుస్తోంది. ఈ వ్యహారానికి సంబంధించిన పూర్తి వివరాలు తెలియాల్సి ఉంది.
|
|