టీడీపీ, జనసేన సూపర్ హిట్.. వైసీపీ అట్టర్ ఫ్లాప్.. సినిమా చూపిస్తా.. చంద్రబాబు పవర్ పంచులు

టీడీపీ, జనసేన కూటమి అధికారంలోకి వస్తే.. వైసీపీకి సినిమా చూపిస్తామని టీడీపీ అధినేత చంద్రబాబు అన్నారు. టీడీపీ, జనసేన కూటమిని సూపర్ హిట్‌గా అభివర్ణించిన చంద్రబాబు.. వైసీపీ ఐదేళ్ల పాలన అట్టర్ ఫ్లాప్ అంటూ ఎద్దేవా చేశారు. తాడేపల్లిగూడెంలో టీడీపీ , జనసేన ఉమ్మడిగా నిర్వహించిన జెండా సభ వేదికగా మాట్లాడిన చంద్రబాబు.. వైసీపీ విముక్త ఆంధ్రప్రదేశ్‌ కోసమే టీడీపీ, జనసేన పార్టీలు కలిశాయని తెలిపారు. వచ్చే ఎన్నికలు ఏపీకి ఎంతో కీలకమన్న చంద్రబాబు.. వైసీపీపై టీడీపీ, జనసేన కార్యకర్తలు కలిసి పోరాడాలని సూచించారు.

హైదరాబాద్ కంటే మిన్నగా ఉండాలని అమరావతి రాజధానికి ప్రణాళిక సిద్ధం చేశామన్న చంద్రబాబు.. జగన్ సీఎం అయ్యాక అరాచకపాలనతో నాశనం చేశారని మండిపడ్డారు. ప్రజాస్వామ్యాన్ని జగన్‌ అపహాస్యం చేశారన్న చంద్రబాబు.. మహానటుడు చిరంజీవిని సైతం అవమానించారని అన్నారు. వైసీపీ వేధింపులు తట్టుకోలేక క్రికెటర్‌ హనుమ విహారి పారిపోయే పరిస్థితి వచ్చిందని మండిపడ్డారు. సొంత చెల్లెలు షర్మిలను సైతం తరిమేశారని చంద్రబాబు విమర్శించారు. జగన్ అరాచకాలకు ముగింపు పలకాల్సిన సమయం వచ్చిందన్న చంద్రబాబు.. అట్టర్ ఫ్లాప్ సినిమాలకు సీక్వెల్ ఉండదనీ, అలాగే వైసీపీ మరోసారి అధికారంలోకి వచ్చేదీ ఉండదని అన్నారు.

కుప్పం ప్రాంతానికి నీళ్ల పేరిట జగన్‌ నాటకాలు వేశారన్న చంద్రబాబు.. ఒక్క రోజులోనే అంతా సర్దుకొని పోయారని సెటైర్లు వేశారు. వచ్చే ఎన్నికల్లో కుప్పం నియోజకవర్గంలో తనకు లక్ష ఓట్ల మెజారిటీ ఖాయమని చంద్రబాబు ధీమా వ్యక్తం చేశారు. టీడీపీ, జనసేన కూటమి విన్నింగ్ టీమ్ అని చెప్పిన చంద్రబాబు .. వైసీపీ చీటింగ్ టీమ్ అంటూ ఎద్దేవా చేశారు. అగ్నికి వాయువు తోడైనట్లు.. టీడీపీకి జనసేన, పవన్ కళ్యాణ్ తోడయ్యారన్న చంద్రబాబు.. ఇక ఏపీ అన్‌స్టాపబుల్ అంటూ వ్యాఖ్యానించారు. సభ చూశాక ఎన్నికల్లో విజయం ఖాయమని అర్థమైందన్న టీడీపీ అధినేత.. సీట్లు రాని వారికి న్యాయం చేస్తామని హామీ ఇచ్చారు. మరోవైపు ఈ సభకు సుమారు 7 లక్షల మంది హాజరైనట్లు టీడీపీ, జనసేన పార్టీ వర్గాలు తెలిపాయి.