మోదీ సర్కార్ కీలక నిర్ణయం.. ప్రభుత్వ పదవుల్లోకి 25 మంది ప్రైవేటు రంగ నిపుణులు

దేశంలో పరిపాలనా సౌలభ్యాన్ని మరింత మెరుగుపరిచేందుకు, కేంద్ర ప్రభుత్వంలో ప్రైవేటు వ్యక్తుల ప్రతిభను ఉపయోగించుకునేందుకు కేంద్రంలో అధికారంలో ఉన్న నరేంద్ర మోదీ ప్రభుత్వం కీలక నిర్ణయం తీసుకుంది. 25 మంది ప్రైవేటు రంగ నిపుణులు త్వరలోనే కేంద్రం ప్రభుత్వంలోని కీలక పదవుల్లో చేరనున్నట్లు అధికార వర్గాలు శుక్రవారం వెల్లడించాయి. ప్రభుత్వం తీసుకునే విధానపరమైన నిర్ణయాల్లో వీరు భాగస్వాములు కానున్నట్లు కేంద్ర ప్రభుత్వ వర్గాలు తెలిపాయి. లేటరల్ ఎంట్రీ ద్వారా ఈ 25 మంది ప్రైవేటు రంగ నిపుణులను ప్రభుత్వంలోకి తీసుకోనున్నట్లు పేర్కొన్నాయి. ప్రభుత్వ విధానపరమైన నిర్ణయాల రూపకల్పనలో ఈ అధికారులు కీలక పాత్ర పోషించనున్నారని వెల్లడించాయి.

వివిధ కేంద్ర ప్రభుత్వ శాఖల్లో ముగ్గురు జాయింట్ సెక్రటరీలు, 22 మంది డైరెక్టర్లు లేదా డిప్యూటీ సెక్రటరీల నియామకానికి ప్రధాని నరేంద్ర మోదీ నేతృత్వంలోని అపాయింట్‌మెంట్స్ కమిటీ ఆఫ్ క్యాబినెట్ ఆమోదం తెలిపిందని కేంద్ర ప్రభుత్వ వర్గాలు తాజాగా వెల్లడించాయి. సాధారణంగా జాయింట్ సెక్రటరీలు, డైరెక్టర్లు, డిప్యూటీ సెక్రటరీ వంటి పదవులను ఆల్ ఇండియా సర్వీసెస్ అధికారులతో భర్తీ చేస్తున్నారు. అంటే ఐఏఎస్, ఐపీఎస్, ఐఎఫ్ఓఎస్‌ అధికారులతోపాటు గ్రూప్ ఏ ఉద్యోగులు ఈ పదవుల్లో ఉండేవారు. తాజాగా వారి స్థానాలను ప్రైవేటు రంగ నిపుణులు భర్తీ చేయనున్నారు.

ప్రభుత్వంలో కొత్తవారి ప్రతిభను వినియోగించుకోవడం.. పాలనలో సౌలభ్యాన్ని పెంచుకునేందుకే కేంద్ర ప్రభుత్వం ఈ నిర్ణయం తీసుకుందని అధికారులు వెల్లడించారు. 2018లో ప్రారంభమైన ఈ లేటరల్ ఎంట్రీ పథకం కింద.. జాయింట్ సెక్రెటరీ, డైరెక్టర్, డిప్యూటీ సెక్రటరీ స్థాయిలో రిక్రూట్‌మెంట్లు జరుగుతాయని పేర్కొన్నారు. ఈ ప్రక్రియ ద్వారా వచ్చే అధికారులు ప్రభుత్వ వ్యవస్థలో భాగం అయిపోయి.. విధాన పరమైన నిర్ణయాల్లో వీరు కీలక పాత్ర పోషిస్తారని చెప్పారు. 2018 జూన్‌లో తొలిసారిగా 10 జాయింట్ సెక్రటరీ ర్యాంక్ పోస్టులకు లేటరల్ ఎంట్రీ విధానంలో ప్రభుత్వం దరఖాస్తులను ఆహ్వానించింది.

యూనియన్ పబ్లిక్ సర్వీస్ కమిషన్-యూపీఎస్సీ ద్వారా ఈ పోస్టుల నియామకం జరిగింది. 10 మంది జాయింట్ సెక్రటరీలు, 28 మంది డైరెక్టర్లు లేదా డిప్యూటీ సెక్రటరీలతో సహా మొత్తం 38 మంది ప్రైవేట్ సెక్టార్ ఎక్స్‌పర్ట్స్‌ ఇప్పటి వరకు ప్రభుత్వంలో చేరినట్లు కేంద్ర ప్రభుత్వ అధికారులు వెల్లడించారు. ప్రస్తుతం 8 మంది జాయింట్ సెక్రటరీలు, 16 మంది డైరెక్టర్లు, 9 మంది డిప్యూటీ సెక్రటరీలు సహా 33 మంది నిపుణులు కీలకమైన ప్రభుత్వ శాఖల్లో పనిచేస్తున్నారని.. ఇద్దరు జాయింట్ సెక్రటరీలు తమ 3 ఏళ్ల పదవీ కాలాన్ని పూర్తి చేసుకున్నారని స్పష్టం చేశారు. ఈ విధానంలో వివిధ రంగాలకు చెందిన నిష్ణాతులు గానీ.. ప్రైవేటు రంగానికి చెందిన వ్యక్తులు గానీ.. రాష్ట్ర ప్రభుత్వ లేదా స్వతంత్ర వ్యవస్థలు లేదా పబ్లిక్‌ సెక్టార్‌ అండర్‌టేకింగ్‌ సంస్థలకు చెందిన వ్యక్తులను నియమించనున్నారు.