దేశంలోనే తొలి అండర్‌వాటర్ మెట్రోరైలు సేవలు ప్రారంభించనున్న మోదీ

ఇప్పటివరకు దేశంలో చాలా నగరాల్లో మెట్రో రైళ్లు అందుబాటులో ఉన్నాయి. నగరాల్లో ఉండే ట్రాఫిక్‌ సమస్యలను తీర్చి ప్రయాణికులను వేగంగా గమ్యస్థానాలకు చేర్చేందుకు అత్యాధునిక టెక్నాలజీ, సౌకర్యాలతో ఈ మెట్రో రైళ్లను ఏర్పాటు చేశారు. అయితే తాజాగా మన దేశంలోనే మొట్టమొదటిసారిగా నీటి అడుగున పరిగెత్తే మెట్రో రైలు సేవలు అందుబాటులోకి రానున్నాయి. ఈ మెట్రో రైలు మార్గాన్ని ప్రధానమంత్రి నరేంద్ర మోదీ.. బుధవారం ప్రారంభించి జాతికి అంకితం ఇవ్వనున్నారు. పశ్చిమ బెంగాల్‌లోని కోల్‌కతా నగరంలో ఈ అండర్ వాటర్ మెట్రో రైలు సేవలు అందుబాటులోకి రానున్నాయి. హుగ్లీ నది కింద నిర్మించిన ఈ మెట్రో టన్నెల్ గుండా మెట్రో రైళ్లు దూసుకెళ్లనున్నాయి.

హౌరా మైదాన్‌ - ఎస్‌ప్లనేడ్‌ మెట్రో స్టేషన్‌లను కలుపుతూ 4.8 కిలోమీటర్ల మేర నిర్మించిన ఈ గ్రీన్‌లైన్‌ను ప్రధాని నరేంద్ర మోదీ బుధవారం ప్రారంభించనున్నారు. ఇది కోల్‌కతా తూర్పు-పశ్చిమ మెట్రో కారిడార్‌లో ఒక భాగం. హౌరా మైదాన్ - ఎస్‌ప్లనేడ్ మార్గంలో మొత్తం 3 స్టేషన్లు ఉన్నాయి. హౌరా మైదాన్‌, హౌరా స్టేషన్‌ కాంప్లెక్స్‌, బీబీడీ బాగ్‌. ఇక కోల్‌కతా మెట్రోలో హౌరా మైదాన్‌ - ఎస్‌ప్లనేడ్‌ మార్గం ఎంతో ప్రత్యేకమైంది. ఎందుకంటే ఇది దేశంలోనే ఒక నది కింద నిర్మించిన అతి పెద్ద టన్నెల్‌. ఇక ఈ మార్గంలో ఉన్న హౌరా మెట్రో స్టేషన్ మన దేశంలోనే అత్యంత లోతులో నిర్మించిన మెట్రో స్టేషన్‌గా రికార్డుల్లోకి ఎక్కింది. నీటి అడుగున 16 మీటర్ల లోతులో నిర్మించిన టన్నెల్ గుండా మెట్రో రైళ్లు పరిగెత్తనున్నాయి.

ఇక ఈ హౌరా మైదాన్-ఎస్‌ప్లనేడ్ మెట్రో రైలు మార్గం గురించిన విషయాలను కోల్‌కతా మెట్రో రైలు జీఎం ఉదయ్‌కుమార్‌ రెడ్డి వెల్లడించారు. ఇది ఒక ఇంజినీరింగ్ అద్భుతమని పేర్కొన్నారు. ఈ మార్గంలో నిత్యం దాదాపు 7లక్షల మంది ప్రయాణికులు మెట్రో రైళ్లలో ప్రయాణం చేస్తారని అంచనా వేస్తున్నట్లు తెలిపారు. ప్రధాని నరేంద్ర మోదీ ఈ మెట్రో రైలు మార్గాన్ని బుధవారం ప్రారంభించనుండగా.. ఆ తర్వాతి రోజు అంటే మార్చి 7 వ తేదీ నుంచి ప్రయాణికులను అనుమతిస్తామని కోల్‌కతా మెట్రో రైల్‌ సీపీఆర్వో కౌశిక్‌ మిత్రా వెల్లడించారు.

ఇక మన దేశంలో తొలిసారి మెట్రో రైలు సేవలు అందుబాటులోకి వచ్చింది కోల్‌కతా నగరంలోనే ప్రారంభం అయ్యాయి. 1984 లోనే కోల్‌కతా మెట్రో రైలు పట్టాలెక్కగా... తాజాగా నది గర్భంలో అండర్ వాటర్ మెట్రో రైలు పరుగులు పెట్టడంతో మరో రికార్డును కూడా సొంతం చేసుకుంది. ఇక ఇప్పుడు అందుబాటులోకి రానున్న కోల్‌కతా తూర్పు - పశ్చిమ మెట్రో మార్గం మొత్తం 16.6 కిలోమీటర్లు కాగా.. ఇందులో 10.8 కిలోమీటర్లు భూగర్భంలోనే ఉంటుంది. ఇందులో 4.8 కిలోమీటర్లు హుగ్లీ నది కింద టన్నెల్‌లో ఉండగా.. మిగిలింది భూ ఉపరితలంపై ఉంటుంది.

ఈ కోల్‌కతా తూర్పు-పశ్చిమ మెట్రో కారిడార్‌ నిర్మాణంలో భాగంగా రూ.120 కోట్లతో ఈ సొరంగ రైలుమార్గాన్ని నిర్మించారు. 520 మీటర్ల పొడవు ఉన్న ఈ టన్నెల్‌ను మెట్రో రైలు 45 సెకన్లలో దాటేస్తుంది. లండన్‌-ప్యారిస్‌ కారిడార్‌లోని యూరోస్టార్‌ సర్వీస్ లాగా ఈ సొరంగమార్గాన్ని నిర్మించారు. హుగ్లీ నది కింద నిర్మించిన ఈ అండర్ వాటర్ మెట్రో ద్వారా హౌరా, కోల్‌కతా జంట నగరాలకు సులభంగా రాకపోకలు సాగించవచ్చు. ఈ మార్గం మొత్తంలో 6 స్టేషన్లు ఉండగా.. 3 స్టేషన్లు నీటి అడుగున, మరో 3 స్టేషన్లు భూమిపైన ఉండనున్నాయి. ఈ కోల్‌కతా తూర్పు-పశ్చిమ మెట్రో కారిడార్‌కు 2009 ఫిబ్రవరిలో శంకుస్థాపన చేయగా.. అండర్‌ వాటర్‌ మెట్రో టన్నెల్‌ నిర్మాణం మాత్రం 2017లో ప్రారంభమైంది.