ఏపీ మహిళల అకౌంట్‌లలోకి డబ్బులు.. అనకాపల్లిలో సీఎం జగన్ షెడ్యూల్ ఇలా

ఏపీలో మహిళలకు సంబంధించిన మరో పథకానికి సంబంధించిన డబ్బుల్ని ఏపీ ముఖ్యమంత్రి వైఎస్ జగన్ విడుదల చేయనున్నారు. గురువారం (మార్చి 07న) అనకాపల్లి జిల్లాలో పర్యటించనున్నారు. వైఎస్సార్‌ చేయూత నాలుగో విడత నిధులను సీఎం విడుదల చేయనున్నారు.సీఎం ప్రత్యేక విమానంలో ఉదయం 10.20 గంటలకు విశాఖ ఎయిర్‌పోర్టుకు వస్తారు. అక్కడి నుంచి హెలికాప్టర్‌లో బయలుదేరి 10.45 గంటలకు కశింకోట మండలం ఎంపీడీవో కార్యాలయం వద్ద ఏర్పాటు చేసిన హెలిప్యాడ్‌ వద్దకు చేరుకుంటారు. స్థానిక ప్రజాప్రతినిధులతో 10 నిమిషాల పాటు ముచ్చటిస్తారు. అక్కడి నుంచి రోడ్డు మార్గాన ప్రయాణించి 11.15 గంటలకు పిసినికాడ వద్ద గల సభావేదిక వద్దకు చేరుకుంటారు.

11.20 గంటలకు వేదికపై మహానేత వైఎస్సార్‌ విగ్రహానికి నివాళులర్పిస్తారు. 11.40 గంటల నుంచి 12.40 గంటల వరకు గంట పాటు సీఎం ప్రసంగిస్తారు. అనంతరం వైఎస్సార్‌ చేయూత చివరి విడత నిధుల పంపిణీని బటన్‌ నొక్కి ప్రారంభిస్తారు. మహిళామార్ట్‌లో ఉత్తమ ప్రతిభ కనబరిచిన వారికి అవార్డులు ప్రదానం చేస్తారు. మధ్యాహ్నం 12.55 గంటలకు బయలుదేరి కశింకోటలో హెలిప్యాడ్‌ వద్దకు చేరుకుంటారు. గంటసేపు ప్రజాప్రతినిధులతో ముచ్చటించిన అనంతరం 2.10 గంటలకు హెలికాప్టర్‌లో బయలుదేరి విశాఖ ఎయిర్‌పోర్టుకు చేరుకుంటారు. అక్కడ నుంచి 2.35 గంటలకు విమానంలో గన్నవరం ఎయిర్‌పోర్టుకు తిరుగుపయనమవుతారు

వైఎస్సార్ చేయూత పథకంలో లబ్ధిదారులుగా ఉన్న ఎస్సీ, ఎస్టీ, బీసీ, మైనార్టీ మహిళలకు ఏడాదికి రూ.18,750 ఇస్తున్నారు. ఇప్పుటికే మూడు విడతలుగా నిధులు విడుదల చేయగా.. ఇప్పుడు చివరి విడత నిధులను జమ చేస్తున్నారు. ఈ చేయూత పథకం కింద మొత్తం 31 లక్షల 23 వేల 466 మంది మహిళలు లబ్ధిదారులుగా ఉండగా.. ఇప్పటివరకు ఈ పథకం ద్వారా రూ.14, 129 కోట్లు అందించారు. ఏపీలో ఎన్నికల వేళ వైఎస్సార్ చేయూత లబ్ధిదారులకు వైఎస్ జగన్ పేరుతో నిధులతో పాటు లేఖల్ని వాలంటీర్లు అందిస్తారు.

ఎస్సీ, ఎస్టీ, బీసీ, మైనార్టీలకు సంబంధించి 45 ఏళ్ల నుంచి 60 ఏళ్ల వయసున్న మహిళలు మాత్రమే ఈ పథకానికి అర్హులు. ఆధార్ కార్డ్, తెల్ల రేషన్ కార్డు, బ్యాంకు అకౌంట్ ఉండాలి. గ్రామీణ ప్రాంతంలో ఆదాయం రూ.10వేలు, పట్టణ ప్రాంతంలో అయితే రూ.12వేలకు మించకూడదు. అంతేకాదు మొత్తం కుటుంబానికి 3 ఎకరాల మాగాణి లేదా 10 ఎకరాల మెట్ట లేదా మాగాణి మెట్ట కలిపి పది ఎకరాలకు మించకూడదు. ప్రభుత్వ ఉద్యోగులు, ప్రభుత్వం నుంచి పించన్ తీసుకునేవారు కూడా అర్హులు కాలేదు. ఇంటి కరెంట్ వినియోగ బిల్ సరాసరి 300 యూనిట్లకు లోబడి ఉండాలి. పట్టణ ప్రాంతాల్లో ఎవరికైనా 750 చదరపు గజాలలోపు ఉండాలి. ఆదాయపు పన్ను చెల్లించేవారు.. ఫోర్ వీలర్ ఉన్నవాళ్లు అనర్హులు. ఈ ఏడాదికి సంబంధించిన కొత్త దరఖాస్తుల ప్రక్రియ గతేడాది డిసెంబర్‌లోనే పూర్తైంది. వెరిఫికేషన్ ప్రక్రియ కూడా డిసెంబర్‌లోనే పూర్తి చేశారు.