విశాఖలో చిరుత పులి చర్మం కలకలం,,,,నలుగుర్ని అదుపులోకి తీసుకున్న అధికారులు
Andhra Pradesh Telugu | Suryaa Desk | Published : Wed, Mar 13, 2024, 09:24 PM
విశాఖలో చిరుత పులి చర్మం కలకలంరేపింది. నలుగురు వ్యక్తులు చిరుత చర్మాన్ని అక్రమంగా తరలిస్తున్నట్లు డీఆర్‌ఐ వర్గాలకు అందిన సమాచారం వచ్చింది. వారు వెంటనే రంగంలోకి దిగి నిందితుల్ని పట్టుకున్నారు. సర్క్యూట్‌ హౌస్‌ సమీపంలోని దసపల్లా హిల్స్‌ ప్రాంతంలో వీరిని గుర్తించారు. చిక్కిన నలుగురిలో ఇద్దరిది విశాఖ. మరో ఇద్దరు ఒడిశా రాష్ట్రానికి చెందిన వారు. వీరు పులి చర్మాన్ని ఎక్కడి నుంచి ఎక్కడికి తరలిస్తున్నారు.. ఇందులో ఎవరెవరి హస్తం ఉంది వంటి వివరాలు తెలుసుకున్నారు.
అనంతరం డీఆర్‌ఐ అధికారుల ఆధీనంలో ఉన్న స్మగ్లర్లను అటవీశాఖ అధికారులకు అప్పగించారు. దీంతో డీఎఫ్‌వో అనంత్‌ శంకర్‌, ఎఫ్‌ఆర్‌వో రామ్‌ నరేశ్‌, ఇతర అధికారులు మంగళవారం అర్ధరాత్రి వరకూ నిందితులను ప్రశ్నించారు. ఏ అటవీ ప్రాంతం నుంచి తీసుకువచ్చారు, చిరుతను ఎక్కడ చంపారు అనే వివరాలు రాబట్టినట్లు తెలుస్తోంది. పూర్తిస్థాయి వివరాలను అధికారులు వెల్లడించాల్సి ఉంది. పులి చర్మం కొలతలు తీసుకున్నారు. ప్రస్తుతం అటవీశాఖ అదుపులో ఉన్న స్మగ్లర్లపై కేసు నమోదు చేసి ఇవాళ కోర్టులో హాజరుపర్చనున్నారు.
|
|