నెల్లూరు జిల్లాలో వైసీపీకి మరోషాక్.. పార్టీని వీడిన మరో "రెడ్డి"

 ఎన్నికలు దగ్గరపడుతున్న కొద్దీ నెల్లూరు జిల్లాలో అధికార వైఎస్‌ఆర్‌సీపీకి షాకులు తగులుతూనే ఉన్నాయి. కీలక నేతలు అందరూ పార్టీని వీడుతున్నారు. ఇప్పటికే ఆనం రాంనారాయణరెడ్డి, కోటంరెడ్డి శ్రీధర్ రెడ్డి, వేమిరెడ్డి ప్రభాకర్ రెడ్డి వంటి నేతలు వైసీపీని వీడి టీడీపీ గూటికి చేరారు . ఇక ఆనం రాంనారాయణరెడ్డి, కోటంరెడ్డి శ్రీధర్ రెడ్డిలకు టికెట్లు కూడా దక్కాయి. వేమిరెడ్డి ప్రభాకర్ రెడ్డి సతీమణి వేమిరెడ్డి ప్రశాంతికి సైతం కోవూరు టికెట్ దక్కింది. అయితే ఈ క్రమంలోనే నెల్లూరు జిల్లాలో మరో వైసీపీ నేత కూడా ఫ్యాన్ పార్టీకి రాజీనామా చేశారు. రేపో, మాపో టీడీపీలో చేరతారని సమాచారం.

నెల్లూరు జిల్లా కావలి మాజీ ఎమ్మెల్యే వంటేరు వేణుగోపాల్ రెడ్డి వైసీపీని వీడారు. వైఎస్ఆర్‌సీపీ ప్రాథమిక సభ్యత్వానికి రాజీనామా చేస్తున్నట్టు వంటేరు వేణుగోపాల్ రెడ్డి శుక్రవారం మీడియా సమావేశంలో ప్రకటించారు. పదేళ్లుగా వైసీపీ విజయం కోసం పనిచేస్తుంటే తనను గుర్తించడం లేదని వంటేరు వేణుగోపాల్ రెడ్డి ఆవేదన వ్యక్తం చేశారు. ఆత్మాభిమానం చంపుకుని పార్టీలో ఉండలేనని.. అందుకే వైసీపీకి రాజీనామా చేస్తున్నట్లు ప్రకటించారు. అన్ని పార్టీల నుంచి ఆహ్వానం ఉందన్న వంటేరు వేణుగోపాల్ రెడ్డి.. ఏ పార్టీలో చేరేదీ త్వరలోనే చెప్తానని అన్నారు.

మరోవైపు 2014, 2019 ఎన్నికల్లో కావలి, ఉదయగిరిలలో వైఎస్ఆర్సీపీ విజయం కోసం వంటేరు వేణుగోపాల్ రెడ్డి కృషి చేశారు. పార్టీ తనకు టికెట్ కేటాయించకపోయినా వైసీపీ అభ్యర్థుల విజయానికి పనిచేశారు. అయితే ఈసారైనా టికెట్ వస్తుందనే ఆశలో ఉన్నారు వంటేరు వేణుగోపాల్ రెడ్డి. కానీ అలాంటి అవకాశాలు కనిపించకపోవటంతో పార్టీని వీడుతున్నట్లు ప్రకటించారు. మరోవైపు వంటేరు వేణుగోపాల్ రెడ్డి రెండు మూడు రోజుల్లో తెలుగుదేశం పార్టీలో చేరతారనే ప్రచారం నడుస్తోంది. వేమిరెడ్డి ప్రభాకర్ రెడ్డి నేతృత్వంలో చంద్రబాబును కలిసి టీడీపీలో చేరతారని సమాచారం.