టీడీపీకి షాక్.. వైసీపీలోకి కీలక నేత.. జగన్ సమక్షంలో చేరిక

ఏపీలో ఎన్నికలు దగ్గరపడుతున్న కొద్దీ రాజకీయ పార్టీల్లో చేరికలు జోరందుకున్నాయి. ప్రస్తుత పార్టీ మీద అసంతృప్తితో ఉన్న నేతలు చడీచప్పుడు కాకుండా.. పక్కపార్టీలోకి జంప్ చేస్తున్నారు . టికెట్ రాకపోయినా అధికారంలోకి వస్తే ఏదో ఒక పదవి దక్కుతుందనే ఆశతో.. రాజకీయ భవిష్యత్తు మీద బెంగతో గోడలు దూకుతున్నారు. తాజాగా ఉమ్మడి విశాఖ జిల్లాలో కీలక నేతలు వైసీపీలో చేరిపోయారు. తాడేపల్లిలోని సీఎం క్యాంపు కార్యాలయంలో ముఖ్యమంత్రి వైఎస్ జగన్ సమక్షంలో వైఎస్సార్‌సీపీ కండువా కప్పుకున్నారు. విశాఖపట్నం జిల్లాకు చెందిన డాక్టర్ కంచర్ల అచ్యుతరావు. టీడీపీ నేత గంపల వెంకటరామచంద్రరావు వైసీపీలో చేరిపోయారు. సీఎం జగన్ వారి మెడలో కండువా కప్పి పార్టీలోకి ఆహ్వానించారు.

కంచర్ల అచ్యుతరావు విషయానికి వస్తే విశాఖపట్నంలోని ఆరిలోవా ప్రాంతంలో ఈయనకు మంచిపట్టుంది. స్థానికంగా బలమైన నేతగా కంచర్ల అచ్యుతరావు పేరొందారు. గతంలో చిరంజీవి ప్రజారాజ్యం పార్టీ సమయంలో కంచర్ల అచ్యుతరావు క్రియాశీలకంగా వ్యవహరించారు. ప్రస్తుతం ఈ ప్రాంతంలో సేవా కార్యక్రమాలు నిర్వహిస్తు్న్నారు. ఇక టీడీపీకి చెందిన సీనియర్ నేత గంపల వెంకట రామచంద్రారావు, ఆయన సతీమణి సంధ్యారాణితో కలిసి వైసీపీలో చేరారు.

వెంకట రామచంద్రారావు విశాఖపట్నం టీడీపీ సౌత్, ఈస్ట్‌ ఎలక్షన్‌ ఇంచార్జిగా పనిచేశారు. అలాగే గతంలో ఏపీసీసీ జాయింట్‌ సెక్రటరీగా, ఏపీసీసీ ఓబీసీ వింగ్‌ వర్కింగ్‌ ప్రెసిడెంట్‌గా, కాంగ్రెస్‌ పార్టీలో వివిధ హోదాల్లో పనిచేశారు. వాడబలిజ సామాజికవర్గం నేత అయిన రామచంద్రరావు సెన్సార్‌ బోర్డు మెంబర్‌గా, పోర్ట్‌ ట్రస్ట్‌ డైరెక్టర్‌గా కూడా వ్యవహరించారు. వైఎస్‌ఆర్‌సీపీ రీజనల్‌ కోఆర్డినేటర్‌ వైవీ సుబ్బారెడ్డి, వైజాగ్‌ స్మార్ట్‌ సిటీ కార్పొరేషన్‌ మాజీ ఛైర్మన్‌ గన్నమని వెంకటేశ్వరరావు సమక్షంలో జగన్ వీరికి కండువా కప్పి పార్టీలోకి ఆహ్వానించారు.

వైనాట్ 175 అనే నినాదంతో ముందుకెళ్తున్న సీఎం జగన్.. ఉత్తరాంధ్ర ప్రాంతంపై ప్రత్యేకంగా దృష్టిసారించారు. విశాఖపట్నంలో గత ఎన్నికల్లో ఎంపీ మినహా ఒక్కసీటును కూడా వైసీపీ కైవసం చేసుకోలేకపోయింది. మొత్తం నాలుగు అసెంబ్లీ నియోజకవర్గాలలోనూ టీడీపీ విజయం సాధించింది. ఆ తర్వాత పరిణామాల్లా విశాఖపట్నం దక్షిణం ఎమ్మెల్యే వాసుపల్లి గణేష్ వైసీపీలో చేరారు. ప్రస్తుతం వైసీపీ నుంచి మరోసారి ఇక్కడి నుంచే బరిలోకి దిగుతున్నారు. అయితే వచ్చే ఎన్నికల్లో విశాఖలో తమ బలం పెంచుకోవాలని భావిస్తున్న వైఎస్ఆర్‌సీపీ నాయకత్వం.. అందుకు అనుగుణంగా కీలకనేతలను తమపార్టీలోకి చేర్చుకుంటోంది.