ప్లీజ్ మమ్మల్ని విడిపించండి.. రష్యా సైన్యం చెరలోని భారతీయుల మరో వీడియో

రష్యా పర్యటనకు వెళ్లిన కొందరు భారతీయులు ఊహించని విధంగా అక్కడి సైన్యాలకు చిక్కుకుపోయిన సంగతి తెలిసిందే. ఉక్రెయిన్‌తో యుద్ధంలో రష్యా సైన్యానికి బలవంతంగా సహాయకులుగా పనిచేస్తున్న వారిని విడిపించేందుకు భారత ప్రభుత్వం ప్రయత్నాలు చేస్తోంది. ఈ క్రమంలో తాజాగా బాధితులు మరో వీడియో విడుదల చేశారు. తమను చెర నుంచి విడిపించి, స్వదేశానికి తీసుకెళ్లాలని కేంద్రాన్ని వేడుకొన్నారు. రష్యా సైనిక దుస్తుల్లో ఉన్న ఆరుగురు భారతీయులు ఉక్రెయిన్‌లోని జపొరిజియా ఓబ్లాస్ట్‌ ప్రాంతంలో ఈ వీడియోను రికార్డు చేశారు. వీరంతా పంజాబ్‌, హరియాణా రాష్ట్రాలకు చెందిన వారిగా తెలుస్తోంది.

‘మోదీజీ మేం రష్యా సైన్యంలో చిక్కుకుపోయాం... భారత ప్రభుత్వం సహాయం కోసం ఇంతకు ముందు ఓ వీడియో ద్వారా అర్ధించాం.. మన రెండు దేశాల మధ్య సత్సంబంధాలు ఉన్నాయని తెలుసు.. దయచేసి మాస్కోలోని భారత ఎంబసీని సంప్రదించి వీలైనంత త్వరగా మమ్మల్ని విడిపించండి.. ధన్యవాదాలు..!’ అంటూ 26 సెకన్ల వీడియోలో వారు కేంద్రాన్ని వేడుకున్నారు. కాగా, మార్చి నెల ప్రారంభంలోనూ ఈ బాధితులు 105 సెకెన్ల నిడివి ఉన్న ఓ వీడియోను విడుదల చేశారు. తమను బలవంతంగా సైన్యంలో సహాయకులుగా చేర్పించారని వాపోయారు.

‘హెల్పర్లుగా మాత్రమే పనిచేయాలని తొలుత చెప్పారు. కానీ, ఆ తర్వాత సాయుధ శిక్షణలో పేరు నమోదు చేశారు.. ఉక్రెయిన్‌లోకి పంపేందుకు ఏర్పాట్లు చేస్తున్నారు.. మాకు ఆహారం కూడా పెట్టడంలేదు.. మొబైల్ ఫోన్లు లాక్కొన్నారు’ అని ఆవేదన వ్యక్తం చేశారు. తాజా వీడియోతో వారిని యుద్ధభూమిలోకి పంపినట్లు స్పష్టమవుతోంది. కాగా, బాధితులు గత డిసెంబరు 27న కొత్త ఏడాది వేడుకలు జరుపుకోడానికి రష్యా వెళ్లినట్లు తెలిసింది. ఏజెంట్ చేతిలో మోసపోయిన వీరు రష్యా ఆర్మీకి చిక్కారు. 90 రోజుల వీసాపై మాస్కోకు వెళ్లిన తమను ఏజెంట్‌ బెలారస్‌కు తీసుకెళ్లినట్లు బాధితుల్లో ఒకరైన హరియాణాకు చెందిన 19 ఏళ్ల హర్ష్ గత వీడియోలో తెలిపారు. అక్కడ ఆ ఏజెంట్ తమను వదిలేసి పోయాడని, స్థానిక పోలీసులు పట్టుకుని రష్యా అధికారులకు అప్పగించారని తమ గోడు వెళ్లబోసుకున్నారు.

‘వీసా అవసరమని మాకు తెలియదు. మేము బెలారస్‌కు వెళ్లినప్పుడు (వీసా లేకుండా) ఏజెంట్ మమ్మల్ని మరింత డబ్బు అడిగాడు.. అక్కడ వదిలిపెట్టాడు. పోలీసులు మమ్మల్ని పట్టుకుని రష్యా అధికారులకు అప్పగించారు.. వారు మాతో పత్రాలపై సంతకం చేయించారు.. ఇప్పుడు ఉక్రెయిన్‌పై యుద్ధంలో పోరాడాలని మమ్మల్ని బలవంతం చేస్తున్నారు’ అని హర్ష్ కన్నీటిపర్యంతమయ్యాడు. హర్ష్ విదేశాల్లో ఉద్యోగాల కోసం వెతుకుతున్నాడని, రష్యా మీదుగా వెళితే తనకు నచ్చిన దేశానికి వలస వెళ్లడం సులభమవుతుందని చెప్పినట్టు అతడి కుటుంబం గతంలో తెలిపింది. ‘నా కొడుకు డిసెంబర్ 23న విదేశాలకు వెళ్లాడు.. ఉద్యోగం వెతుక్కుంటూ రష్యాలో పట్టుబడ్డాడు.. అక్కడ అతడి పాస్‌పోర్ట్ లాక్కున్నాడు. రష్యా సైనికులు తమను పట్టుకున్నారని, పదేళ్ల జైలు శిక్ష విధిస్తామని బెదిరించి రిక్రూట్ చేసుకున్నారని మాకు చెప్పాడు.. అతను బలవంతంగా సైనిక శిక్షణ పొందాడని చెప్పాడు’అని అతడి తల్లి పేర్కొంది. నా కొడుకును క్షేమంగా ఇంటికి తీసుకురావాలని ప్రభుత్వాన్ని కోరింది.

కాగా, భారత్‌ నుంచి దాదాపు 100 మంది యువకులను ఉద్యోగం పేరుతో రష్యాకు తరలించి ఉక్రెయిన్‌తో యుద్ధంలోకి నెట్టారన్న సమాచారంపై ఇటీవల కేంద్రం స్పందించింది. మాస్కోతో చర్చలు జరిపి కొంత మందిని విడిపించినట్లు పేర్కొంది. మరికొందరు అక్కడే పనిచేస్తున్నారని, వారినీ బయటకు తీసుకొచ్చేందుకు రష్యా అధికారులపై ఒత్తిడి తీసుకొస్తున్నామని కేంద్ర విదేశాంగ శాఖ ప్రతినిధి రణధీర్‌ జైస్వాల్‌ వెల్లడించారు.