నన్ను ఇంకేమీ మాట్లాడనివ్వకండి.. సీనియర్ లాయర్‌కు సీజేఐ వార్నింగ్

ఎన్నికల బాండ్ల అంశంపై విచారణ సందర్భంగా సుప్రీంకోర్టు బార్ అసోసియేషన్ అధ్యక్షుడు, సీనియర్ లాయర్ అదిశ్ అగర్వాల్‌పై ప్రధాన న్యాయమూర్తి జస్టిస్ డీవై చంద్రచూడ్ తీవ్ర ఆగ్రహం వ్యక్తం చేశారు. ఎన్నికల బాండ్ల పథకం రద్దుకు సంబంధించిన తీర్పుపై సుమోటోగా సమీక్ష చేయాలని లాయర్ అదీశ్ అగర్వాల్ కోరడంతో చీఫ్ జస్టిస్ తీవ్రంగా స్పందించారు. ‘మీరు సీనియర్ న్యాయవాది మాత్రమే కాదు ఎస్సీబీఏ అధ్యక్షుడు. నా సుమోటో అధికారాలను ప్రశిస్తూ లేఖ రాశారు. ఇవన్నీ ప్రచారానికి సంబంధించిన అంశాలు.. మేము దీనిలో భాగం కాలేం.. నన్ను ఇంకేమీ మాట్లాడనివ్వద్దు.. ఇది అసహ్యంగా ఉంటుంది’ వార్నింగ్ ఇచ్చారు.

అలాగే, సొలిసిటర్ జనరల్ తుషార్ మెహతా సైతం అగర్వాల్ అభ్యర్థనను తప్పుబట్టారు. మేము దీనికి మద్దతు ఇవ్వబోమని వ్యాఖ్యానించారు. ఎన్నికల బాండ్లపై సుప్రీంకోర్టు ఇచ్చిన తీర్పును నిలిపివేయాలంటూ రాష్ట్రపతి ద్రౌపది ముర్ముకు ఆయన రాసిన లేఖ తీవ్ర గందరగోళం సృష్టించింది. అగర్వాల్ లేఖతో తమకు ఎలాంటి సంబంధం లేదని, అది ఆయన వ్యక్తిగత అభిప్రాయమని బార్ అసోసియేషన్ ప్రకటన చేసింది. రాష్ట్రపతికి లేఖ రాసేందుకు తాము అగర్వాలకు అధికారం ఇవ్వలేదని స్పష్టం చేసింది.

‘ఆల్‌ ఇండియా బార్‌ అసోసియేషన్‌ ఛైర్మన్‌ హోదాలో అగర్వాల్ ఈ లేఖ రాసినట్లు కన్పిస్తోంది.. అయితే కమిటీ సభ్యులు ఆయనకు అలా లేఖ రాసే అధికారం ఇవ్వలేదు.. అంతేకాక ఆ లేఖలో ఆయన వ్యక్తం చేసిన అభిప్రాయాలను వారెవ్వరూ సమర్ధించడం లేదు... అగర్వాల్‌ చర్య, ఆయన రాసిన లేఖలోని వివరాలు సుప్రీంకోర్టు అధికారానికి భంగకరంగా ఉన్నాయి.. ఈ చర్యను తాము నిర్ద్వంద్వంగా ఖండిస్తున్నాం’బార్‌ అసోసియేషన్‌ తీర్మానం చేసింది.

ఇక, రాష్ట్రపతికి అగర్వాల్ రాసిన లేఖలో ‘రాజ్యాంగపరమైన ప్రతిష్టంభనను కలిగించే విధంగా తీర్పులు వెలువరించడానికి సుప్రీంకోర్టును అనుమతించకూడదు. పార్లమెంట్‌ ఔన్నత్యాన్ని దెబ్బతీసే విధంగా తీర్పులు ఇవ్వడాన్ని అనుమతించకూడదు... చట్టసభలో ప్రజాప్రతినిధులందరూ కలిసి తీసుకున్న నిర్ణయానికి వ్యతిరేకంగా తీర్పులు ఇవ్వడాన్ని అనుమతించరాదు.. రాజకీయ పార్టీల పనితీరును ప్రశ్నించేలా తీర్పులు ఇవ్వకూడదు’ అని ఆయన అభిప్రాయపడ్డారు ‘వివిధ రాజకీయ పార్టీలకు సహకరించిన సంస్థల పేర్లను బహిర్గతం చేయడం వల్ల కార్పొరేట్లు బలిపశువులవుతారు... తీర్పును అనుసరించి మొత్తం సమాచారాన్ని విడుదల చేస్తే, అంతర్జాతీయ వేదికలపై మనదేశం ఖ్యాతి దెబ్బతింటుంది’ అని వ్యాఖ్యానించారు.