విశాఖలో మాజీ ఎమ్మెల్యే, వైసీపీ నేత ఇంట్లో భారీ చోరీ.. వాళ్లే చేశారని అనుమానం

విశాఖలో మాజీ ఎమ్మెల్యే తైనాల విజయకుమార్‌ ఇంట్లో చోరీ కలకలంరేపింది. ఆయ ఇంట్లో చొరబడిన దొంగలు డబ్బు, బంగారు ఆభరణాలు ఎత్తుకెళ్లారు. తైనాల విజయకుమార్‌, విజయలక్ష్మి దంపతులు డాబాగార్డెన్స్‌లో నివాసం ఉటున్నారు. వీరికి ఇద్దరు కుమారులు.. ఉద్యోగాల రీత్యా వేరే చోట ఉంటున్నారు. విజయకుమార్‌ గురువారం ఉదయం ఎండాడలో జరిగిన వైఎస్సార్‌సీపీ సమావేశంలో పాల్గొన్నారు. మధ్యాహ్నం ఇంటి కొచ్చి భోజనం చేసి వైఎస్సార్‌సీపీ విశాఖ ఎంపీ అభ్యర్థి బొత్స ఝాన్సీతో కలిసి ఎస్‌.కోట వెళ్లారు.

గురువారం రాత్రి 7.20 గంటల సమయంలో గుర్తుతెలియని ఇద్దరు దుండగులు ఇంట్లోకి ప్రవేశించి వంటగదిలో ఉన్న తైనాల భార్య విజయలక్ష్మి కళ్లల్లోకి పెప్పర్‌స్ప్రే కొట్టారు. మెడపై కత్తిపెట్టి, అరిస్తే చంపేస్తానని బెదిరించి మెడలోని పుస్తెలతాడుతో పాటు మరో బంగారు ఆభరణాన్ని తీసుకున్నారు. అనంతరం ఆమె చేత బీరువా తెరిపించి అందులో ఉన్న సుమారు రూ.8లక్షల నగదును తీసుకున్నారు. తర్వాత ఆమెను బాతురూంలోకి నెట్టేసి పరారయ్యారు.

ఆమె వెంటనే భర్తకు ఫోన్‌ చేయగా ప్రచారం హోరులో విజయ్‌కుమార్‌ ఫోన్‌ తీయలేదు. దీంతో కారు డ్రైవర్‌కు ఫోన్‌ చేసి విషయం చెప్పడంతో విజయ్‌కుమార్‌ వెంటనే ఇంటికి చేరుకున్నారు. వెంటనే టూ టౌన్పోలీసులు ఘటనా స్థలానికి చేరుకుని సీసీ కెమెరాలను పరిశీలించారు. కేసు నమోదు చేసి దర్యాప్తు చేస్తున్నారు. పెంపుడు కుక్క వారం క్రితమే అనారోగ్యంతో చనిపోవడం, ఇంట్లో విజయలక్ష్మి ఒక్కరే ఉండడం చూసి దుండగులు చొరబడి ఉంటారని పోలీసులు భావిస్తున్నారు.

ఈ ఘటనపై పలు అనుమానాలు మొదలయ్యాయి. ఇది తెలిసినవారి పనే అయి ఉంటుందని పోలీసులు అనుమానిస్తున్నారు. విజయ్‌కుమార్‌ ప్రతిరోజూ మధ్యాహ్నం భోజనం తర్వాత ఎస్‌.కోట వెళుతున్నారని.. ఆ సమయంలో భార్య ఒంటరిగా ఉంటున్నట్టు గమనించిన వ్యక్తులే దోపిడీ చేసి ఉంటారని భావిస్తున్నారు. దుండగుడు తెలుగులో స్పష్టంగా మాట్లాడాడని, మధ్యలో ఎవరో ఫోన్‌ చేయగా.. పనైపోయింది వచ్చేస్తానని చెప్పాడని విజయ్‌కుమార్‌ భార్య పోలీసులకు తెలిపారు. విజయ్‌కుమార్‌ ఇంటి వద్ద ఉన్న సీసీ కెమెరాలతోపాటుగా ఎదురుగా ఉన్న అపార్ట్‌మెంట్‌లోని సీసీ కెమెరాల ఫుటేజీలను పోలీసులు పరిశీలించారు.

విజయ్‌కుమార్ ఇంటి బయట ఒకరు బైక్‌పై వేచి ఉండగా, ఒకరు ఇంట్లోకి ప్రవేశించినట్టు సీసీ కెమెరాల్లో రికార్డయింది. దీంతో దోపిడీలో ఇద్దరి పాత్ర ఉన్నట్టు పోలీసులు గుర్తించారు. ఆ ఇద్దరూ స్థానికులే అయి ఉంటారని అనుమానిస్తున్నారు. సీసీ కెమెరాల ఫుటేజీ, సెల్‌ఫోన్‌ టవర్‌ లొకేషన్‌, ఘటనా స్థలంలో లభ్యమైన వేలిముద్రల ఆధారంగా నిందితుల కోసం పోలీసులు గాలించడం మొదలు పెట్టారు. ఈ చోరీ ఘటనకు సంబంధించిన పూర్తి వివరాలు తెలియాల్సి ఉంది.