హాట్ హాట్ గా అమ్ముడుపోయిన ఐపీఎల్‌ మ్యాచ్‌ల ఆన్‌లైన్‌ టిక్కెట్లు
Andhra Pradesh Telugu | Suryaa Desk | Published : Mon, Mar 25, 2024, 11:23 AM
విశాఖ నగరంలోని ఏసీఏ వీడీసీఏ స్టేడియంలో జరగనున్న ఐపీఎల్‌ మ్యాచ్‌ల ఆన్‌లైన్‌ టికెట్ల అమ్మకాలకు క్రీడాభిమానుల నుంచి అనూహ్య స్పందన లభించింది. ఏప్రిల్‌ 3న ఢిల్లీ క్యాపిటల్స్‌, కోల్‌కత్తా నైట్‌ రైడర్స్‌ మధ్య జరగనున్న మ్యాచ్‌కు ఆదివారం పేటీఎం ఇన్‌సైడర్‌ వెబ్‌సైట్‌ ద్వారా టికెట్ల అమ్మకాలను చేపట్టారు. కాగా విక్రయాలు ప్రారంభించిన కొద్ది సేపటికే హాట్‌కేక్‌ల్లా అమ్ముడైపోయాయి. యాప్‌లో ముందుగానే సైనప్‌ అయి ఉన్నవారు ఎగబడి కొనుగోలు చేశారు. దీంతో కొద్దిసేపటికే పేటీఎం ఇన్‌సైడర్‌ వెబ్‌సైట్‌లో ఢిల్లీ క్యాపిటల్స్‌, కోల్‌కత్తా నైట్‌ రైడర్స్‌ మ్యాచ్‌ టికెట్లకు సంబంధించి అన్‌అవేలబుల్‌ చూపింది. కాగా ఢిల్లీ క్యాపిటల్స్‌-చెన్నై సూపర్‌కింగ్స్‌ మధ్య ఈనెల 31న జరిగే మ్యాచ్‌కు అత్యంత డిమాండ్‌ ఏర్పడగా... ఢిల్లీ క్యాపిటల్స్‌-కోల్‌కతా నైట్‌ రైడర్స్‌ మ్యాచ్‌కు కూడా హాట్‌కేకుల్లా టికెట్లు అమ్ముడైపోవడం విశేషం. ఈ నేపథ్యంలో ఢిల్లీ క్యాపిటల్స్‌-చెన్నై సూపర్‌కింగ్స్‌ మ్యాచ్‌కు టికెట్ల అమ్మకాలు ప్రారంభిస్తే...క్రీడాభిమానులు వెబ్‌సైట్‌లో ఏ స్థాయిలో పోటీపడనున్నారో స్పష్టమవుతోంది.
|
|